Act 2 | TpjSC | STEP | Vãhẽma arete Pentekoste he’iashuarã, opaite jyrojavare penteapeĩ ñymbaty reta.

Acts 2

Espiritu Santo vejyrã vẽkua

1 Vãhẽma arete Pentekoste he’iashuarã, opaite jyrojavare penteapeĩ ñymbaty reta. 2 Mondii haipe iñyhendu pente hy’apuva ouva vate araivi, yvytu vasukue rãĩmi opa tynyhẽ oo haire ẽvãpe. 3 Haipe hesha reta tata rãĩmiva pepenteĩ vejyhe ñakare. 4 Hãrã opaite tynyhe reta Espiritu Santo, hãrã haipe õñepyrõ ijeta reta ñee yngavape, Espiritu Santo mbijetaka rãĩmi. 5 Imemba’ẽ ikova Jerusalenpe Israelvare jyrojahea Ñandeja Tũpare, opaite tenta vasure. 6 Opaite ñymbaty’õre hendu hy’apuvarã, kuãã reta mbaivara iko, shara pepenteĩ hendushu reta ĩñeepe ijetarã. 7 Haire, mbyrymaĩ retarã, hei: Ha’ẽãra kova ijeta’iare Galileavare? 8 Mãrãĩra ñahendu ijeta reta ñande ñaniñeepe? 9 Kope ñãĩ Partiaivi ouva, Media, Elam, Mesopotamia, Judea, Capadocia, Ponto, Asia, 10 Frigia, Panfilia, Egipto, Libia Sirene hyvache’õ ouva jyve, hareka ĩme’ẽ jyve Romaivi ouva kope iko’iare; 11 ore Judio hareka haimba Judiore jyrojaheva Tũpa. Ĩme’ẽ jyve kuareta Creta hareka Arabiaivi ouva. Opaitea ñahendu ñaniñeepetei õmombaishu Tũpa opaite mbai vasu japo vekua rehe. 12 Opavare mbypasya kuambare mbaivara iko hãrã hei jyre ijupe: Mbaivara he’ise kova mbai? 13 Tẽvã ĩme’ẽ jyve ñymbyhoryheare heiva: Opa rãnga kau reta.

