2Ti 2 | TpjSC | STEP | Nde shyray, ñymypyrãta jyhaihu ojaimbava ĩmejareva Jesucristo rupii.

2 Timothy 2

Syndaro Jesucristo ryheva

1 Nde shyray, ñymypyrãta jyhaihu ojaimbava ĩmejareva Jesucristo rupii. 2 Hãrã nde rỹhendu shyhevi hetavare hỹnonde, mbe’uka jyveshu kuaretare ryrojakatuva, katu mboishu verã jyve yngava hapishare. 3 Nde, Jesucristo ñysyndaro kavindeva rãĩmi, rẽĩñoĩpo jyve ryhasa’asy verã. 4 Mba’ety syndarorã’ia yngava maĩnunga japojy verã, shara juhuvisha heivaĩpo japoshu. 5 Kyrãi jyve ñanivape jykarera’iare, hekope kaviã ñanirã hipityãpo maĩnunga me’ẽã verã. 6 Koohupi mba’apo katuvaĩpo areã hipity ñotyva ia. 7 Ndypya mbijetahe ko haindeva, shara Ñandeja meẽpo nde ãrãndu opa mbai rikuaa verã. 8 Nymanduahe Jesucristo, manovare paũvi puãjy vekua hareka David ñymoña hãndi vekua, kyrã rãnga hei ñee kavi ambeu aiva, 9 hãrã Ñee Kaviva reheĩ heta ahasa’asy hareka shymbyperesoha, pente purukava rãĩmi. Tẽvã Tũpa ĩñee katuã mbyperesoa hai. 10 Hãrã Tũpa pyhỹrõvare reheĩ opa mbai ahasa’aĩ, haire hipity verã jyve ñymondojepe hareka hĩmbipeva ĩmejareva opa ara Jesucristo rehe. 11 Ãñete rãnga hai kova ñee: Ñamano hãndirã, jaikopo hãndikui, 12 jyhasa’asykue jahasa kuaarã, ñaĩmepo hãndi hai ẽvãpe, ñañomi jareshurã hai ñanomipo jyve, 13 ajema ñande jairojambape jaiko, hai japuã hai, shara hai katuã ha’eĩ iñomi.

Tũpape mba‘apo’ia

14 Mymandu’akajyhe reta kova, hareka ereshu reta Tũpa hỹnonde ỹteñoma ñeereiire ijaka verãre, shara myporãã hokava henduvare pevarã. 15 Eñehãã katu Tũpa hỹnonde rypyta kavimavape, pente mba‘apo’ia mba’etyre notire verã hareka ñee añeteva hekope kavi mbeuva. 16 Avy jasakahe ñe’ẽkuerei, shara kyrã ijeta’iare porã’ãĩtevepo jyraha jyre, 17 hãrã haire pyrỹmboihea ñimbitivishapo oho mbairasy ñandyretepy karuva rãĩmi. Kyrã japo reta Himeneo hareka Fileto, 18 yngaipii jyrahashi añeteva. Haire hei ñande jakuerajyape hasamava, hareka kyrãvape a’ãmore jyrojakuepe mykangyshu. 19 Tẽvã Tũpa ñono pente jypyrã tantava, ĩmere pente ñee pyrãtava heiva: “Ñandeja opa kuaa hai ña’ãpova”; hareka “Opaite Ñandeja hee hẽno’iare, opa tijyheja tykove jyvachembavaivi”. 20 Pente oo tivisha’õ ipe, ha’eã ẽẽva maĩnunga ita verava ijuva hareka ita verava tĩĩva, ĩme’ẽ jyve maĩnunga yvyraivi hareka tujuivi japohava, pentevare hai mbai haikavivapẽĩ poryhava, hareka ĩrũre hai ĩmerãẽva’õpeĩ poryhava. 21 Hãma ĩme’ẽ ñymyngyamba’õrã, ikoposhi pente timbipory haikavivapeĩ poryhava, tykove mbijicheava Ñandeja pevarã hareka Hai porypo japo verã heta mbai haikavi. 22 Syryshi porãmba kunumire japoseva hareka heka teko jyvache, jyrojakue, jyhaihukue hareka pyavapy, hãndi opaite pya kyamba ryheve Ñandeja õmombai vasu’iare. 23 Avy jasakahe ñe’ẽkuereire hareka mbaimba vekua, nde rikuama hokava veru ñyrãrõ. 24 Hãrã pente Ñandeja jokuerea katuãpo iko ñyrãrõpe, opava retapo pya kavi hãndi, katupo pyrỹmboi hareka hãrõ kuaapo, 25 kyrã, pya kavi ryhevepo rỹmbarakuaa añeteva ñymbyvaisho’iheare, hãrõ oujy verãre Tũpa kyty hareka kuaa verã añeteva, 26 kyrã sareko verãre hareka ñemijyshi verãre Ãña mykatyrõ’õ pysy verã, hareka hai pota japovaĩma japohe verãre.