Act 18 | TpjSC | STEP | Haivi Pablo õhẽ tenta Atenasvirã, oho Corintope.

Acts 18

Pablo vãhẽ oho Corintope

1 Haivi Pablo õhẽ tenta Atenasvirã, oho Corintope. 2 Haipe ijesha hãndi pente Judio Aquila he’iashua yvy Pontope’õ, hãĩrãã oujy hyreko Priscila hãndi Italiaivi, shara huvisha Claudio ñonombashu reta opaite Judiovare mohẽhajy verãre Romaivi. Pablo oho maĩhe reta, 3 hãrã haire japojyre oo mondehaivi japoava, pyta haipe mba’apo hãndi verãre. 4 Vãhẽma putu’uava jy’ararã Pablo ohoñoĩ Judiore ñymbatyseape, ijeta hãndi verãre Judiore hareka griegore, potatẽ rojave reta Jesús haiva Mesia. 5 Silas hareka Timoteo vãhẽ jyveru Macedoniaivirã, Pablo ñimiñeeretei’i hareka heishu Judiore Jesús haiva Mesia. 6 Tẽvã haire õñepyrõ ñymbyvaishohe hareka jahehe reta. Hãrã Pablo mỹtỹmo mondeva heshaha verãrã heishu reta: Ã’ẽ ñunupa oupo peãrẽ, tẽvã aikuaveamapo shekui. Hãrã ã’ẽ ahamapo haimba Judiovare mbytepe. 7 Haivi õhẽ sinagogaivirã, oho pente kuimbai Tisio Justo he’iashua hentape, haijyve pente kuimbai õmombaiva Tũpa, sinagoga hyvache. 8 Hãrã Crispo sinagogape mĩñakã’õ hareka opaite hentape’õre jyroja jyvehe Ñandeja, hareka heta Corintovare hendu hokava ñeerã, rojarã, ñymyngarai jyve reta. 9 Pente pyhare Ñandeja ijetashu Pablo hesape’ouva rupive heishu: Ijeta katu jyvyĩño, avy ñimĩchirĩrĩ, avy kyje! 10 Shara she ãĩme’ãĩ nendie, mba’ety poko ndyrehe verã maĩnunga porãmba japo ndyrehe verã, shara heta’ẽ kuaretare jyroja shyreheva ko tentape. 11 Hãrã pente ãño 6 jasy kavi Pablo pyta Corintope mboihe reta Tũpa ĩñee. 12 Tẽvã Galion huvisharãteri’ẽ Acayaperã, Judiore ĩñiñono pente ñeepe pũãhe reta Pablo, haivi raha huvishare hỹnonde, 13 heishu reta: Kova kuimbai rãnga pota opaite kuaretare jyrojaheshu Tũpa, ñee mbyparahava kyrãmbatẽ heiva. 14 Hãrã Pablo oñepyrõma ijeta verã Galion heishu Judiore: Pee Judiovare ã’ẽ haipo pee, ko kuimbai purukavarã maĩrã kuatia mbyparava ñymbyvaishohearã, apyrỹrẽndutẽ verã rãnga. 15 Tẽvã ijetahe ñee maĩrã tyree, maĩrã ñee mbyparahava pyndykuatia reherã, pee teivapo pymaĩhe, shateỹ ãĩ pirĩmbivacheka’i verã hokavape. 16 Hãrã opa mohẽ reta haivi. 17 Hãma opaitea ou ĩãrẽ reta Sostenes Judiore ñymbatyseape huvisharã’õ, hãrã haipe nũpa jyre huvishare hỹnonde, tẽvã Galion mba’eãshu.

Pablo ohojy Antioquiape

18 Tẽvã Pablo heta arave pytajy Corintope, koñy marãndushu Jesús jyrojaheare, hãma jupi reta varkope Priscila hareka Aquila hãndi oho verã Siriape. Haivi tenta Cencreape Pablo ñakã mysãka japo verã ĩñee meẽshu vekua Tũpa. 19 Vãhẽma jyraha Éfesoperã, Pablo heja Priscila hareka Aquila, haivi oho Judiore ñymbatyseape, haipe ijetashu reta Judiore haipe ñymbaty’õre. 20 Haire jurureshu reta mbovy aramive pyta verã haipe, tẽvã Pablo ñatẽy pyta. 21 Koñeĩ hei: Aipota rãnga Jerusalenpe ahasakui ko arete ouva. ^{▼▼Aipota rãnga Jerusalenpe ahasakui ko arete ouva. Kova ñee mba’ety arykai mbypara vekuapy.} Tẽvã Tũpa heirã aipo apyryreshajykui. Haivi Pablo jupi varkoperã oho Éfesoivi. 22 Vãhẽma jyraha Cesareaperã oho Jerusalenpe marãndu verã tũpaope’õre, haivi ohojy Antioquiape. 23 Haivi heta arama pyta haiperã, õhe vatajyhupi, pepenteĩ vãhẽ Galacia hareka Frigiaipi, mykyrẽyjy Jesús mboireare.

Apolo oho ñimiñee Éfesope

24 Hoka arape vãhẽ Éfesope pente kuimbai Judiova Apolo he’iashua, tenta Alejandriape’õ. Ĩñee katui’ia ijetarã myrỹkey kuaretare hareka kuaa kavi Mbyparahava Tũpa ĩñee. 25 Hai mbo’eha kavihe Ñandeja hape, kyrẽ’ype pyrỹmboi hareka mbeu kavi Jesús ryheva, ajemaĩ koñeĩ kuaa Juan ñymyngaraiva ryheva. 26 Apolo õñepyrõ kyjembape ñimiñee Judiore ñymbatyseape, tẽvã Priscila hareka Aquila hendurã rahashu reta hã‘ẽĩ’õpe, mbeu kavivejyshu reta Tũpa hape. 27 Hãrã Apolo ohomapo’i tenta Acayaperã, Jesús jyrojaheare heta mykyrẽyshu reta. Hãrã mbyparashu reta kuatia Jesús mboireare haipe’õre myvãhẽ kavi verãre haipe. Vãhẽma oho Acayaperã heta mbory jyve Tũpa pya kavi rupii jyrojavare, 28 shara heshaka opaite Judiore hỹnonde haire javyvape, mbyheshaka kavi reta Mbyparahava rupii Jesús haiva Mesia.