2 Thessalonians 3

Pablo jurure ñymbo’eahe verã

1Koñemahea, shyryvyre pirurejyve yryrehe, Ñandeja Jesús ĩñee narẽã tymyvãhẽha oparupi, hareka kuaretare tyroja hãrã tijapo, pee pijapova rãĩmi. 2Pirure jyve, Tũpa ñyngareko yryreheshi verã kuaretare heko porãmbaivi hareka porãmba japo verãĩ ñaka poryva, shara opaitevãã jyroja reta. 3Tẽvã Ñandeja hekokavi, hai ñyngareko pyndyrehe verã opaite mbai porãmbaivi, shara hai opañoĩpo japo heiva. 4Ore jyrojaha Ñandejare, pee pijapova hareka pijapoñoĩ peho verã pynymbo’ehaheva. 5Ñandeja Jesús tikuaaka kavivepe pyhaihu verã yngare, Tũpa ñandyraihuva rãĩmi hareka tymeẽpe jyhaihu jyhasa’asy opa pijepykavihe verã.

Opaiteva ñamba’apoñoĩpo

6Shyryvyre, Ñandeja Jesucristo heepe jururehape pysyryshi verã opaite ñandyryvy ñateỹ mba’apovare hareka potamba ikova pynymbo’eaheva rãĩmi. 7Pee rãnga pikuaa kavi marãrapo piko, pota ore ikohava rãĩmi pikorã; penteã ikohareii pynymbyteipi, 8hareka mbavãã ho’uhareiishi pãhã mbyhepyambape. Kyrãtẽ verã, ara hareka pyharekue mba’apoha putu’uhambape, potãã mbava mbyhepy yryreherã. 9Ajemaĩ ẽẽte ore jurureharã yrỹmboryñoĩpi verã, tẽvã mba’apohaĩ ho’uava vãhẽhashu verã, kyrã heshahakape, ikohava rãĩmi piko verã jyve. 10Hãma ikoha’i penendierã kova kyrãmaĩ he’ihape: Mba’apombava ha’eãpo jyve karu verã. 11Tẽvã ore kuaaha jyve pee pikova ĩme’ẽ a’ãmore ñatẽy mba’apova, koñeĩ mbaimba vekuaĩ iko jyrehe. 12Hokava retape mondoha hareka he’ihashu Ñandeja Jesucristo heepe tymba’apove reta vãhẽshu verãre hou verã. 13Tẽvã pee shyryvyre, avy piñymykangy pijapo verã mbai haikaviva. 14Ĩme’ẽ ñatẽy japova ore yrykuatiape’õrã, pyheshaheva pypyvẽẽshu mbavara hareka avy piko hãndi, ñymymarãka verã. 15Tẽvã avy pota pimbyvaishohe, koñeĩ pymbarakuashu pente ñandyryvy rãĩmi.

Ñymarãndu opahea

16Hareka Teja pyavapyva ryheva, tymeẽpe pyavapy opa hendaipi hareka opa ara. Ñandeja tõĩ penendie opa ara. 17She, Pablo, ambyparape shepopetei kova marãndu hareka ñee. Kyrã añonoñoĩva rãĩmi ambypararã opaite kuatiape, kyrã ambypara. 18Opaiteva Ñandeja Jesucristo tiñohẽ pyndyrehe mbai kavikue. Amén.
Copyright information for TpjSC