2Pe 2 | TpjSC | STEP | Israelvare mbytepe ĩmemba’ẽ arykai pyrỹmboi’iare japuva; kyrãpo ẽẽ jyvekui pynymbytepe israel pyrỹmboi’ia japuvare. Haire ñemiapepo pynymboi, ijetapohepe pyrỹmyporãmba ryheva hareka añetembavare. Haire ñomipo Ñandeja Jesucristo nohẽshu vekuare mbai porãmbaivi. Hokava veruposhu reta arembaa opa jyvareahe verã.

2 Peter 2

Pyrỹmboi’iare añetembava

1 Israelvare mbytepe ĩmemba’ẽ arykai pyrỹmboi’iare japuva; kyrãpo ẽẽ jyvekui pynymbytepe israel pyrỹmboi’ia japuvare. Haire ñemiapepo pynymboi, ijetapohepe pyrỹmyporãmba ryheva hareka añetembavare. Haire ñomipo Ñandeja Jesucristo nohẽshu vekuare mbai porãmbaivi. Hokava veruposhu reta arembaa opa jyvareahe verã. 2 Hetapo’ẽ mi’ĩrũvare hekokyava haire rãĩmi, hai reta reheĩ ijeta porããpohe pee añeteva. 3 Kyrypoti potakueivipo, haire pynymbytavy pyta verãre opaite pyndykyrypoti ryheve. Arykaivãimba ñonoha haire jahehahe verãre, hãrã hokavaivi ohojepeãposhi reta. 4 Shara Tũpa hejareiãmba arykai hai jokuevare porãmba japorã, koñeĩ mombombashu reta tata vasupe. Haipe hejashu reta pyntuvape ñapintĩhavape hareka natuha verãre ara Tũpa jahe pyryrehe verãpe. 5 Tũpa hejareiãmbashu reta arykaiva kuaretare, hãrã mboumbashu arykai amavasu yvy ĩãrẽ’iare, koñeĩmba Noé mondojepe, pyrỹmboi’ihea teko jyvache hareka 7 ĩrũre hãndi. 6 Tũpa jahembahe arykai tenta vasure Sodoma hareka Gomorra; opa hapy ñytanimbupeve, heshaka verã mbaivarapo jehu heko kyava retape. 7 Tẽvã mondojepembashu Lot, shara hai kuareta heko kaviva hareka mbasytẽhe marãra tykove ijokombashivare porãmbape. 8 Shara kova kuimbai heko kaviva haire mbytepe iko’ia, mbasyhe heshava hareka henduva rehe kuaretare heko porã’ãĩterã. 9 Ñandeja rãnga katu hejareishu ĩñee japoshuare pya hã‘ãhã’ẽrã hareka natu heko porãmbare jyvareahe verãre pirĩmbivachehava arape. 10 Opa mbai ĩãrẽ, Tũpa nupapokui hoo potavaĩ ñee hendushuare hareka porãmbavaĩ japo’iare. Hokava rãnga mbaimba kuaaseva hareka ñynotimbare hareka kyjemba ijeta porãmbahea Tũpa jokuevare. 11 Ajemaĩ Tũpa jokuevare, pyrãtavete haivare hareka ñymbaikatuvete haivare hehe’iãshu reta hareka jaheãhe Tũpa hỹnonde. 12 Tẽvã kova kuaretare jahehe mbai kuaa kavimba vekuare; mymba rãĩmi jyre, oarã pysyha hareka jukaha reta, hãrã jyvareapohe porãmba japova rehe. 13 Hãrã haire hasa’asypo hetavape mbyhasa’asyva rãĩmi. Mbyvyava rãĩmi tykove ijokombavape jyrerã arakuepe japojyrerã. Hokavare hai tykove kyava hareka myngyava, pynymbytavy hareka puka pyndyreheva karuteri penendierã. 14 Haire hesha pente tauperã potaravi ñeno hãndi, mbai porãmbavaĩ pota japo reta, mykyrẽy veru verãre jyrojakuepe pyrãtambateriva; haire mbijehuñoĩvare heta maĩnunga potavare, hareka hokava hai kuareta jaheamahevare. 15 Opa heja reta tape haikaviva, yngaty jyraha reta japo verã Balaam Beor tay japo vekua, haihuva kyrypoti hekopemba’õ japo’iape. 16 Hãme rãnga he’ihashu porãmba japova rehe: Pente mbirikami ijetashu kuareta ĩñeepy; hareka jochashu potaveãma ñakareĩ iko’irã. 17 Kova pyrỹmboi’ia reta rãnga ova yy henda opa tini vekua hareka ãvãpyntu yvytu rahava rãĩmi! Tũpa ĩmemare ẽẽ verã retape timimbi vasuvape. 18 Hãma ijeta retarã, ijetapareii hareka mbaimba vekua, hoo potavape rahashu hareka ity hairãã õhẽjyva javyvape iko’iare mbyteivi. 19 Ĩñee meẽshu reta poima japo verãre pota japova, tẽvã hai retateiva poĩã japo porãmba. Hãrã hokava porãmbateiva opapo ohũndishu verã, shara katumba mbai porãmba poi japova hai mbai porãmbape jokuehareirea. 20 Shara kuaashuvare Ñandeja hareka Pyrỹmondojepe’ia Jesucristo, katuveãmapo iko mbai porãmba japo’iare rãĩmi ko yvy‘ĩãrẽ’õ; tẽvã hokava mbaipe jypokuarã hareka hykuaĩ mbai porãmbape ẽẽjyrã, porã’ãĩtevepo pyta jypyite õñepyrõ vekuaivi. 21 Haikavivete verã haire kuãã tape symyĩva hareka mahẽ kuama retarã syryshi ñee japoa verã kyambava me’ẽãshu vekuare. 22 Hai rehe iko añeteva ñee heiva: Ñaumba houjy ñyvẽ’ẽkue, kushi opa mbijahuarã oho japajerejy tujupy.