2Pe 3 | TpjSC | STEP | Shyryvyre ahaihuva, kova hai kuatia mokuehea ambyparapeva. Hãrã kova mokuehea rupii pota apyrỹmykyrẽỹ hareka airurepe, hekope kavi pypya pimbijeta verã.

2 Peter 3

Ñandeja jy’ara oupo

1 Shyryvyre ahaihuva, kova hai kuatia mokuehea ambyparapeva. Hãrã kova mokuehea rupii pota apyrỹmykyrẽỹ hareka airurepe, hekope kavi pypya pimbijeta verã. 2 Pynymanduahe arykai Tũpa ĩñee mbeu’ia heko kyambavare hareka ñeẽ japoa verã Ñandeja ña’ãpova hareka Pyrỹmondojepe’ia apostolre rupii. 3 Opava kovare ĩãrẽ pikuaa kavipo: Ara koñymaheape, jyverupo kuareta Tũpa ñymbyhory’iheare pota ikova rãĩmi ikova. Haire ñymbyhorypo pyndyrehekui. 4 Hareka pyrãndupo: “Mbaivara ikoshi ñee me’ẽãva Cristo oujy verã ryheva? Yreru reta rãnga opama mano, hareka kova yvy ĩmeĩ’ẽ arykai jypyite japohava rãĩmi”. 5 Hokava kuaretare arykaivaĩ kuaaseã ẽẽva ara hareka Tũpa ĩñee rupii nohẽva kova yvy, yy mbyteivi hareka yyhupi ikova. 6 Yy rupii opa oñehũndi jyve arykai ko yvy ĩãrẽ’õre amavasu ourã. 7 Hareka ã’ẽ, hokava ñeeteiva Ñandeja rupii, ara hareka yvy ã’ẽva natuha tata pevarã pirĩmbivacheva arape, hareka kuaretare mbai porãmba japo’iare ohundi verã. 8 Tẽvã shyryvyre ahaihuva, avy pyndysarehe kova: Ñandeja pevarã, pente ara 1000 ãño rãĩmishu hai, hãrã 1000 ãño pente ara rãĩmijyshu. 9 Ha’ẽã rãnga Ñandeja potai kỹỹ’ẽva japo verã hai hei vekua, ã’ãmore pya mbijetahea rãĩmi, koñeĩ pyny‘ãrõpeveĩ’ẽ, shara hai potãã mbava manoshi, koñeĩ pota opaiteva oujy Tũpa kyty. 10 Jesucristo ara oujy verãpe manarõ’ia rãĩmipo pynturã ^{▼▼Pynturã Kova ñee mba’ety arykai mbypara vekuapy.} oujykui. Arare opapo kañykui hy’apuvasua mbytepe hareka maĩnungare opapo oke. 11 Kyrãpo opa mba’e õñehundirã, marã’ĩrãra pikoãte tykove kyambape hareka Tũpa potava rãĩmi? 12 Pyhãrõ hareka pyndypyavive pipota tyvãhẽ Tũpa jy’ara. Hokava arape, ara vate’õ õñehundipo tatape hareka opa mbai vate arare’õre opapo shyryry tatape. 13 Ñande rãnga ñahãrõ pente ara hareka yvy py’ahuva. Tũpa hei vekua meẽ verã. Haipe opa mbai haikavipo hareka hekopekavi. 14 Hãme shyryvyre ahaihuva, pyhãrõteripeĩ kova mbai jehu verãrã, pyrẽĩkatu pindijupe pyavapype, tykove kyambape hareka mbaimba mbojaharei pyndyrehevape. 15 Pynymanduahe, ñyhãrõkuaa Ñandeja ryheva ñandyraha ñymondojepeva kyty, jahaihuva ñandyryvy Pablo mbypara vekua rãĩmi, ãrãndu Tũpa meẽshuva rupii. 16 Kyrã opaite kuatia mbypara vekuape heihe, hai paũpe ĩme’ẽ javai jaikuakavi verãpe, mbaimba kuavare hareka jyrojakuepe kangyvare mbivavy. Kyrãĩ japojy reta ĩrũ Mbyparaha vekuare, hãme oupokui opa ohũndi verãre. 17 Hãme rãnga shyryvyre ahaihuva, opama pikuaa kova mbaire, pingareko pindijehe avy heko porãmbare pynymbytavykui hareka pirojakuepe haikavipeĩva pypoi pirojahekui Tũpa. 18 Haikavivepo, pupuãve peho Jesús jyhaihukuepy hareka pikuave pyraha Ñandejape, Ñanymondojepeva Jesucristo. Japyraheshu Jesucristo ã’ẽ hareka opa arape! Amén.