Act 23 | TpjSC | STEP | Pablo maĩ’ihe haipe huvisha ñymbaty’õ retarã hei: Shyryvyre, ã’ẽpeve aiko shãka vapy kavi ryheve Tũpa hỹnonde.

Acts 23

1 Pablo maĩ’ihe haipe huvisha ñymbaty’õ retarã hei: Shyryvyre, ã’ẽpeve aiko shãka vapy kavi ryheve Tũpa hỹnonde. 2 Haivi pai ruvisha Ananías he’iashua heishu Pablo hyvache’ia nupashu verã juruipi. 3 Pablo heishu: Tũpa nunupapokui nde, ndyrova mokuereiva! Nde rãnga ryvapyrẽĩ hokape shimbijiche verã Moisés mbypara vekuape heiva rãĩmi, tẽvã mãrã’ĩrãra shunupãka Moisés mbypara vekuape heimbatẽã kyrã rijapo verã? 4 Hãrã haipe’õre heishu reta: Marã’ĩrãra kyrã ndyposhyshu pai ruvisha Tũpa ñonova? 5 Pablo hei: Shyryvyre, aikuãã rãngambaje hai pai ruvisharã, shara mbyparahavape hei: Avy poshyshu nyrentape miñaka’õ. 6 Haivi Pablo heshama haipe’ẽ jyve Saduseo hareka fariseo retarã hỹnatu hei: Shyryvyre, she hai fariseo, pente fariseova tay, shyveruha kope shara arojashe mano vekuare kuerajy verã. 7 Pablo opama hei kovarã, Saduseo hareka fariseore õñepyrõ ijeta ñynoĩ ijupi, hãrã ñymbatyva opa ñymbijao. 8 Shara Saduseore hei manovare kuerajymbaa hareka mba’etyva Tũpa jokueva hareka espiritu, tẽvã fariseore roja hai hokava. 9 Opa sapuke reta, haipe ĩme’ẽ jyve Moisés mbypara vekua pyrỹmboi’iheare fariseova, pũã retarã hei: Ko kuimbai rãnga japoã porãmba. Ĩmerã Tũpa jokueva hareka espiritu ijetashu. 10 Kyrã ñimbitivishave oho ko ikova, hãrã syndarore juhuvisha kyje jukashu verã Pablo, hẽnoka syndarore nohẽ verãre Pablo haire mbyteivi, raha verãre syndarore ho’ipe. 11 Hoka ĩrũ arajya pyharepe Ñandeja ijeshakashu Pablo hãrã heishu: Ñymykyrẽy katu Pablo, ko Jerusalenpe shymbeuva rãĩmipo, shymbeujykui Romape.

Ñemiãpẽĩ ijeta jyrehe Pablo juka verãre

12 Hokava arape ĩme’ẽ Judiovare ĩñiñonova pente nẽẽpe Pablo juka verãre, hei reta Tũpa jahehe verãre japoã reta heivarã. 13 Hasamimba 40 kuimbai ẽvã ĩñiñonova hokava nẽẽpe. 14 Jyraha reta pai ruvisha hareka Judiore juhuvisha ẽvãpe heishu reta: Ore me’ẽã ĩrĩñee mbaimba ho’uha hareka mbusururuha verã Pablo ndei jukaharã. 15 Hãrã pee mburuvisharã pẽĩva, pirureshukui syndarore juhuvisha veru verã pynynõnde, mbai pikuaaveshi verã Pablo, hãrã ore õĩãmapokui jukaha verã ndei vãherã. 16 Tẽvã Pablo hiindy memby kuaa kovarã, oho kuartelpe mbeushu Pablo. 17 Pablo hẽno pente 100’õ syndarore juhuvisharã heishu: Raha ko kunumi syndarore juhuvisha vasu ẽvãpe, ĩmere mbeushu verã. 18 Syndarore 100’õ juhuvisha oho syndarore huvisha vasu’õperã heishu: Pablo mbyperesoarea rãnga shyrẽno’irã jurureshe aru verã ko kunumi, shara ĩmendare mbeu nde verã. 19 Hãrã syndarore juhuvisha pysyshu ipoperã raha hã’ẽĩ õpe pyrãndushu: Mbaivara rỹmbeuposhe? 20 Kunumi heishu syndarore juhuvisha: Judio reta rãnga ĩñiñono pente nẽẽpe jurure nde verã hareka ryrahashu verãre pare Pablo Judio juhuvishare hỹnonde, mbai pyrãndu kaviveshu verã rãĩmi. 21 Tẽvã avy rojakui, ĩme’ãmo hasave 40 kuimbai ñemiãpe hãrõ’õre pehupi, ĩñee meẽ reta Tũpape mbaimba hou verã hareka mbusururu verãre jukapeve Pablo. Ã’ẽ ĩmema ñynoĩ haipe, hãrõ mbaivarapo rere jyve. 22 Haivi syndarore juhuvisha mondojy kunumirã heishu mbavamba mbeushu verã kova.

Pablo mondoha Felix ẽvãpe

23 Haivi syndarore juhuvisha vasu hẽno mokue syndarore 100 ẽva juhuvisha heishu myhẽvã verãre 200 syndarore yvyipĩĩ’iare, 70 kavajure’iare hareka 200 mĩĩ ĩmereare pyntumarã oho verãre tenta Cesareape. 24 Hareka heijy ñonokavishu verãre pente kavaju Pablo jupihe verã hareka vãhẽ kavi oho verã mbaimba jehushuape Felix Roma juhuvisha ẽvãpe. 25 Hãrã meẽshu reta kuatia raha verã, Felix pevarã heiva: 26 She Claudio Lisias, arỹmymarãndu huvisha vasu hekokaviva Felix Romape’õ. 27 Kova kuimbai Judiore pysyva hareka jukaserimareare, tẽvã shysyndarore hãndi ahekyjyshi reta shara hai heishe Romavarã. 28 Pota aikuakavi marã’ĩrãra maĩ jyrehe. Haivi arahakajy Judiore juhuvisha vasure ñymbatyseape. 29 Katy ñee mbyparahava rehemba maĩjyrehe, tẽvã mba’etyre mbai reherapo juka reta hareka mbyperesoha verã. 30 Mbe’uhashe imenda’ẽ pota ñemiãpe pysyva ko kuimbai jukaha vẽra. Hãme rãnga amondo nyrẽndape hareka añonojyveshu porãmba pirĩñono’iare hei verãre nynonde mbaiva rehera ñymbyvaishohe. 31 Hãrã syndarore he’iashuva rãĩmi, pynturã raha reta Pablo Antipatrispe. 32 Parejyrã syndarore yvyipi’iare opajy jyeru kuartelpe, tẽvã kavajure’iare ohoĩ hãndi reta Pablo. 33 Vãhẽma jyraha Cesareaperã, meẽshu reta huvisha kuatia hareka Pablo. 34 Huvisha opama mbijeta kuatiarã, pyrãndushu Pablo mape’õra hai hareka kuama Ciliciape’õrã, 35 heishu: Ajasakapo ndyrehekui ñy‘ãpo’i ndyrehevare oumarã. Hãrã he’ika ñyngarekohe verãre Herodes hoo vasupe.