Pedro ñimiñeeshu kuaretare

14 Haipe Pedro ñymbou hãndi 11 Apostol retarã hỹnatu ijetarã hei: “Pee Israelvare hareka opaite pikova Jerusalenpe, pikuaa kova hareka pijasaka kavihe kova hai pee verã: 15 Ko kuimbai reta rãnga ka’ũã jyre pee pereva rãĩmi, nde’iaveite rãngatẽ kõĩkavi. 16 Tũpa ĩñee mbeu’ia Joel hei vekuaĩ rãnga iko: 17 Tũpa hei: Ara koñymaheape, ãñohẽpokui opaite kuaretare ĩãrẽ she Espiritu, pyndyrayre hareka pyndyrajyre mbeupokui Tũpa ĩñee, kunumire heshapokui mbai heshamba iko verã hareka kuakuavare jypaihupe aijetaposhukui. 18 Hoka arape shyryhevare ajokue’areare kuimbai hareka taupere ĩãrẽ ãñohẽpo jyvekui she Espiritu, hãrã mbeupo retakui mbaivara iko. 19 Hãrã aheshakapokui vate arare mbai heshahambava hareka yvy’ĩãrẽ ẽẽpokui mbai heshaha verã: Tuvy, tata hareka tatãti. 20 Kuarasy sapeveamapo, jasy turuvy rãĩmipo jykuaa, kova mbai ikopokui vãhẽmapo Ñandeja jy’ara hĩmbipevarã. 21 Tẽvã opaite hẽnovare Ñandeja hee ohojepepo. 22 Hãrã pee Israelpe pẽĩvã pyhendu ko she haiva: Tũpa rãnga heshaka pynymbytepe Jesús Nazaretva mãrãra hai mba’ety katumba japova, hai rupii heta japo mbaikavi heshaha verã, pyrỹmyngyjeva hareka heshaha verã, pee pikuamava rãĩmi. 23 Ko Jesús rãnga Tũpa ñono hashatãmbareare ipope, Tũpa rekova rãĩmi ñakape hareka hai potava rãĩmi iko, tẽvã pee pijuka pymbysavava kurusure kuimbaire ñañarõvare rupii, 24 tẽvã Tũpa mynguerajy manovare mbyteivi, nohẽjyshu ñymanoivi, hãrã ñymano mba’etyre pyrãtãkue jepyhe verã. 25 Mburuvisha vasu David, Jesure ijetarã hei: Aheshañoĩ are Ñandeja shynonderã, shara hai ẽẽ shakata kyty, hãrã mba’ety shirity verã. 26 Hãme rãnga shypya horyite’ẽrã vy’ape apyrahe. Shyretepe aikopo ñyhãrõpe hareka kyjembape, 27 hejãã’ãĩpojy heko kaviva hetekue ñymbai verã. 28 Ryheshaka rãnga she tykove hape hãrã nynonde shymynyhẽpokui vy’akue”. 29 Shyryvyre, tambeu kavi pee ñanytynondeva David rãnga mano hareka ñotyha, hãma ñotyha vekuape ĩmeĩteri’ẽ ñanymbytepe. 30 Tẽvã David hai Tũpa ĩñee mbeu’ia, kuaakavi Tũpa meẽshu ĩñee ñono verã pente tay mburuvisha vasurã. 31 David heshavãĩmba Mesia puãjy verã manovare mbyteivi hareka pytamba verã ñotỹhãvape hareka hetekue ñymbaimba verã. 32 Tũpateiva rãnga mynguerajy Jesús, hãrã ore pytaha hokava heshahava mbe’ua verã. 33 Tũpa mupuãjyma manovare mbyteivirã, mbyvapy jakata kyty, Tũpa meẽmashu Espiritu Santorã, hareka hai meẽ jyve ñande Espiritu, shara hai kyrã ĩñee meẽ ñande. Hokava rãnga hai pyhesha hareka pyhenduva. 34 Ha’ẽã David jupiva vate arapy, haiteiva rãnga hei: “Tũpa heishu Sheja: Vapy shakata kyty, 35 she ãñonopeve ndepy’ipe ndyreshatamba’iare”. 36 Tikuaa kavi opaite Israelvare, ko Jesús pee pymbysavava vekua kurusure, Tũpa japoshu Ñandeja hareka Mesia rãĩmi. 37 Ñymbaty’õre hendu kovarã, mbyvy’ãã retarã pyrãndu jyreshu Pedro hareka ĩrũ Apostolre: Shicheyre, mbaivara akuarã jajapopo? 38 Pedro heishu reta: Peijy Tũpa jykoty, hareka pepenteĩ pimyngarai Jesucristo heepe, Tũpa hejareii pyndyhevi verã mbai porãmba pijapo vekua, hãrã meẽpope Espiritu Santo. 39 Ko ñee me’ẽãva rãnga, pee hareka pyndyrayre pevarã, jaishu opaite Teja ñanu Tũpa hee hẽno’iare pevarã jyve. 40 Pedro kyrãva ñee rupii ñimiñeeshu reta hareka mbarakuaashu retarã hei: Avy piko hãndi kuaretare mbai porãmba japo’iare! 41 Kyrã opaite ĩñee henduvare, ñymyngaraika reta. Hoka arape iche jyrojavare mbytepe 3.000 kuareta. 42 Hãrã haire iko Apostolre mboishua rãĩmi mbijao ijupe reta ĩmereare, ñymbaty retarã hareka iko reta pente ñeepe, jurure hareka hou reta jykaru Tũpa ñymanduaheva ryheva.

Tynondeite Jesucristore jyroja vekuare iko vekua rãĩmi

43 Opaiteva kuaretare mbyrymaĩ mbai haikaviva hareka mbai kavi heshaha verã Tũpa japova Apostolre rupii. 44 Opaite jyrojavare pente ñeepeĩ jyre hareka mbijao ijupe reta maĩnunga ĩmereare, 45 mbyhepymeẽjyre jy’yvyre hareka mbai ĩmereare, hepykue memeẽ ijupe reta ikotẽvẽva rãĩmi. 46 Opa ara ñymbaty reta tũpaope, hareka henta retaipi hou reta Jesucristo karu ryheva, vy’ape hareka pyakavipe hou reta. 47 Opapaveĩ pyraheshu reta Tũpa hareka opavare haihushu reta. Hãrã opa ara Ñandeja mbyhetave raha kuaretare tũpaope ohojepe verãre.