Acts 12
Jacobo mano hareka Pedro raha mbyperesoha
1Hoka arape mburuvisha vasu Herodes õñepyrõ moñakashu a’ãmo tũpaope õre ryheva. 2Hãrã mondo jukaka Jacobo kyse pukuvape, Juan tyvy, 3heshamahe Judiore haikavijyveshu hokavarã, pysykajy Pedro. Kova jehu aretepe, pãhã jylevaduramba ho’uava arape. 4Hãrã Herodes pysykama Pedrorã, mĩje karcepe hãrã mĩngarekokahe urũndy jaty’õ syndarore urũndy syndaro pepenteĩ’ẽva, pya mbijetahe Pascua hasamãrã nohẽka verã tenta hỹnonde. 5Hãrã Pedro karcepe teri’ẽ ñyngarekoha’ẽheape, tũpaope ẽvãre jurure pevẽĩ ñynoĩhe Tũpape.Tũpa nohẽshu Pedro karselvi
6Haivi Herodes nohẽjyvyĩma’ẽ verã pyharepe meẽ verã henta’õre ipope, Pedro oche’ẽ mokue’õ syndarore mbytepe, tãnta pokuahavape mokue kadenape, hareka ĩrũ syndarore katoape õnchepe ñyngareko’ẽhea karcel. 7Sapy’aĩ ijeshaka Ñandeja jokueva hareka hĩmbipekue opa mykõĩ’ipe pyrỹmbyperesohaseape. Tũpa jokueva Pedro pokoherã, mombarã hei: Narẽã pũ’ã! Hãrã haipe kadenare opa oashi Pedro papyivi. 8Hãrã Tũpa jokueva heishu: Jokua ndukua hareka mondejy ndypasa. Opa kyrãã japorã Tũpa jokueva heijyshu: Mombo ndijehe rijasoiva hareka ei shaykue. 9Hãrã Pedro oho Tũpa jokueva haykue, kuaamba ãñetera maĩrã ha’ẽara Tũpa jokueva. Shara mõãte jypaihupẽĩ heshava. 10Tẽvã hasareta tynonde’õ hareka mokuehea, ñyngareko ẽvãĩpirã vãhẽ jyraha õche hiero jepei’õ pe’ahava tenta kyty, hareka opaite õche ijuhuvima jypea. Õhe reta ãrẽ’ãĩte hareka vataha’õipi penteva hasamarã, haipe Tũpa jokueva mã’ẽĩmahe Pedro ha’ẽĩ. 11Pedro kuaama mondo ikovarã hei: Ã’ẽ aikuama ãñete Ñandeja mbou jokueva shyreka hareka shynohẽjy verã Herodes ipoivi, hareka opa mbai Judiore japotẽ shyrehe verã. 12Kova kuama mondo Pedrorã, oho Maria hentape, Juan ishy mbyheeava jyve Marcos, haipe heta kuareta ñymbaty’õre jurure ñynõĩ Tũpape. 13Haivi pe kyty’õ õnche nunuparã, õhẽ pente kuñatãĩ Rode he’iashua hesha verã mbavara. 14Tẽvã haipe Pedro ĩñee kuarã vy’aiterã õche ohote peava; haivĩ jyrovarã ñanijy oho oo’ipe mbeu verã Pedro õchepe’ẽva. 15Hãrã opaite oo ipe ẽvãre heishu: Rikuakuãrari! Tẽvã hai heijyvyĩ haiñoĩva. Haireta katy heijyvyĩ reta: Ha’ẽã rãnga ãmo; Tũpa jokueva rãnga. 16Haipe Pedro ĩmeĩ nunupa teri’ẽ õche, peamã retarã opapavẽĩ hesharã mbyrymaĩ reta. 17Tẽvã Pedro ipopei myha’ãnga heishu reta jasaka verãre, haivi mbeushu reta marãra Ñandeja nohẽjy mbyperesoavaivi, hãrã heishu reta: Pikuaaka jyveshu Jacobo hareka opaite ñandyryvy ñandyryhevare. Hãrã õhẽ hareka oho ynga tentaipi. 18Koĩma ourã, syndarore opa ikorai reta, kuãã mbaivara iko hareka mbaivara ikohe Pedro. 19Hãrã Herodes mondo hekakashu Pedro, tẽvã heshããma retarã, pyrãndujy opaite ñyngarekohe vekuare hareka haivi jukakashu reta. Haivi Herodes õhẽ Judeaivirã oho pyta Cesareape.Herodes manorã vẽkua
20Herodes poshyshu opaite kuareta Tirope õre hareka Sidon, tẽvã haire pente ñeepe ñynoĩ jyveru verã hai ẽvãpe, Hareka meẽreta kyrypoti Blastope ijeta kavihe verãre. Blasto hai huvisha vasu Herodes hentape mboryrea vate’õ, hãrã jurure reta ẽejy verã pya vapy, shara haire nohẽ reta hou verãre mburuvisha jy yvyivi. 21Herodes ñonoshu reta mbai araperapo ou reta hai ẽvãpe, hareka hokava arape monde mondehava mãshyava hãrã vapy’ẽ huvisha vasure vapysepyape ñimiñeeshu reta. 22Hãrã opaite kuaretare sapukerã hei: Ko ijeta’õ ha’ẽã kuareta, kova hai Tũpa! 23Haipevãĩ pente Tũpa jokueva mbypere, shara õmomba’ẽãshu Tũpa, hãrã Herodes hasorã mano. 24Tẽvã Ñanderu Tũpa ĩñee mbe’uhave rahaha hareka ñymbyhetave oho. 25Bernabé hareka Saulo opa japo verãrã, oujy reta Jerusalenvi hareka veru reta Juan, mbyheeava jyve Marcos.
Copyright information for
TpjSC