2Cor 8 | TpjSC | STEP | A’ẽ shyryvyre, aipota ambeupe marãra Tũpa heshaka jyhaihukue hareka pya kavikue tũpao retape ẽvã Macedoniape.

2 Corinthians 8

Jyhaihukue ryhevepo ñameẽ

1 A’ẽ shyryvyre, aipota ambeupe marãra Tũpa heshaka jyhaihukue hareka pya kavikue tũpao retape ẽvã Macedoniape. 2 Hasa’asytẽvare, vya reta; pavetetẽvare, haihumba ryheve meẽ reta kyrypoti, hetareva rãĩmi. 3 She aikuaa haire ĩmereamikueĩ meẽrã hareka heta ĩãrẽve meẽ reta. 4 Jurure’asy ore potanda hejahashu reta mbory verãre yngava ñandyryvy Jesucristo jyrojahea retarã. 5 Hãrõhã vekuaivi haire hetave japo, shara hairetateiva ñymeẽ, tynonde Ñandejape, haivi orepe jyve, Tũpa potava rãĩmi. 6 Hãmeara jururehashu Tito, hai õñepyrõ vekua opa japo verã pymbytepe, kova mbai kavikue pijapova. 7 Pee rãnga opa mba’epe piñymytynonde: Jyrojakuepe, pijetavape, arãndupe, kyrẽ’ỹpe hareka jyhaihukue pikuaa yryhevivape. Kyrãpo piñymytynonde jyve kova mbai haikaviva japohavape. 8 Ha’ẽã katu pijapoñoĩ verã she hai peeva. Pota rãnga aheshakape marãra yngavare opa ñymykyrẽỹ jyve, pyheshaka verã jyve marãra pyhaihu papishare. 9 Pee rãnga pikuaama Ñandeja Jesucristo, marãra pya kavi, pyndyraihuiterã hai ikokatutẽva paveteva rãĩmi ou iko’i, hai pavetekuepe pikokatu verã. 10 Kovape ameẽpope arakuaa: Pee rãnga ãño hasa vekuapevãĩ peñepyrõ, ha’ẽã kova mbai pijapoĩñoĩtẽva, kyrẽ’ỹpe rãnga pijapo. 11 Hãrã ã’ẽ opapo pijapo kyrẽ’ỹpe hairãã peñepỹrõrã vekua rãĩmi, ĩmepyreva katu pymeẽvapo, pymeẽ. 12 Hãma kyrẽỹ meẽva, myvãhẽha kaviposhu vy’ape meẽrã, shara Tũpa jurureã ñande mba’etyjarea ñameẽ verã. 13 Ore rãnga potahãã pypyta pikotẽvẽ, mbai mba’etyreare pymborypirã, koñeĩ potaha jyvachekavi. 14 Ã’ẽ haire mba’etyre pee ĩmepyreare; mbaipeiny ĩmere jyve retakui pikotẽvẽva, kyrãpo jyvache piko. 15 Mbyparahavape heiva rãĩmi: “Heta mynovaave hẽmbyãshu, hareka mbovyĩ mynoova mba’etyre”.

Tito hareka ñi’ĩrũre

16 Ãmeẽ shy’ajetekue Tũpape hai ñono Tito pyape she rãĩmi ojepy’apy pyndyrehe verãrã. 17 Ãñete hai hendu haishuva; hai ojepy’apyñoĩ pyndyrehe, hãrã ã’ẽ ha’ima kyrẽ’ỹpe oho pẽĩvape. 18 Mondoha hãndi yngava ñandyryvy hyrãkua kaviva opaite tũpao retaipirã rehe hareka haikavite mbeu Ñee kaviva ryhevarã. 19 Ha’ẽã kovaĩ, Jesucristore jyrojavare yngava tũpaope’õre pyhỹrõjy reta ohoa hãndi verã, hareka yrỹmbory rahaha verã hareka ñyngarekohahe kova pymbatyva Ñandeja pota ñamombairã, hareka jaheshaka pota ñapyrỹmboryva. 20 Kova heta mbai mbatyava rehe, potãã mbava ijeta porãã yryrehe marãra ñyngarekohahe kova mbatyhava. 21 Õñehãã rãnga haikavi japoha maĩnunga, ha’ẽã Ñandeja hỹnondeĩ, kuaretare hỹnonde jyve. 22 Mondoha rãnga jyve hãndi pente ñandyryvy, heta mbaipe heshahahe hai kyrẽỹva, ã’ẽ kyrẽỹvema, shara hai jyroja pyndyrehe. 23 Tito rãnga hai shi’ĩrũ hareka shymbory’ia pee pevarã; hãma ñandyryvyre oho hãndivare, hai Jesucristo jy tũpao mondovare, hareka Cristo õmombai’iare. 24 Pyheshakashu reta jyrojavare jyhaihukue ĩmepyreva, tũpao mondovare kuaa verã jyve hareka reiãã airoja’ai pyndyreherã.