Act 3 | TpjSC | STEP | Pente arape ka’arumima ohorã Pedro hareka Juan oho reta tũpaope jurure verãre.

Acts 3

Pedro hareka Juan mynguera Jesucristo heepe pente kuimbai vatamba vekua

1 Pente arape ka’arumima ohorã Pedro hareka Juan oho reta tũpaope jurure verãre. 2 Haipe’i pente kuimbai oarãvãĩ vatamba, opa ara rahaha hareka ñonohã õche “Mashyãva” he’iashuape jururete’ishu kyrypoti opaite tũpaope ichevare. 3 Hokava kuimbai vatambava hesha Pedro hareka Juan ichepo oho tũpaoperã, jururetẽ’ishu kyrypoti. 4 Hãrã Juan hareka Pedro mãĩjyreherã, Pedro heishu: Mãĩ yryrehe. 5 Haipe ko kuimbai mãĩkavihe, mõãte maĩnunga meẽposhu retarã. 6 Pedro heishu: Ita vera ijuva hareka ita vera tĩĩva mba’ety are, tẽvã ĩme’areva ameẽponde; Jesucristo Nazaretva heepe pũ’ã hareka vata. 7 Pedro opa ijetarã pysyshu ipo jakata kyty’õrã mupũã. Haipe vatamba vekua, tymare hareka pytare pyrãtajy. 8 Ko kuimbai vatamba vekua oporã õñepyrõ vata. Haivi iche hãndi reta tũpaope, opo’i vate õmombaishu Tũpa 9 Hãrã opaite kuaretare hesha vatajyrã hareka õmombai vasu jyve reta Tũpa, 10 opa mbyrymaĩ reta hareka kuãã reta mbaivara iko shara kuaa reta ko kuimbai hai vapyse’ia tũpao hõchepe “Mashyãva” he’iashuape.

Pedro mbeu Jesucristo ĩñee tũpao vasu hyvache

11 Ko vatambava kuera vekua hejãã reta Pedro hareka Juan hãrã opaite kuareta tentape’õre mbyrymaĩterivare ryheve ñani jyraha õche vasu’õ kyty Salomon he’iashua. 12 Pedro hesha kovarã heishu reta: Marã’ĩrãra pee Israelitare, mbyry pymaĩhe ko ikovare? Marã’ĩrãra pymãĩpi yryrehe, ore mynguerahava rãĩmi kova kuimbai maĩrã ore mbyvatahajya rãĩmi ỹrỹmbaikatu hareka yryrykove mbijicheava Tũpa pevarã rupii? 13 Abraham, Isaac, Jacob ñu Tũpa hareka ñanytynondevare ñu Tũpa rãnga, vateiteve ñono hai tay Jesús opaite jokueva retaivi, pee pymeẽ hareka piñomipyre Pilato hỹnonde, hai heimatẽã poishi verã. 14 Tẽvã pee piñomi heko Kyambava hareka hekope kavi’ia, haivi hendakuepe pirure poiashi verã Barrabas, puruka’ia. 15 Kyrã pijuka tykove Ija, tẽvã Tũpa mynguerajy manovare mbyteivirã hãrã ore hai hokava mbai heshaha vekua. 16 Ko kuimbai pyhesha hareka pikuava pyrãtajy shara jyrojahe Jesús hee. Ko jyroja ñonova Jesure myngueraiteshu pee pyheshava rãĩmi. 17 Hãrã ã’ẽ shyryvyre, aikua kova pee jyve punduruvishare mbai porãmba pijapohe pikuaa kavimbape. 18 Tẽvã Tũpa kyrã japo opa iko verã Tũpa ĩñee mbeu’iare rupii mbeu vekua; Mesia manoñõĩ verã. 19 Hãrã, opa kavi pymbeu mbai porãmba pijapo vekua hareka peijy Tũpa jykoty, hejareii pyndyhevi verã mbai porãmba, 20 hareka katu Ñandeja mboupe ara vevyva, mbou Jesurã jypyiterãvãĩ Mesia rãĩmi pyhyrõã mbouhape vekua. 21 Tẽvã ã’ẽ Jesucristo pytateri’ẽ vate, opa mbai ñonoha kavipeve. Opa mbai heiva, Tũpa ĩñee mbeu’ia kyambava, arykaivare ikoterivape. 22 Moisés rãnga hei ñanytynondeva retape: “Ñandeja ñanu Tũpa rãnga mupuãpokui tyvyre pãũpe pente Tũpa ĩñee mbeu’ia she rãĩmiva, pyhendushukui hai heiva, 23 shara opaite ñee hẽndumbashua hokava Tũpa ĩñee mbeu’ia mohẽãpokui jy’yvyivi”. 24 Shara Tũpa ĩñee mbeu’ia Samuelvive õñepyrõ ijetahahe kova ara. 25 Pee pevarã rãnga ko ñee Tũpa ĩñee mbeu’iare rupii Tũpa meẽva, hareka pee pevarãĩjy ñee me’ẽãva Tũpa japo vekua pynytynondevare hãndi. Shara Tũpa heimbashu Abraham: “Ndyrayre rupiipo she ahovasa opaite tenta yvy‘ĩãrẽ’iare”. 26 Pee pevarã tynõnde Tũpa mupuãjy tay Jesucristo, hai rupii pipity verã jyhovasa hareka hejaka pyndyhevi verã mbai porãmba pijapopi vekua.