Acts 21

Pablo oho Jerusalenpe

1Hejahama ñandyryvy retarã, jupiha varkoperã symyĩravi ohoha Cospe, parejyrã Rodaspe hareka haivi Patarape. 2Patarape vãhẽhashu pente varko Feniciape oho verã, hai ohohapy. 3Hasaha ohoarã mbyryivi heshaha isla Chipre he’iashuva, hejaha yrasu kytyrã ohohaĩ Siriapeve. Hareka varkope rahahava mbyvejyhapo’ẽ Tiroperã, haipe icheha jyve. 4Haipe heshaha a’ãmo Jesús mboireare hareka 7 ara kavi pytaha hãndi reta. Espiritu heishu retarã haire heishu Pablo, potamba oho verã Jerusalenpe. 5Tẽvã opama hasa hoka 7 ararã, õhẽha. Opaite Jesure jyrojavare jyraha hyrekore hãndi hareka ñysanjayre hãndi, ĩrĩmi’ĩrũ reta tenta õhẽãshipeve hareka yy hymbeype ĩñesuharã ñymbo’eha. 6Haivi opa ñykuãkuãvãharã hejaha reta hareka jupihajy varkoperã, opajy ou henta retaipi. 7Opama poia vataha yy ĩãrẽ varkope Tiroivive hareka Tolemaidapeve, haipe marãnduhashu reta ñandyryvy retarã pente ara pytaha hãndi. 8Pareejyrã, vãhẽha ohoha tenta Cesareape. Haipe vãhẽha ohoha Tũpa ĩñee mbeu’ia Felipe hentape, hai jyve penteva Ñee kaviva mbeu’ia 7 õvare hãrã pytaha hãndi. 9Felipe ĩmere urũndy tajy nde’iave ĩmevare, hai reta jyve mbeuñoĩva Espiritu Santo heshakashuva. 10Mbovy arama pytaha haiperã, vãhẽ ou Judeaivi pente Tũpa ĩñee mbeu’ia Agabo he’iashua, 11ou yryresha hãrã heky Pablo kuaipi jokuapyarã hareka ipy, ipo opa jokuarã hei: Espiritu Santo hei kyrãpo pokuahakui Jerusalenpe Judiore, kova tukuaipi jokuahapya ija hareka ñonoãpo haimba Judiore ipope. 12Hokava ore henduharã, Cesareape’õre hãndi jururehashu Pablo ohomba verã Jerusalenpe. 13Pablo hei: Marã’ĩrara pijaheo hareka shypya pymbyvy’ãpeĩ? She rãnga ãĩ ha’ẽã shypokuaha verãĩ, katynga’ãĩ jyve ãmano verã Jerusalenpe Ñandeja heepe. 14Katuvẽãma jepyaherã, ijyjokohashi hãrã he’iha: Tiko Ñandeja potava. 15Mbovy aramajyrã, opa õĩã kaviha hareka ohoha Jerusalenpe. 16Hareka ĩrĩmi’ĩrũ reta a’ãmo mbo’eareare Cesareape’õre, verumba jyve reta pente Chiprepe’õ Mnason he’iashua, mbo’eharea arykaiva, hareka hai hentapepo pytaha’ẽ.

