2Jo | TpjSC | STEP |

2 John

Ñymarãndu

1 She Juan, shyryvyre Tũpa pyhỹrõ vekua pevarã hareka memby retape añetevape apyryraihu, ha’ẽã sheĩ, opaite añeteva kuava reta rãnga jyve, 2 shara añeteva iko ñandypyape hareka opa arapo ẽẽ ñanendie. 3 Tũpa Teru hareka Tyray Ñandeja Jesucristo, maĩkavipo pyndyryhe, hareka meẽpope jyparekokue hareka pyavapy, añetevape hareka jyhaihukuepy.

Jyhaihu añeteva

4 Shymbyvy’aite ahesha ã’ãmo ndyrayre añetevape iko retarã, Teru hei ñandeva rãĩmi jajapo verã. 5 Ã’ẽ airure’asype shyryvyre ha’eã ñee py’ahuva japoa verã ambyparapeva, arykaivaĩ me’ẽha ñande vekua rãnga, opaiteva jaijyhaihupaveĩ verã. 6 Kova hai jyhaihu, jajapo Tũpa potava hareka kova japoa verã hai; piko jyhaihupe, jypyiterãvaĩ pyhendu vekua rãĩmi. 7 Shara ko yvy’ĩãrẽ hetama’ẽ pyrỹmbytavy’iare, heiva Jesucristo oumbava yvy’ĩãrẽ kuareta rãĩmi, tyroope hareka tykãvẽpe. Kyrã japo’ia hai pyrỹmbytavy’ia hareka Cristo ñymbyvaisho’ihea. 8 Pingareko pindijeheshi reta avypo õñehundirei pyndyhevikui pijapova hepykue, mahẽ opakaviã mbyhepyapekui. 9 Ĩme’ẽ Cristo pyrỹmboiva rãĩmi õhẽshivarã mba’etyre Tũpa; tẽvã ikova heiva rãĩmi ĩmere Tuu hareka Tay. 10 Ĩme’ẽ oho pohypeva kyrãva pyrỹmboimbahearã, avy pymyvãhẽ pynyrẽntape hareka avypo pymarãndushu. 11 Shara marãndushuva mi’irũmahe mbai porãmba hai japova.

Ãhãrõ aha verã peĩvape

12 Hetatẽ ĩme’are mbai hai pee verã, tẽvã kuatia rupii shateỹ hai, ãhãrõĩ shetei aha apyryresha aijeta penendie verã hareka javya verã. 13 Niindy membyre, Tũpa pyhỹrõva, nymymarãndu.