Acts 26

Pablo ijeta ijehe mburuvisha vasu Agripa hỹnonde

1Hãma Agripa heishu Pablo: Katuma ndetei rijeta. Hãma Pablo ipo hupirã oñepyrõ haitei ijeta ijehe hei. 2Avy’aite shara katu aijeta nynonderã, mburuvisha vasu Agripa aijochashi verã opaite Judiore hei shyrehe vekua, 3shara tynondeite, nde rikuaa kavi Judiore jypykuava rãĩmi, hareka hokava mbai ijaka hevare, hãma airure nde ñyhãrõ kavipe shyrẽndu verã. 4Opaite Judiore kuaakavi marãra aiko reta mbyteipi shyrentape hareka Jerusalenpe shyndeirãvãĩ. 5Hai reta rãnga kuaakavi reta hãrã pota hei retarã katu hei. Shukunumirãvãĩ she hai fariseova hareka ñyngarekope kavi japoha jypykuaahava rãĩmi ore ohoahea. 6Ã’ẽ shyveru reta mburuvishare hỹnonde arojarã hareka ãhãrõ Tũpa ĩñee meẽ vekua ñanytynondeva retape. 7Opaite 12 tribu Israelpe’õre hãrõ reta hesha verã hokava ñee mẽ’ẽava ryheva, hãme rãnga õmombai vasushu reta Tũpa ara hareka pynturã. Mburuvisha vasu Agripa, Judiore porã hei shyrehe reta. 8Marã’ĩrãra pyrojãã Tũpa katu mynguerajyva manovare? 9Sheave rãnga heta añehãã amby’opa verã Jesús nazareno jyrojaheare. 10Kyrã ajapo Jerusalenpe. Pai ruvishare ñonomasherã, heta ambyperesoka reta heko kyambare; hareka jukama retarã haikavĩ jyve she. 11Hetajy anupãka reta pota poi Jesús jyrojahe retarã, opa kova mbai ajapohe reta Judiore ñymbatyseaipi. Shyposhyiteshu retarã ãmoña araha reta ynga tentapeve. 12Kyrã verã aha tenta Damascope, pai juhuvishare ñonomashe hareka heimashe retarã. 13Tẽvã pehupi, shuruvisha vasu, ndoceipimarã ahesha vate araivi sape shyreheva, kuarasyivi himbipeveva opa mykõĩshuri hareka aha hãndivare juri. 14Haipe opaite o’aha yvype, hãrã ahendu pente ñee ijetasheva Hebreo ĩñeepe: Saulo, Saulo, marã’ĩrãra shymoñari? Ndeii rãnga rĩñymbypereri, mbai kutuapya hakuava rypatararihea rãĩmi. 15Hãrã apyrãndushu: Mbavara nde, Karai? Hãrã Sheja heishe: She hai Jesús, nde rymoña ryreva. 16Tẽvã pũ’ã, shara aijeshaka nde arijokue aryre verã, ã’ẽ ryheshava rỹmbeu verã hareka kutymivejyape ryhesha verã. 17Arỹmondo jepeva nyrẽta ĩrũ retaivi hareka haimba Judio retaivi, hãrã ã’ẽ ãrỹmondopo hokava retape, 18hesapea verã hareka ynteñoma vata verãre pyntuaipi, koñeĩ hendyvape, hareka ikoveama verãre Satanas ipope, koñeĩ iko verãre Tũpa ipope, hipity verãre hejareiishi verã mbai porãmba vekua hareka kyrã Tũpa ñonoshu verãre henta’ĩrũrã kyamba. 19Hãme, huvisha vasu Agripa, shiñeerẽndushu shyresape’õ vateivi ouva. 20Hãme rãnga ambeu ko ñee tynonde Damascope’iare, haivi Jerusalenpe’iare hareka opaitea Judeaipi. Ambeu jyve haimba Judiova retape oujy verã Tũpa jykoty hareka haire japo vekua rupii tyheshaka mbai porãmba hejamava. 21Hokavare rãnga Judiore shypysy tũpaope, hareka pota shukajyre. 22Tẽvã Tũpa shymboryrã rupii tãnta ãĩ ã’ẽpeve. Ambeu ĩñee opaiteva pevarã, pavetevare hareka ikokatuvare, koñeĩ haijyshu reta ikoverã Tũpa ĩñee mbeu’iare hareka Moisés hei vekua rãĩmi. 23Jaishu, Cristo hasa’asy verã, tẽvã manorã hairãni kuerajy verã manovare mbyteivi myhyrãkuãha verã sapeva, Judio retape hareka tenta mbyryvare.

Agripa ombohovaishu Pablo

24Kova mbai opa hei ijehe Pablorã, Festo sapuke: Rikuakuãã rãngari Pablo! Ny’ãranduiterã, nymbykuakuama’i! 25Tẽvã Pablo hei: Ha’ẽã rãnga aikuakuamba’aiva, karai Festo, ko ambeuva rãnga hai añeteva hareka ĩmere mbaivara he’ise. 26Mburuvisha Agripa rãnga kuaakavi jyve kova mbai, hãme akyjeã aijeta hỹnonde. Aikua kavi jyve hai opa kuaava kova mbai shara ha’ẽã ñemiape japoha vekua. 27Mburuvisha vasu Agripa, ryrojara Tũpa ĩñee mbeu’iare hei vekua? She aikuaa ryrojava. 28Agripa heishu: Ajejeteima rijapo shyhevi Cristo ryheva. 29Pablo hei: Shara mishĩĩ maĩrã tivishara airureshu Tũpa avy ndeñoĩte verã, opaite ko arape shyrẽndu’õ reta jyve tiko she rãĩmi, tẽvã ha’ẽã ko kadena ryheve. 30Pablo opama hei kovarã, huvisha vasu Agripa, Festo hareka Berenice opa pũã reta, hareka opaite haipe vapy’ẽ hãndiare. 31Haivi yngai jyraha ijetahe verãre kova mbaire, hãrã hei jyre ijupe: Ko kuimbai mba’ẽã japo mano verã maĩrã mbyperesoha verã. 32Hãma Agripa heishu Festo: Katuarambatẽ poiashi ko kuimbai haitei jurureãjy mburuvisha vasu Romape’õ mbivachekashu verãrã.