2Cor 9 | TpjSC | STEP | Kova pymbatyva hai ñandyryvy jyrojavare pevarã, katuãny hykuaĩ ambyparajype kuatiape.

2 Corinthians 9

1 Kova pymbatyva hai ñandyryvy jyrojavare pevarã, katuãny hykuaĩ ambyparajype kuatiape. 2 Shara aikuaa õĩmavare hareka kyrẽỹ retarã. Hãrã vy’apeñoĩ ambeushu ko Macedoniape’õre, pee Acayape pẽĩvã ãño hasa vekuapevãĩ opa pẽĩ kavi, hãrã kyrẽ’ỹkue hetavape mykyrẽỹ jyve. 3 Tẽvã, ãmondope kova ñandyryvyre, hãma kovare aijetarã potãã porãã apyta airojate pyndyreherã. Hai peeva rãĩmi, pota ãñete kyrã verã pẽĩ kavirã. 4 Mahẽ Macedoniavare ohoa hãndirã pyndyreshakui pẽĩkavimbape. Hokava yrỹmymarãkapokui, shara jyrojahaite’i pyndyrehe; jaijetambaheva marãkue pee pyreko verã. 5 Hãme rãnga tynonde mondoha kova ñandyryvyre oho verã pẽĩvape, pynymbory verãre opa piñono kavi verã pymeẽ verã pymbatyva, pee pereva rãĩmi. Kyrã opama ẽẽ verã pyndypya kavirã pymeẽva, ha’ẽã mbava pinimiñerã’irã. 6 Pynymanduahe kova: Hetambaa ma’ẽtyva, hetããpo mynoo. Heta ma’ẽtyva, hetapo mynoo. 7 Pepenteĩ tymeẽ pyape ñanduva rãĩmi, avypo meẽ vyamba ryheve, ha’ẽã miñerãhãherã, shara Tũpa haihu vy’ape mbai meẽva. 8 Tũpa rãnga hai pyrãtava opa mbaipe, mbyhetape verã opa mbai haikaviva, ĩmepyre verã opa mba’e mba’etypyreare, kyrã pymbory verã jyve mbai mba’etyreare. 9 Mbyparahava heiva rãĩmi: Hai opa memeẽ, pavetevare meẽshu; ñimbivache ryheva mandu’añoĩpohe opa arape. 10 Tũpa meẽ timity ñotyã verã hareka hou verã pãhã, me’ẽhapope pimityrã hareka hetavepo myhẽñope pyndekope hareka mbyhetavepope mbai ñimbivachepe pijapova rehe. 11 Kyrãpo heta mbai ĩmepyre hareka hetavepo pymeẽ. Pymbatyva ỹrỹmbyrahakapi vekua rupiipo heta’ẽ jy’ajetekue meẽshuva Tũpa. 12 Shara kova mbai haikavi pijapova pymbory verã ñandyryvyre, ha’ẽã mbai mba’etyrevapeĩ mboryvare, koñeĩ mykyrẽ’ỹha reta pyraheshu verã Tũpa. 13 Kova pijapova rupii haire õmombaipo Tũpa, shara haire heshapo ãñete pijapova Ñee kaviva Cristo ryheva, hareka pyhaihu ryheveã pymbaty maĩnunga haire pevarã hareka opaiteva pevarã. 14 Hareka haire jyhaihukue ryhevepo ñymboi pyndyrehe, jyparekokue Tũpa heshakapeva rehe. 15 Ãmeẽ shy’ajetekue Tũpape! Shara hai heta mbai meẽ ñande katumba opa ñambeuva!