2 Thessalonians 1
Ñymarãndu
1Ore Pablo, Silvano hareka Timoteo mondohakape marãndu tũpao Tesalonicape’õre, ñymypenteheva Tũpa hareka Ñandeja Jesucristo. 2Airureshu Tũpa Teru hareka Ñandeja Jesucristo tymeẽpe jyhaihukue hareka pyavapy.Tũpa jahepo pyryrehe Cristo oujymarã
3Shyryvyre, opa arañoĩpo ajetekue ñameẽshu Tũpa pyndyrehe, kyrãñoĩpo jaiko, shara pee pirojave pehohe Tũpa, hareka pepenteĩ jyhaihukuepy pijyhahaihuve peho. 4Hãrã ore jyve jyrojaha pyndyrehe opaite yngava tũpao Tũpa ryhevape, ñyhãrõkua ryheve hareka pirojakue pyheshaka opaite pyhasa pynymoñahava mbyteipi hareka jyhasa’asyipi. 5Kova heshaka Tũpa hekopekavi pirĩmbivachekava, hãrã hai hẽno icheñoĩ verã huvisharã’õpe, ã’ẽ hai rehe hasa’asyñynoĩ. 6Tũpa heko kavi, hareka jahepohekui pynymbyhasa‘asyka’iare, 7hareka pee pyhasa’asypeĩva, ore rãĩmipo me’ẽã jyvepe putuu. Kova ikopokui Ñandeja Jesús iñandukama tata ryheve vate araivirã, jokuevare mbaikatuva hãndi, 8jahehe verã Tũpa kuaamba retape hareka Ñee Kavivape’õ japomba Ñandeja Jesús ryheva. 9Haire jaheapohekui opa õñehundi verãpe. Mombohapo mbyry Ñandeja ẽvãivi, hĩmbipekue hareka ñymbaikatukueivi, 10Ñandeja oujymarã hokava ara hai ña’ãpovare õmombaivasu verã hareka mbyrymaĩhe verã opaite jyrojaheare. Shara pee pyroja ore mbe’uhapeva. 11Hãme rãnga opa ara jururehañoĩ pyndyrehe, jururehashu Tũpa piniñonorã hai rupii pynyrẽno verã hareka ñymbai katu rupii opa iko verã pee pipotava hareka opaite jyrojakue rupii japohava. 12Kyrãva rupiipo pee pemombaishu Ñandeja Jesús hareka hai penemombaipo jyve, Tũpa jyhaihukue rupii hareka Ñandeja Jesucristo.
Copyright information for
TpjSC