Act 24 | TpjSC | STEP | Pandepo arajyape pai ruvisha Ananías, vãhẽ oho hãndi Cesareape a’ãmo tũpaope miñaka’iare hareka pente pyryrepy’ia Tertulo he’iashuva. Kovare jyraha huvisha’õpe ñymbyvaishohe verãre Pablo.

Acts 24

Pablo ijeta ijehe Felix hỹnonde

1 Pandepo arajyape pai ruvisha Ananías, vãhẽ oho hãndi Cesareape a’ãmo tũpaope miñaka’iare hareka pente pyryrepy’ia Tertulo he’iashuva. Kovare jyraha huvisha’õpe ñymbyvaishohe verãre Pablo. 2 Veruhama Pablo ñymbatyavaperã, Tertulo õñepyrõ ijetahe, heishu Felix: Karai mburuvisha, nde rupii ĩme rekoha pyavapy hareka opava mbai rikatu rijapova rupii, heta mbai haikaviva japoha ko ñanyrẽtape. 3 Kova mbai oparupi heshaha, nde Felix pyakaviva hãrã yrypyaivive vy‘aha’ẽ. 4 Tẽvã potãã pukuite nymangatũhãrã, airure nde ndypya kavi rupii yrỹrẽndu verã sapy’aite. 5 Vãhẽã rãngashu ko kuimbai mbairasykue rãĩmi, hareka oparupi opa mbijajao Judiore hareka haiteiva miñakashu nazareno ryhevare. 6 Hãma pota myngyajy tũpao, hãme rãnga pysyha, 7 tẽvã syndarore juhuvisha, Lisias iche yrymbytepe hareka mbaretepe heky yrepoivi, ^{▼▼Kova ñee mba’ety arykai mbyparahavapy.} 8 hãma heishu porãmba ñonokareare ou verã nyrẽndape. Ndetei katu rypyrãndushu, hãmerãpo rikuakui ãñete kova ore he’iaheva. 9 Israelvare haipe’ẽvãre kyrãĩ heijyve reta. 10 Haipema huvisha myha’ãngashu Pablo ijeta verã, hãrã Pablo hei: Avy’a aijetapo shijehe nynonderã, shara kuriã aikuaa ko tentape nde hai ripirĩmbivacherẽĩva. 11 Ndetei katu rỹpyrãndukui 12 ararãã japo ãvãhe aiva Jerusalenpe ãmombai verã Tũpa. 12 Shyreshãã reta mbava aijaka hãndirã, maĩrã opa ãmomohẽ tũpaope’õ retarã hareka Judiore ñymbatyseape, maĩrã maĩpi tenta retaipi. 13 Kova kuaretare katuã heshaka ãñetera mbai hei shyrehevare. 14 Tẽvã she aimbeupo, sherure ñu Tũpa rãnga amba’aposhu, ãĩme’ãĩ Tape Py’ahuape tẽvã haire heishu hekopemba’õ, shara aroja opa mbai Moisés mbypara vekua hareka Tũpa ĩñee mbeu’iare jykuatia. 15 Hãrã haire rãĩmi, ĩme’are jyve ãhãrõva Tũpaivi, mano vekuare kuerajy verã, heko kyambare hareka heko porãmbavare. 16 Hãme rãnga ãñehãñoĩ añymbyheko kavi verã Tũpa hỹnonde hareka kuaretare. 17 Heta ãño aiko mamaĩpi, haivi aijy shyrẽntape ameẽ verã maĩnunga shyrẽnta’ĩrũ retape hareka ambishaka verã Tũpa pevarã. 18 She rãnga ãñymypõtĩ’ãĩ tũpaoperã, Asiaivi ouvare shyresha reta, tẽvã mba’etynunga kuareta haipe hareka amambekoã mbavape. 19 Hai reta rãngapo jyveru ijeta shyrehe, ĩmere hei shyrehe verãrã. 20 Maĩrã kope ĩme’õre tymbeu, ĩme hesha shyrehe porãmbava ajaporã Judiore juhuvisha pirĩmbivache’iare hỹnonde ãĩme ãĩrã. 21 Koñei haire hỹnonde asapukerã hai: Ã’ẽ pymaĩpẽĩ shyrehe shara aroja manovare kuerajy verã. 22 Felix henduma kovarã kuaa kavimava Pee Py’ahuva ryheva, kyrãĩ heja kova, heishu reta: Syndarore juhuvisha Licias oumajyrã aikuaa kavivepokui kova ryheva. 23 Haipema Felix heishu 100’õ syndarore juhuvisha Pablo mbyperesoaveteri’ẽ verã hareka jochamba verãre Pablo ñi’irũre pohyshurã hareka ma’ẽĩehe ñygarekohe verãre. 24 Mbovy arama hasajyrã hykuaĩ oujy Felix, hyreko Drusila hãndi, haijyve Judiovare, hãrã henõkajy Pablo hẽndushi verã Jesucristore jairojava ryheva. 25 Tẽvã Pablo ijeta’ẽhẽ hekope kavi jaikova ryhevarã, jajijokoshi mbai porãmbava hareka iko ñandyrehe verãrã, Felix myngyje hãrã heishu: Ekuajyvy, ha’ereipo aryrẽnokajykui. 26 Felix hãrõ jyve Pablo meẽshu verã kyrypoti poishi verã, hokava rehe hetajy hẽnoka ijeta hãndi verã. 27 Mokue ãño kyrã hasa, haivi Felix õhẽ mburuvishaivi hãrã Porcio Festo ichejy hendakuepe. Hãma Felix pota haikavi’ẽ hãndi Judio retarã mbypereso heja Pablo.