Acts 27

Pablo rahaha Romape

1Meẽma reta yrỹmondo verãre Italiaperã, me’ẽha Pablo hareka a’ãmo mbyperesoareare pente 100 õvã syndarore juhuvishape Julio he’iashua, huvisha vasu Augusto ñysyndarore ryheva. 2Haivi jupiha varko Adramitiova, ohoha verã tenta Asia hymbey kyty. Ĩrĩmi’ĩrũ jyve Aristarco, tenta Tesalonicaivi ouva, pente tenta Macedoniape’õ. 3Parejyrã vãhẽhã ohoha tenta Sidonpe varko ñymbo’yseape. Julio ñyngareko kavihe Pablo hareka ma’ẽĩhe oho marãndu kuavare hoka tentape’ẽvã, haire mboryshu verã opa mbai ikotẽvẽape. 4Sidonvi õhẽãmarã ohohajy yvy japua’õmi jykoty Chiprepe, ijochahashi verã yvytu shara porãã peju’ore. 5Hasahama yyvasu hymbeypi Silisia hareka Panfiliaperã, vãhẽhã Mirape, tenta ẽvã Liciape. 6Haipe syndarore juhuvisha Julio hesha pente varko vasu Alejandriape’õ, oho verã Italia kyty haivi hai ĩrĩmbijupikapy ohoa verã. 7Mbevekatu ohoa’i, hareka hasype vãhẽhã ohoha Gnido hỹnonde. Shara yvytu porãã peju’orerã, hasaha Salmona hỹnonde Creta jykoty yvytu ijochahashi verã. 8Hasype hasaha ohoha hãrã vãhẽhã Puerto Haikaviva he’iashuape, tenta Lasea hyvache. 9Heta arama hasa hareka kyjehama ohoa verã yyvasuipi shara ro’y serimavãĩ’ijy. Hãrã Pablo mbarakuaa reta: 10Karai reta, ahesha haĩnyshe ko jahajaiva porãmba verã, ñande varko hareka jarahapyare oapy verã yy, katupo ñandeave opa ñamanokui. 11Tẽvã syndaro juhuvisha, koñeĩ japoshu varko ija hareka huvisha haipy’õvã heiva, hãrã japoãshu Pablo heiva. 12Hãrã varko ñymbo’yseape porãnunga’ẽ ro’ykue hasaha verã haiperã, opaitenunga pya mbijetatejyre haikavive haivi õhẽãrã hareka oñehã’ãha vãhẽha verã Fenicepe, Cretape, ĩmereva õhẽã verã yyvasu kuarasy õhẽa kyty hareka ichea kyty, hasaha verã haipe ara ro’ykue.

