Acts 16

Timoteo mi’ĩrũ Pablo

1Pablo vãhẽ oho Derbe hareka Listraperã haipe hesha pente mbo’eharea, Timoteo he’iashua, pente taupe Judiova memby ko taupe jyrojava jyve Jesús Cristore, tẽvã tuu hai Greciape’õ. 2Jesure jyrojavare Listra hareka Iconiope’õre mandua kavihe Timoteo, 3hãrã Pablo pota Timoteo oho hãndi ohovaipi. Tẽvã tynonde pire chĩchĩkashi, potãã Judiova haipi’iare poshy ñynoĩrã, shara haire kuaa kavi tuu Greciape’õrã. 4Opaite tenta hasava retaipi, meẽ kuatia pente ñeepe Apostolre hareka tũpaope mĩñaka’iare Jerusalenpe’õre mbypara vekua, opaite kuaretare japo verã. 5Hãrã jyrojava tũpaope’õre, ñymỹpyrãta oho jyrojakuepe hareka opa ara ñymby hetave oho py’ahu jyrojavare.

Pablo hesape’ẽ pente kuimbai Macedoniape’õ

6Hasa jyraha reta Frigia hareka Galaciape, shara Espiritu Santo ñonoãshu reta mbeu verãre Tũpa ĩñee Asiape. 7Vãhẽma jyraha Misiaperã, pota jyraha jyre Bitiniape, tẽvã Jesús jy Espiritu ñonoãshu reta. 8Hãma hasa reta Misia jurirã, oho reta Troaspe. 9Haipe Pablo pyhare hesape’ẽ pente kuimbai Masedoniape’õ ñymbou’ẽ hareka jurureshu: “Ei Macedoniakyty, yrỹmboryvei”. 10Haivi Pablo heshama hesape’orã, opa ravẽi õĩã kavi ohoha verã Macedoniape, shara kuaaha kavi Tũpa ỹrỹrẽno haipe ohoa mbe’ua verã Ñee kavivarã. 11Hãma ohoha varkope Troasvirã, symyĩ ohoha Samotrociape, hãmã ĩrũ arajyape vãhẽhã ohoa Neapolispe. 12Haivi ohoajy Filipospe, hai tenta tynonde’õ Macedoniape. Haipe mbovy ara pytaha. 13Pente putu’uava jy’arape õhẽhãshi tenta vãsu ohoha yy syryva hyvache, moa haikavi jurureha’ẽ verãpe, vapyha ijetahashu taupere haipe ñymbaty’õre. 14Hãrã pente taupe Lidia he’iashua, tenta Tiatirape’õ mondeava pynta hũũva hepyva õvẽnde’õ Tũpa õmombai’ia, jasaka kavi’ẽhe Pablo ijeta’ẽrã, hãrã Ñandeja peashu pya jasaka kavihe verã Pablo hei’õva. 15Hai ñymyngaraima henta ĩrũre hãndirã, jurure’asy orerã hei: Ãñeteĩte pyroja she airojava Ñandejarerã, pekua pypytave shyrẽtape. Irĩmiñerã’i yryrahapeve hentape.

