2Ti 4 | TpjSC | STEP | She aheja nde Tũpa hareka Cristo Jesús hỹnonde, oujy verã mburuvisha vasu rãĩmi jahehe verã hykoveteri’iare hareka manoma vekuare,

2 Timothy 4

1 She aheja nde Tũpa hareka Cristo Jesús hỹnonde, oujy verã mburuvisha vasu rãĩmi jahehe verã hykoveteri’iare hareka manoma vekuare, 2 ñimiñeepy Tũpa ĩñee hareka ereshu tijapo reta, javendeape maĩrã javembandevape; ñono kavi, ñyngãta hareka mykyrẽy opaite ñyharõkuaa ryheve, hareka rymboivape. 3 Shara vãhẽpokui ara kuaretare henduseveãma verã pyrymbo’eaheva mambaimbava, koñeĩ ha’eire potava rãĩmi, haire hekapo ynga pyrỹmboi’ia mboi verã ha’eire kyrẽy henduva. 4 Henduãpokui pyrỹmbo’eahea añeteva hareka ñeereiva tãkaivi nohẽã vekuãĩpo hẽnduve reta. 5 Tẽvã nde ryrekoñoĩpo mbai haikaviva, hasakuaa jyhasa’asyre, mbeuñoĩ ñee haikaviva, opakavi japo rijapova. 6 Vãhẽserima Tũpape shyme’ẽãrã shukaha verã hareka vãhẽmapo ara amano verãpe. 7 She ñyrãrõpe ãĩrãrõ kavi, japypeve ãñani hareka mapeã apoi airojahe Tũpa. 8 Ã’ẽ shy‘ãrõma’ẽ korona ñee ahenduiterã meẽshe verã hokava arape Ñandeja, Huvisha heko kaviva. Hareka ha’eã sheĩĩ meẽshe verã, opaite jyhaihu ryheve oujy verãpe hãrõ’õ reta jyve.

Ñee ñande pevarã

9 Eñehãã narẽãmi ei shyreshajykui, 10 shara Demas shyrejama, haihuite opa mbai ko yvy‘ĩãrẽ’õ rehe hareka oho Tesalonicape. Cresente oho hai Galaciape hareka Tito oho Dalmaciape. 11 Koñeĩ Lukas ĩme’ẽ shendie. Heka Marko hareka ei hãndikui, shara hai katu shymborykui mba’apope. 12 Tíquiko amondo hai Éfesope. 13 Reirã, erushekui ponsho aheja vekua Tróaspe, Carpo hentape; harekajy kuatiare, tynondeite’ẽ vakapire shepope ambypara vekua. 14 Alejandro, hai mba’apova hierore, heta mbai porãmba japo shyrehe; Ñandeja mbyhekoviapokui hai japo vekua rehe. 15 Ñyngareko katushi hai, shara ñymbyvaisho jyrehe ñapyrỹmboihe vekua. 16 Tynondeite aijeta shijehe huvishare hỹnonderã, mba’ety shichere ẽvã; opaite shyreja reta. Airureshu Tũpa potambaa jahehe verã hokava rehe. 17 Tẽvã Ñandeja shichere ẽẽ hai, hãrã meẽshe pyrãtakue ambeu verã Ñeekavi hareka kyrã japo opaite haimbaa israelitavare hendu verã. Kyrã Ñandeja shymondojepeshi java jurukueivi. 18 Ñandeja shynohẽpokui porãmbavaivi hareka shymondojepepokui shyrahama verã mburuvisharã’õpe. Hai pevarã pyrãtakue opaite arapeve. Amén.

Ñymarãndu opahea

19 Marãndushukui Priscila, Aquila, hareka Onesíforo ñymoña hãndiare. 20 Erasto pyta hai Corintope, hareka Trófimo ñymbairasy’irã aheja Miletope. 21 Eñehãã katu eikui ndei vãhẽ ara ro’yrã. Nymymarãndu reta Eubulo, Pudente, Lino, Claudia hareka opaite Cristo jyrojaheare. 22 Ñandeja Jesucristo tõĩ nendie. Tũpa jyhaihukue toĩ penendie. Amén.