Yvytu porãmba vãhẽ yyvasu mbytepe

13Haivi õñepyrõ mbeveĩ peju’ẽ rovai, hãrã moãma haikavi jyraha retarã, õhẽ reta Creta hymbeipi. 14Kỹỹmĩma’ẽrã sapy’ãĩ vãhẽ yvytuvasu porãmba ouva Euroclidon he’iashua, 15haivi õñepyrõ raha yy ĩãrẽ, hãma katuã varko ĩtĩ myma’ẽhã yvytu kytyrã, ma’ẽhãĩma yryraha. 16Haivi yryraha yy mbytepe’õ yvy mishi’õ Cauda he’iashua kupeipi yvytu mbeveĩ pejuape, hasype mbypytaha varko. 17Hupima retarã, opa jokuakavi reta. Haivi kyje oho pyta verãre yvyku‘i’õ Sirte he’iashuaperã, mbyvejyjy reta varko mimbouva mishĩva, hãrã ma’ẽĩhe raha reta yvytu vasukue. 18Parejyape yvytukue ñakuãĩteve ou, hãrã õñepyrõ opa mombopy reta yy maĩnunga varkope veru vekuare. 19Mbahapy araheape ipopetei opa mombojy reta mbai jokuapya ñopẽhãva varko jokuahapyare. 20Kyrã heta ara heshahaveã kuarasy hareka jasytatare, hãrã mo’ãã ĩmehãte’i, shara pytãã yvytu vasukue. 21Heta araitema karuhããrã, Pablo ñymbou haire mbyteperã hei: Shi’ĩrũre haikavivetẽ verã rãngamba pijapo she haivarã, ñaheã tenta Cretaivirã, hãrãtẽpo mba’eã jehushue varko hareka jyve ñande. 22Tẽvã airurepe avypo pykyje, shara mbaveãpo pynymbytepe manokui, koñeĩpo varko oñehũndikui. 23Shara je’i pyhare Tũpa jokueva ijeshakashe, she amombai’area, 24Pablo avy kyje shara rijeshakapo Roma mburuvisha vasu hỹnonde hareka Tũpa ndyraihu rupii, hejããpo mbava mano varkope’ẽvare. 25Hãme rãnga kuimbaire, pyrẽĩ katu! She aroja Tũpa japo verã opa mbai hai he’ikasheva rãĩmi. 26Ajemara varko ohopo pytahe yvy japua’õre. 27Vãhema pynturã 14 araheape yvytu a’ape yryraha yyvasu Adriaticope, hareka pyhare mbytepe varkopy mba‘apo’iare kuaa reta vãhẽhama ohohava yvy ẽvãpe. 28Hãrã itypy reta pente mbai yy kypekue omediapya, haipe hesha reta 37 metrorerã, haivi hykuaĩ ityjypy retarã, 27 metroimare. 29Kyjeite reta ita ñunũpahe verãrã, urũndy kavi mombopy reta varko haykue mbypyta verã, hareka jurure’asy reta koĩma verã. 30Akuapema kuimbaire mba’apova jyve varko vasupe pota ñemijyrerã oñepyrõ mbyvejy varko mishĩvami, ity rã’angaiva rãĩmi varko hỹnonde mbypyta verã. 31Tẽvã Pablo heishu Centurion hareka syndarore: Kovare pytãã varko vasuperã, pehojepeãpokui. 32Hãrã syndarore jasyja kanoa ĩsha joko’õ hareka hejaĩma oapy yy. 33Koĩma ourã Pablo jurure’asy opaitevape karu verã hareka hei: Kova rãnga hai ara 14 hea pyhasa pykarumbava. 34Hãme rãnga airure’asype pykaru verã, hãrãpo peojepekui. Shara mbaveãpo oñehundikui hareka penteĩmba pãkahaa oa verã. 35Pablo kova mbai heirã, pysy pãhãrã jurure’ĩãrẽ opavare hỹnonde. Haivi pyseãrã hou. 36Haipe opa ñymykyrẽ’y hareka karu reta. 37Haipe varko vasupe oĩava 276 kuareta’ẽ. 38Haivi hyvantama retarã, varko mbyvevyve verã, ity reta trigo yyvasupe. 39Kõĩmajyrã varkope mba‘apo’iare kuãã reta yvy vãhẽãserima ohoashuva, tẽvã heshamba reta yvykui hetava hymbeype hareka oñeha’ãpaite haity raha verãre varko. 40Haipe jasyja reta varko jokoapyva hareka ĩshare hame heja yyvasupy hareka jorajy reta varko rahava haykue’õ ñapitĩhapya. Hareka hupijy reta tarapo tivishava yvytu pejupyrã raha verã reta yy hymbeype. 41Tẽvã varko ĩtĩ oho kutu yvy ku’ivape. Hãme katuveãma omyjy maty, tẽvã japykue opa jeka yyñarõva ñunupa’ẽherã. 42Hãrã syndarore pyape hei opa juka verã mbyperesoareare, potamba ñemi vẽra ña’ỹtavape. 43Tẽvã centurion syndarore juhuvisha Julio he’iãshu reta, shara potamba Pablo mondojepe. Hãme hei ĩme’ẽ katu iña’ỹtavarã ojepoipy verã yy hareka vãhẽ oho vẽra hymbeykyty, 44hãrã ĩme’ẽ haykue ohovare, yvyra pysẽvekuepy maĩrã varko pysẽvẽkuere’ĩãrẽ. Kyrã opaiteva vãhẽha yvy ẽvãpe hareka ohoajepe.