Pablo hareka Silas mbyperesoha

16Pente arape ohoha ñymbo’eharã, haipe heshaha pente kuñataĩ jokueha’reirea ñymbai kuaa’ia ñyvãĩtĩhã hãndi. Hai heta mbykyrypoti ijarãreare, ñymbai kuaa’irã. 17Kova kuñataĩ ou iripii hareka Pablo, sapuke: Kova kuimbai reta rãnga hai Tũpa vate õ jokueva, haire mbeupe ohojepeva hape. 18Hãrã heta ara kova japo’i. Pablo henduseveãma heivarã, jerepyrã heishu mbaiposhy taupe iko’ipya: She hai nde Jesucristo heepe, ẽhẽshi ko kuñataĩ! Hãrã haipevaĩ mbai porãmbava õhẽshi ko kuñataĩ. 19Kova kuñataĩ jokuereare heshama katuveamapo kyrypoti heky retarã, pysy reta Pablo hareka Silas, hãma raha huvishare hỹnonde, plazape. 20Haipe heishu reta huvishare pirĩmbivache’ia: Ko kuimbaire haitẽjyve Judavare, opa myporãã ñynoĩ ñanyrẽta, 21haire pyrỹmboihe jypykuava rãĩmi kuaahamba’oreva hareka ore Romavare porãã japoha verã. 22Haipema henta’ore ñymbyvaishohe reta, hareka huvishare heishu myndoroshi verãre mondeva hareka nupã verãre yvyrape. 23Hetama nupa retarã, raha mĩje reta pyrỹmbyperesoavape, hãma haipe’õ huvisha, heishu ñyngareko kavihe verãre. 24Hãma kyrãma he’iashurã, haipe ñyngareko’õ, raha huvakyty, ñonohẽ reta ipyre yvyra miñyvỹhava. 25Tẽvã pyhare mbytepe Pablo hareka Silas ñymboiñynoĩ retarã hareka pyraheshu reta Tũpa, haipe ĩrũ mbyperesoareare jasaka ñynoĩhe reta. 26Haivi sapy’ãĩ hỹnatu yvyryry hãrã opa my’õmy oo jypyre, õchere opa jypea hareka mbyperesoareare opa jerashi kadenare. 27Haipe sareko huvisha haipe ñyngareko’õrã, heshama õche opaiteva jypea ohorã, heky jykyse ijuka verã, shara hei pyape, mbyperesohavare opama ñemiva. 28Tẽvã Pablo sapukerã heishu: Avy japo ndijehe porãmbava! Opaĩ ĩmehã’ẽ kope! 29Haipe veruka pente sapepy verã, ñani oho oo hapype, opa ryryrã ĩñesu Pablo hareka Silas hỹnonde. 30Katoape raha retarã, haipe pyrãndushu: Karaire, mbaivarapo ajapo ahajepe verã? 31Haire heishu: Jyroja Ñandeja Jesucristore, hãrã reohojepe hareka jyve nyrẽtape’õre. 32Haire mbeushu Ñandeja ĩñee, hareka opaite hentape’õre. 33Hoka orapevãĩ pynturã, hai raha joheshi mbypereha vekuaipi, haipevãĩ hai hareka hentape’õre ñymyngaraika reta. 34Haivi raha hentape myngaru verãre, hareka vya henta ĩrũre hãndi, Tũpa jyrojamavehe retarã. 35Kõĩmarã huvisha pirĩmbivache’ia mondo syndaro ñyngareko’i pyryrehevare he’ikashu verã mbyperesoava ñyngareko’iheare juhuvisha: Opa mohẽjy hokava kuimbaireta. 36Haipema mbyperesoavare ñyngareko’ihea juhuvisha heishu Pablo: Huvisha pirĩmbivache’ia reta rãnga he’ika she apyrỹmohẽjy verã, hãrã katuma pypyavapy ryheve pehojy. 37Pablo heishu reta: Opavare hỹnonde rãnga ũrũnupãhã mãĩ kavimba yryrehevape hareka ỹrỹmbypereso reta Romavatẽ oreva. Hãmera ã’ẽ pota ñemĩapeĩ ỹrỹmondojy reta? Kyrãã rãngapo! Hairetateiva rãngapo ou ỹrỹnohẽjy verã. 38Haipema syndaro ñyngareko’i pyryrehevare ohojy mbeushu reta huvisha pirĩmbivache’iare, heishu Pablo hareka Silas Romava retãrã. Kova hendurã opa myngyje reta. 39Haipe ou heishu reta Pablo hareka Silas haire mbasyva japoheare. Haivi nohẽjy retarã jurureshu õhẽ verãre tentaivi. 40Õhẽma pyrỹmbyperesoha õĩvirã Pablo hareka Silas oho reta Lidia hentape, haivi Jesure jyrojavare heshamarã hareka opama mykyrẽyshu retarã, oho haivi.