2Ti 3 | TpjSC | STEP | Aipota rikuaa jyve kova: Ara opa serimarã, hetapo ou mbai pohyiteveva.

2 Timothy 3

Marãrapokui opa mbai ara opaserimarã

1 Aipota rikuaa jyve kova: Ara opa serimarã, hetapo ou mbai pohyiteveva. 2 Imepo’ẽ kuaretare ha’ei ijaihuva, kyrypoti haihuva, jyrojapo ijehe hareka ijetapareipo ijehe. Ijeta porããpohe Tũpa, tuure heishua japoveãmaposhu, ñee kavi henduseveãmapo hareka kuaaseveãpo Tũpaivi, 3 pyryraihuãpo, pyryparekoãpo, ijeta porããpohe yngavare, ijochaveãmapo reta, hetapo’ẽ jyvavarehea hapisha, ñymbyvaishopohe mbai haikavivare. 4 Mbytavypo hapishare, pya mbijetamba ryheve mbai japo, jyroja ijehe, Tũpa heiva japotẽ verã, ha’eire potavaĩ japove reta. 5 Ñymbyhekopo tykove mbijicheava Tũpa pevarã rãĩmi, tẽvã ñomipo jyre Tũpa ñymbaikatukue. Avy jihia’i kuareta kyrã’iare. 6 Kyrãva reta rãnga mbytavyshu taupe kangyva porãmbape’iare, katumba ijijokova mbai porãmbaivi. 7 Hokava taupere opa kuaa raha jyve, tẽvã mapeã mondo kuaa kavi reta añeteva. 8 Kyrã jyve Janes hareka Jambres ñymbyvaisho jyrehe reta Moisés, hareka kova kuaretare ñymbyvaishohe añetevare. Hai kuaretare kyavaĩ ñakapereva, jyrojakuepe porãmba heshahava. 9 Tẽvã haire mbyryãpo vãhẽ, shara opaite ko yvy’ĩãrẽ kuaapomondo hai mbaimba kuavare, jehushuva rãĩmi kova kuaretare ñymbyvaisho vekua Moisés.

Pablo ĩñee opaheape Timoteo pevarã

10 Tẽvã nde Timoteo, rikuakavi apyrỹmboihea, aikova rãĩmi, mbai pota ajapova rãĩmi, airojakue, jyhaihukue hareka ñyhãrõkuaa, pyrãtãkue ajepyhe verã porãmba vekua, 11 shymoñaha’irã hareka jyhasa’asykuere. Rikuaa iko shyrehe vekua Antioquiape, Iconiope, hareka Listrape. Tẽvã opa kova mbaivi Ñandeja shynohẽjy. 12 Kyrãpo moñahare jyvekui opaite pota raha ijeheva tykove pyryparekova Cristo Jesús rehe. 13 Tẽvã kuaretare heko poshyva hareka pyrymbytavy’iare porã’ãĩtevepo jyraha reta, pyrỹmbytavy hareka yngavare mbytavyñoĩshu. 14 Tẽvã nde opa mbaipepo rĩmypyrãta rikua vekuapy hareka nimbirojaka vekua, hãrã rikua kavirẽĩ mbavaivira opa rikuaa. 15 Manduahe nyndei ryheve rikuaa Tũpa ĩñee, nymboi verã hareka ndyraha verã ñymondojepeva kyty Jesucristo rirojaherã. 16 Opaite Mbyparahava hai Tũpa rupii me’ẽhava hareka haikavi poryha pyrỹmbo’eapy verã, ñyngãta, ñonoãkavijy verã hareka pyrỹmbo’ehapy marãrapo hekope kavi jaiko. 17 Kyrã kuimbai Tũpa ryheva ñy’arãndu verã hareka hekopekavi mbai haikavivaĩ japo verã.