Pablo oho pohyshu Jacobo

17Vãhẽha ohoha Jerusalenperã haipe’õre ñandyryvy jyrojavare vy’ape yrỹmyvãhe reta. 18Parejyrã, Pablo oho jyve orẽndie Jacobo ohoa pohyashurã. Vahẽãmarã, opa ou jyve haipe tũpaope miñaka’õre. 19Pablo marãndushu reta, haivi pepenteĩ mbeushu hai rupii Tũpa japova haimba Judiovare mbytepe. 20Haivi kova henduma retarã, õmombai reta Tũpa. Hãrã heishu reta Pablo: Haikavi shyryvy Pablo, ryheshama israelitare mbytepe hetama ẽẽ jyrojavarã, hareka opaite ñymykateyhe reta Moisés mbypara vekua. 21He’ihambashu reta nde rỹmboirẽĩva opaite haimba Judiore, syryshi verãre Moisés pyrỹmboihe vekua hareka rereshu reta potambaa tayre ñymbai pire chinchihashia harekajy potamba ikova jypykuahava rãĩmi. 22Mbaivarapo he’iashukui kuaretare kuaama kỹvyty reivarã? 23Kyrãrã haikavivepo rijapo ore he’iandeva, yrymbytepe ĩme’ẽ jyve urũndy kuimbaire meẽva ĩñee Tũpape. 24Ekua ijohe hãndi retakui, mbyhepyhe retakui ñakã mysãka verãre. Kyrãrãpo kuakavi retakui ãñetembava he’ia ndyreherã, kyrãtevẽrã rijapo kavi jyve Moisés mbypara vekuape heiva. 25Tẽvã haimba Judiovare roja vekuare, mbyparahamashu reta potamba kova mbaire ojepy’apy ñynoĩ verã, avypo hou reta soo ta’anga mẽ’ẽhashuva, turuvy hareka mymba javokahava hoo, avy mbava ndeite omendava typoko ijehe.

Pablo pysyha tũpaope

26Hãrã Pablo raha urũndy kuimbaire hareka parejyrã ñymypõtĩ hãndi, haivi iche tũpaope mbeu verã mbaiperapo opakui ara ñymypõtĩva, jaishu mbaiperapo pepenteĩ haire meẽ ijehe Tũpape me’ẽãva. 27Tẽvã opaserima mboty 7 arape opa verãperã, Judiore tenta Asiape’õre hesha reta Pablo tũpaope, hareka opa ikorai retarã opa ñymomohẽ kuaretare. Pysy reta Pablo 28hareka sapuke reta: Kuimbaire Israelvare, yrỹmborymi! Kova kuimba hai oparupi kuaretare mboiheva ỹrỹrẽta hyvaishorã, Moisés mbypara vekuare hareka tũpaore, harekajy ã’ẽ minjemajy griegore, hareka myngya kova tyrẽnda kyambava. 29Shara heimba reta heshavare tenta Trofimo Éfesope’õ hareka mõãte Pablo rahashu reta tũpaope. 30Opaite hokava tentape’õre ikorai hareka ñani ou reta. Hãma pysy reta Pablo hareka mbytyryry tũpaoivirã õche mbotyraveĩ reta. 31Jukaserimajyreva, myvãhẽãmbashu marãndu syndarore juhuvisha, opaite kuaretare Jerusalenpe’õre opa ikoraiva. 32Hãma mburuvisha mbatyka ñysyndarore hareka 100’õ syndarore juhuvishare ñani jyraha kuaretare ẽvãpe. Heshama huvishare hareka syndaro retarã poi nũpa reta Pablo. 33Hãrã mburuvisha pysykashu Pablo, hareka pokuakashu mokue kadenape; haivi pyrãndushu kuaretare mbavara hai hareka mbaivara japo. 34Tẽvã hetavare mbytepe penteva sapukerã yngai hei hareka ĩrũre yngai heijy hãrã mburuvisha kuakaviã mbaiva rehera opa ikorai reta, mondokashu kuartelpe. 35Vãhẽma jupihaseaperã, syndarore hupi rahashu reta Pablo, shara kuaretare poshyite ñynoĩrã; 36shara haykueĩ sapuke jyveru reta: Tymano!

Pablo ñymbeukavishu kuaretare

37Hãma kuartelpe minjeama potarã, Pablo pyrãndushu syndarore juhuvisha: Ryhejããrapo pente mbai hai jyvende? Mburuvisha heishu: Rikatumbatẽ rijeta griegore ĩñeepe. 38Ha’ẽãra nde Egiptope’õ kueveĩ rũpurũmupũã vekua mburuvisha retare hareka raha yvy ikoambaivi 4.000 ñyrãrõ’iare? 39Hãrã Pablo hei: She hai kuimbai Judio Tarsova tenta tivishava Ciliciape’õ; airure nde rỹma’ẽĩ aijetashu verã kuaretare. 40Mburuvisha ñonoshu ijeta verã hãrã Pablo ñymboy hokava jupihaseaperã, ipope myha’ãngashu jasaka verãre. Hãma opama jasaka retarã Pablo ijetashu reta hebreo ĩñeeperã hei: