Act 1 | TpjSC | STEP | Kuatia tynonde ambypara nde Teofilo, aijetahe opaite mbai Jesús õñepyrõ japova hareka pyrỹmboihe vekua,

Acts 1

Jesús mbeu Espiritu Santo ou verã

1 Kuatia tynonde ambypara nde Teofilo, aijetahe opaite mbai Jesús õñepyrõ japova hareka pyrỹmboihe vekua, 2 hupihapeve vate arapy, ohojyma potarã, Espiritu Santo rupii mbeushu mbaivara japopo reta Apostol hai pyhyrõ vekuare. 3 Manorã hareka kuerajymarã, Jesús ijeshakajyshu reta, heshaka kavi verã hai kuerajymava manovare mbyteivi, 40 ara kavi ikojy hãndi reta, ijetaheshu reta Tũpa vapyape ryheva ara vate’õpe. 4 Ikoteri jyre hãndi Apostol retarã, Jesús heishu reta, potambaa õhẽ verãre Jerusalenvi. Heishu reta: Pyhãrõ tikorãni Sheru ĩñee meẽ vekua, She ambeupeva rãĩmi. 5 Ãñete rãnga Juan yypeĩ pyrymyngarai tẽvã pee piñymyngaraipokui Espiritu Santope.

Jesús hupihajy vate arapy

6 Haipe Jesús ẽẽ hãndiare pyrãndushu reta: Sheja, rũmupũãjyrapokui huvisharã’õ tenta Israel ko arape? 7 Jesús heishu reta: Pee katuã pikuaa mbai araperapo hareka mãrãrapo japo, koñeĩ Sheru ha’ĩĩ ĩmere mbaikatu japo verã. 8 Tẽvã Espiritu Santo vejymapyrerã ĩmepopyre mbaikatu, hãrã pẽhẽpo shymbeupi Jerusalenpe, Judeape, Samariape hareka yvy japyapevepo mbe’uha ko shiñee. 9 Hokava opama heirã Jesús, mãĩ ñynoĩheapypeĩ hupiha vate arapy, haipe ãvãpyntu opa jasoirã hãrã heshaveã reta. 10 Hãrã haire mãĩ kavijyrehe mãrãra Jesús hupihajy vate, haipe ijeshakashu reta mokue kuimbai mondea tĩĩvare, 11 heishu reta: Pee Galileavare mãrã’ĩrãra pymãĩpi vate arare? Kova Jesús rãnga hupihajyma vate arapy, pee pyhesha ohojyva rãĩmi katĩĩpo pente arape oujykui.

Judas hendakuepe ñonohajy Matias

12 Haivi oujy reta Jerusalenpe ñana Olivo he’iashuvaivi pytashia 1 kilometro hoka tentaivi, haipeveĩ Israelitare katu oho putu’uava jy’ara ẽrã. 13 Vãhẽ jyraha Jerusalenperã jupi reta oo vate’õpe, iko jyreape, Pedro, Juan, Santiago, Andres, Felipe, Tomas, Bartolome, Mateo, Santiago Alfeo tay, Simón Selote hareka Judas Santiago tay. 14 Haipe haire ñymbaty ñõĩjyre jurure verãre mbovy taupere hãndi, Maria, Jesús ishy hareka tyvyre. 15 Hokava arape Pedro ñymboyrã ijeta 120 jyrojavare paũpe, hãrã hei: 16 Shyryvyre, ikoñoĩpo mbypara vekua Espiritu Santo heiheva rãĩmi Judas, David heiva rupii, haiteiva tynonde oho verã Jesús pysyka verã. 17 Judas rãnga hai jyve ñanymbytepe’i vekua hareka icheva jyve ko jajapovape. 18 Tẽvã hai oho ova yvy hoka kyrypoti mbai porãmba japo vekua mbyhepyapyshua hãrã vateivi oa ñãkã rokua yvyrerã, mbyteipi hye sororã opa ñymomohẽ ñymamba’ekuere. ^{▼▼Mahẽ Mateo 27:5} 19 Opaite Jerusalenpe kuama retarã hãrã akua yvy mbyhee reta Aceldama Israelitare ĩñeepe heiva: “Ñu tuvy rẽnda”. 20 Shara kuatia Salmope mbyparahava hei: “Hoore tikoshi yvy ikoambaipi, hareka avy mbava tikopy”. Heijy: “Yngava tõĩjy hendakuepe”. 21 Ĩmejare kope kuimbaire ñanimi‘ĩrũñoĩ’ia opa ara Ñandeja Jesús ikoteri’i ñanymbyteipirã. 22 Juan myngarairãvãĩ hupiha vate arapy. Kyrãvã rãnga katu iche jyve ñanymbytepe, mbeu ñanendie verã Jesús puãjy manovare mbyteivi. 23 Haipe ñono reta mokue kuimbai; José Barsabas he’iashua, mbyheavajy Justo, hareka Matias. 24 Haipe jurure retarã hei: “Sheja nde opa rikuaa typyare. Heshaka ore mbavara ko mokue’õre rypyhyrõva, 25 ikoshi verã Apostol Judas hendakuepe, shara hai yryrejama mbai porãmba japorã hareka ohoma oho verãpe”. 26 Haipe mombo reta jyvareahearã hãrã Matias oahe pyhyrõã verã. Haivi pyta hãndi reta 11 ia Apostolre.