Act 20 | TpjSC | STEP | Kuareta opa ikoraiva opamarã, Pablo hẽnoka Jesús mboireare mbarakuaashu verãre, hareka opama ñimiñeeshurã ñykuãkuãvãjy hãndi reta, haivi oho Macedoniape.

Acts 20

Pablo oho Macedonia hareka Greciape

1 Kuareta opa ikoraiva opamarã, Pablo hẽnoka Jesús mboireare mbarakuaashu verãre, hareka opama ñimiñeeshurã ñykuãkuãvãjy hãndi reta, haivi oho Macedoniape. 2 Opama vata hoka yvy retaipirã, hareka hetama mykyrẽyshu jyrojava retarã, ohojy Greciape. 3 Haipe pyta mbahapy jasy. Hareka varkope ohoserima’ia Siriape, kuaa Judiore ĩñee ñono ñynoĩhearã, hãrã hei yvyipĩĩ oujy verã Macedoniaipi. 4 Mi’ĩrũshu reta Sopater, Pirro tay Bereape’õ, Aristarco hareka Segundo hai Tesalonicavare, Gayo Derbespe’õ, Timoteo, Tikico hareka Trofimo, hairetamba tenta Asiape’õvare. 5 Kovare ñymytynonde yryhevirã, jyraha ỹry’ãrõ reta Troaspe. 6 Tẽvã ore õhẽhã Filipoivi varkope, arete pãhã jy’oumbava ryheva hasamarã, hãrã pandepo aravape hipityhashu reta Troaspe, haipe shiu (7) ara pytaha.

Pablo vãhẽ oho Troaspe

7 Ara semana oñepyrõheape, ñymbatyha pãhã pyse’ãhã verã, haipe Pablo mboishu Jesús jyrojaheare. Ohojymapojy ĩrũ arajyaperã, pyhare mbytepeve ijeta. 8 Haipe ñymbatyha’õpe oo vate’õpe, heta’ẽ haipe lampara myhendyava; 9 hareka pente kunumi Eutico he’iashua petanore vapy’ẽ. Pablo pukuitema ijetarã hokava kunumi hypehyiterã oche haipe, hãrã oo mbahapy jyvohy’õivive oa, jyrahajy mupuãrã hã‘õvẽkueĩma’ẽ. 10 Hãrã Pablo vejy, kuãvã kunumirã heishu Jesure jyrojavare: Avy pykyje, manoã rãnga. 11 Haivi Pablo hykuaĩ jupijy; pyseã pãhã, opa hou retarã, ko’ẽpeve ñimiñee. Haivi oho. 12 Hãma ko kunumi hykove ryheve rahajy reta hentape, hokava mykyrẽ’yĩtevejy reta.

Pablo ohojy Troasvi Miletope

13 Ore ñymytynondeharã ohoha varkope tentami Asonpeve, haipe hupihajy verã Pablo hai hei oreva rãĩmi, shara hai pota yvyipĩĩ oho. 14 Hãrã vãhẽhama tentami Asonperã Pablo jupirã ohoha hãndi Mitilenepe. 15 Haivi õhẽha hareka pareemajyrã hasaha Quio hỹnonde, pareejyrã vãheha Samonpe varko ñymbo’yseape. Pente arajyape vãhẽha ohoha Miletope. ^{▼▼Kova ñee mba’ety arykai mbyparavapy.} 16 Kyrã japoha shara Pablo ñatẽy hasa Éfesoperã, shara potãã kỹỹĩte pyta Asiaperã, pota’areã vãhẽ oho Jerusalenpe Pentekoste jy’areterãpe.

Pablo ijetashu Éfesope tũpao miñaka’iare

17 Miletope imeteri’ẽrã, Pablo hẽnoka tũpaope miñaka’õre, Éfesope’õre ijeta hãndi verã. 18 Opama vãhẽ jyveru retarã heishu: Pee pikuaa marãra aiko jypyite ãvãhẽ’ai ko Asiaperã. 19 Heta ara aiko penendie aijokueka Ñandejape airojamba shijehevape, heta ajahe’o hareka heta ahasa’asy Judiore pota japojyre shyrehevape. 20 Tẽvã apoiã ambeupe haikavipe verã, apyrỹmboi opavare hỹnonde hareka pynyrẽta retaipi. 21 Judiore hareka haimba Judiovare haishu reta oujy verã Tũpa kyty, hareka jyve jyrojahe verã Ñandeja Jesús. 22 Ã’ẽ ahapo Jerusalenpe, shara Espiritu Santo kyrã heisherã, aikuamba’ãĩva mbaivara shy‘ãrõ’ẽ haipe. 23 Koñeĩ aikuaava hai, opaite tentare ahavaipi Espiritu Santo heishe shy‘ãrõ’ẽvã shymbyperesoha verã hareka heta aiko’asy verã. 24 Tẽvã opaite kova mbai ha’ẽã shypya mbyvyamba’õ; hareka shyrykove ha’ẽãjyveshe mba’eite, koñeĩ aipota vy’a ryheve ahahe ko añaniva japyapeve. Hareka hekope kavi ajapo Ñandeja Jesús hejasheva, ãmbeu’ai Tũpa Ĩñee Kavi jyhaihukue ryhevarã. 25 Aikuaa kavi mba’etypokui peeva Tũpa huvisharã‘õpe’õ ryheva ambeushu vekuare, shyreshajy verã. 26 Hãrã ã’ẽ ko arape, aipota hai pee, mba’etyma oa sheãrẽ verã, mbava peeva Jesús jyrojambaheape manorã, 27 shara opama ambeupe Tũpa potava, mbaimba añomivape. 28 Hãrã pingareko pindijehe hareka opaite tũpaope ñymbatyvare, shara Espiritu Santo pynypyhyrõ pingarekohe verã Tũpa jytũpao, ha’ei huvypy ova vekua. 29 Shara aikuaa kavi ahamarã, ouñoĩ verã yngavare, avara vasu ñarõva rãĩmi pota mby’opava tũpao. 30 Hãrã pynymbyteivipo mbava pũãkui mbai ãñetembava pyrỹmboihe verã, Jesús mboireare raha verã haykue. 31 Pimoãpẽĩ, hareka pymanduapohe mbahapy ãño, arakuepe hareka pyharekue shysay ryheve pepenteĩ peeva apyrỹmbarakuaa. 32 Ã’ẽ shyryvyre, airureshu Tũpa jyhaihupe ñyngareko pyndyrehe verã hareka ñee haikavivapy ñyngarekopyndyrehe verã. Hai ĩmereva mbaikatu hareka meẽpe verã pyrãtakue hareka heta mbai haikaviva mbeuva rãĩmi hai ña’ãpova retape meẽ verã. 33 Mapeã aipota pyhevi pymeẽshe verã ita vera tĩĩva, ita vera ijuva hareka mondeava. 34 Kyrãte verã, sheteiva amba’apo, apity verã mba’etysheare hareka shimi‘ĩrũ’iare pevarã jyve. 35 Haiñoĩ apyrỹmboihe marãrapo pymba’apo hareka ikotẽvẽva pymbory verã, ñanymanduahe Ñandeja Jesús hei vekuarã: “Me’ẽã ñandevaivi javyave, mbai ñameẽrã”. 36 Opama hei kovarã, Pablo ĩñesu jurure hãndi reta. 37 Hãrã opa jaheo reta, kuãkuãvashu reta Pablo hareka pypytejyre. 38 Hãrã opaite mbasyjyrehe shara heishu reta heshaveãma verãre. Haivi mĩ’ĩrũshu reta varko ẽvãpeve.