2Th 2 | TpjSC | STEP | Shyryvyre, Ñandeja Jesucristo oujy verã rehe, hareka ñaimbaty hãndi verã, jururehape,

2 Thessalonians 2

Kuareta heko porãmbava

1 Shyryvyre, Ñandeja Jesucristo oujy verã rehe, hareka ñaimbaty hãndi verã, jururehape, 2 avy javaimbavape yngai pyndypya pimbijetakui, avy mbava pyrojakui Ñandeja Jesús oujy verã ara vãhemava mbeu’ia. Japupe heiva Espiritu heishuva hokava, maĩrã hoka oreteiva pyrỹmbo’ehama ihea maĩrã kuatiape. 3 Avy pyma’ẽĩhe mbava pynymbytavy, shara tynondepo vãhẽkui ara Tũpa ñymbyvaisho ouheare hareka ijeshakapojykui kuareta heko porãmba, jyvare pyryrehe verã. 4 Hokava kuareta ñymbyvaishopohe Tũpa hee rahavare maĩrã pota omomba’eha hareka pyhyrõpo Tũpa jytũpaore hareka Tũpa rãĩmipo ijapo. 5 Pynymanduahekui aijetamahepeva kova ryheva ãĩteri penendierã. 6 Hãrã ã’ẽ pikuama mbaivara jocha’ẽshu hokava kuareta heko porãmba’ia, potããteri jy’arape kavi ijeshakarã. 7 Shara ãñete ñemiãpeĩ heko porãmba’ia mymba‘apokama’ẽ ñymbaikatukue; koñeĩ hãrõ syryshi verã mbyteivi jocha’õ. 8 Hãma heshahapokui hokava heko porãmba’ia, Tẽvã Ñandeja Jesús jyvarepohekui putũhẽi juruivi mondoherã hareka opapo hĩmbipekuepy jyvarehe oujyvape. 9 Hokava heko porãmba’ia oupo Satanás mboryshurã rupii. Oupo tivisha ñymbaikatupe, mbai heshaha verã hareka mbai kavi heshaha verã añetemba ryheve, 10 hareka heta porãmba vekua rupiipo pyrỹmbytavy jaheahe verãpe shara ñateỹ myvãhẽ reta jyhaihu añeteva hareka kyrã ohojepe verãre. 11 Hãrã Tũpa mboushu reta kova mbai katukuepe pyrỹmbytavy’ia hetava roja verãre mbai japuva. 12 Kyrãpo jaheahekui opaite mbai añeteva rojambaare, tẽvã koñeĩ mbai porãmbape vy’a jyre.

Cristo jyrojaheare japo vẽrã

13 Tẽvã ñameẽñoĩposhu Tũpa ñandyvy’akue pyndyrehe jyve, shyryvyre Ñandeja haihuvare, shara Tũpa tynonde pynypyhỹrõ pehojepe verã, Espiritu rupii pinimbijiche Tũpa pevarã hareka añeteva pyroja rupii. 14 Ha’ẽrã kova Tũpa pynyrẽno Ñee Kaviva rupii ñande ñambeuva, ñaĩ verã jyve Ñandeja Jesucristo ñymbaikatukue hareka hĩmbipekuepe. 15 Hãrã shyryvyre, pyrãtape peĩhe Tũpa hareka avy pyndysarehe apyrỹmboihe vekua, ñee rupii maĩrã mbyparahava rupii, myvãhẽhapeva. 16 Hãrã Ñandeja Jesucristo hareka Tũpa pya kavi rupii hai ñandyraihu hareka meẽ ñande pyavapy japymbaa hareka ñyhãrõkavi, 17 tymeẽpe kyrẽ’ỹ hareka pyrãta, pere hareka pijapo verã haikaviva.