Acts 17

Pablo mbeu Tũpa ĩñee tenta Tesalonicape

1Haima Pablo hareka Silas ohomarã, hasa reta Anfipolispi, hareka Apoloniaipi. Hãma vãhẽ oho Tesalonicape, haipe’ẽ Judiore ñymbatyseape. 2Pablo jypykuarã oho jyve Judiore ñymbatyseape, hãrã mbahapy putu’uava jy’arape, ijeta pohyheshu reta, kuatia mbyparahava poryvape. 3Mbeu kavishu reta Cristo manoñoĩ verãmba hareka kuerajyñoĩ verã. Heishu reta ko hai Jesús she ãmbeu’ãĩpea, haiñoĩ Mesia. 4Ĩmemba’ẽ haire rojavare, hãrã ñimi’ĩrũmbahe reta Pablo hareka Silas, hetamba’ẽ jyve griegovare rojavare, Tũpa õmombai’iare, hareka hetamba jyve taupe mbyvetehavare tentape. 5Tẽvã kova Judiore jyrojambavare heshatãã reta, hãrã õñepyrõ mbaty reta kuimbaire haipi pehupi ikoreii’iare, opa momõhe verã hoka tentape’ẽvã. Hãrã vãhẽ jyraha Jason hentape heka jyre Pablo hareka Silas, nohẽrã meẽshu verã kuaretare. 6Hãma vahẽamashu reta Pablo hareka Silasrã, mbytyryry raha reta Jason hareka a’ãmo jyrojavare, hãrã raha reta huvishare hỹnonde, sapuke jyre: Ko kuimbaire pyrymangãtumba’iare ko yvy jerekue, ã’ẽ ouma jyve kope, 7hareka Jason myvãhẽshu reta hentape! Haire ñymbyvaishohe Romape’õ huvisha vasu heiva japoha verã, hei reta ẽjya yngava huvisha vasu, Jesús he’iashua! 8Henduma reta kovarã, kuaretare tentape’õre hareka huvishare opa poshy hareka hẽndaveã reta. 9Tẽvã Jason hareka a’ãmo jyrojavare mbyhepyshu, hãrã opa poiashi reta.

Pablo hareka Silas vãhẽ Bereape.

10Pyntumarã Jesús jyrojaheare ãrẽ’ãĩte mondo reta Pablo hareka Silas Barea kyty. Vãhẽma jyraharã oho reta Judiore ñymbatyseape. 11Kovare pya kavitevembashi Tesalonicape’iare, vy’ape mỹvãhẽ reta ñee, opa ara ñymbo’eka kavihe reta Mbyparaha vekua, kuaa verãre ãñetera mbe‘uha’ẽshuare. 12Hãrã heta’ẽ rojava hareka griegovare, kuimbai hareka taupere. Kova kuaretare hai vateve’õ tentape, opaiteva taupe hareka kuimbaire. 13Judio Tesalonicape’iare kuaama Pablo hareka Silas mbeu jyre Tũpa ĩñee Bereaperã, oho jyve reta haipe opa momohẽ kuareta heta vekua. 14Hãrã Jesús jyrojaheare ỹrẽ’ãĩte mondo reta Pablo yyvasu hymbey kyty, tẽvã Silas hareka Timoteo pyta reta Bereape. 15Hãma Pablo mĩ’ĩrũ rahavare oho hãndi reta tenta Atenaspeve. Haivi oujy reta veru ñee Silas hareka Timoteo pevarã, pota areãmĩte ñymbaty hãndi verãre.

Pablo mbeu Tũpa ĩñee Atenaspe

16Pablo hãrõ ñynoĩ Atenaspe Silas hareka Timoteo, mbyvy’ã hesha hoka tenta tynyhẽite tũpare rã’ãngakuerã. 17Hãrã ijeta hãndi reta Judiore ñymbatyseape, Judiore hareka opaite Tũpare jyrojavare. Hãrã opa ara ijeta jyve hãndi plazape ñymbaty’õre. 18Hãma epicureo pyrỹmboi’iheare hareka estoico ijeta pohy ijupe hãndi reta. Ĩme’ẽ heiva: Mbaivara ijetahe hokava ĩñeegãtu’ia? Ĩme’ẽjy heiva: Ĩme’ãmo yngava tũpare myhỹrãkua’iare. Shara mbeushu reta Ñee kavi Jesús ryheva hareka manovã kuerajya ryheva. 19Haivi raha reta Areopagope, haipe pyrãndushu reta: Katura jaikuaa marãva pyrỹmbo’eahea py’ahuvara reru ore? 20Shara rĩnjetahe ore mbai py’ahuva kuaahambava, hãme rãnga pota kuaaha mbaira he’ise hokava. 21Shara opaiteva Atenaspe’iare, hareka tenta yngaivi ouva haipe iko’iare, haire koñeĩ jypykuaa mbeu hareka hendu mbai py’ahuva. 22Pablo pũã mbytepe Areopagoperã hei: Kuimbaire Atenaspe pẽĩvã, ahesha pymbyveteva Tũpa ha’ãngare. 23Shara pemombai vasuvaipi ahasarã hareka amaĩrã, ahesha pente altarpe pente ñee mbyparahava heiva: “Pente Tũpa kuaambava”. Hoka pikuambava pemombai vasu pyreva, hai rãnga ambeupe. 24Hai Tũpa yvy hareka opaite’ẽpyvare japo vekua, haijy yvy hareka ara Ijarã, ikoã hai tũpao kuaretare japovape, 25ikoteveãhe mbava kuareta mbai japoshu verã, hai meẽ ñande tykove, yvytu ñanutũhẽ verã hareka opa mba’e. 26Pente kuimbaivi rãnga opa japo tenta vasure, iko verã yvy’ĩãrẽ, hãma heishu reta mbaipeitera hareka maperapo iko, 27heka verãre Tũpa, pyvyvyheape rãĩmipo katu vãhẽshu, ajema ãñete hai mbyryã’ẽ ñandyhevi. 28Shara hai rupii jaiko, ñamỹĩjaiko hareka ñaĩmejai, heiva rãĩmi peeva ñee yvoty japo’ia reta heirã vẽkua. “Ñande hai Tũpa ñymoñashia”. 29Tũpa ñymoñashia ñanderã, katuãpo ñandypya ñambijetarã Tũpa ñambivachehe, ita verava ijuva, ita vera tĩĩva maĩrã itaivi kuaretare japova. 30Tũpa hejareiimbashi aryka’e kuaretare kuaambape mbai japo vekua, tẽvã ã’ẽ opava retape hareka opa rupi’iare heishu oujy jykoty verãre. 31Tũpa ñono pente ara mbivacheka verã hekope kavi yvy jerekuepy’õ, pente kuimbai rupii hai pyhỹrõ vekua, hareka heshaka hai pyhỹrõva mbivacheka verã mũpuãjy manovare mbyteivi. 32Hãma henduma reta manova kuerajya ryhevarã, ĩme’ẽ ñymbyhoryheare, tẽvã ĩme’ẽjy heishuva: Nyrẽnduhaipojykui ĩrũ arape hokava ryheva. 33Haipema Pablo õhẽjy oho haire mbyteivi. 34Tẽvã ã’ãmo ĩmemba’ẽ ñimi’ĩrũheva Pablo hareka rojavare, haire mbytepe’ẽ Dionicio, hai Areopagope’ia, hareka ĩme’ẽ jyve pente taupe Damaris he’iashuva, hareka mbovy ñi’ĩrũre.