Acts 4

Pedro hareka Juan mburuvishare hỹnonde

1Pedro hareka Juan kuaretare ñimiñeeteri’ẽshuva, vãhe ou paire hareka saduceore, tũpao hõche ñyngareko’ihea juhuvisha hãndi. 2Poshy jyreshu Pedro hareka Juan, mboi ñynoĩ kuareta retaperã hareka mbeujyre manovare katu puãjy Jesús puãva rãĩmi. 3Hãrã pysyrã raha mbypereso reta, ĩrũ arajyapeve, shara pyntumapo’i. 4Tẽvã hetamba Ñee hẽnduvekuare rojajy; 5.000 rupiimba rojaitevare, kuimbaire jepeiva. 5Ĩrũ arajyape ñymbaty reta Jerusalenpe haipe’õ Judio juhuvishare, hãndi kuakuavare hareka Moisés mbypara vekua pyrỹmboi’iheare. 6Pai juhuvisha vasu Anas ẽjyve hãndi reta hareka Caifas, Juan, Alejandro hareka opaite pai ruvisha ryhevare jepeii. 7Haivi veruka reta Pedro hareka Juan, hãrã haire mbytepe ñonorã, pyrãndushu reta: Mbava ñymbaikatupera maĩrã mbava heepera pijapo kova mbai? 8Pedro tynyhe Espiritu Santoivirã heishu reta: Mburuvishare Israelpe’õre, 9pypyrãndu rãnga ore mbaikavi japoa vekua kuimbai ñymbairasyva rehe, mãrãra kuera. 10Mbe’uha kavi, opaite Israelpe õre kuaa verã, ko kuimbai pỹnonde’õ, Jesucristo Ñazaretpe’õ heepe kuera. Kova Jesús pee pymbysavava vekua kurusure hareka Tũpa mynguerajy mano vekuare mbyteivi. 11Jesús hai ita mbijicheha vekua opaite oo japo’iare, tẽvã haivi ikoshi ita mbijypyhapyva. 12Mba’etyhe mbava ko ojepeva ryheva, shara Ñandeja yngava tyree me’ẽã ñande ko yvy’ĩãrẽ, ñanymondo jepe verã. 13Mburuvishare heshama mãrãra Pedro hareka Juan ijeta pyavasu ryheve, hãrã kuaa mondo reta ha’ẽã ñy’ãrãnduvarã hareka mbaimba kuaavarã, mbyrymaĩ reta; kuakavi reta Jesús iko’i hãndia retarã. 14Hesha reta kuimbai kuera vekua ñymbou ñynoĩ hãndi retarã, hãrã katuã heijyhe reta mbai porãmba japova. 15Hãrã heishu reta õhe verã hokava ñymbatyha õĩvi, ha’ei retaĩ ijupii ijeta verã. 16Hãrã hei reta: Mbaivara jajapopohe kova kuimbaire? Opaite rãnga Jerusalenpe’õre kuaa opa mbai heshaha verã japorã hãrã katuã ñañomi. 17Tẽvã, ã’ẽ japysypo reta poima mbeu verãre, ñamyngyjepo reta ỹnteñoma ijeta verãre Jesús heepe. 18Haipe hẽno retarã heishu reta, ỹnteñoma ijeta verãre hareka pyrỹmboihe verã Jesús heepe. 19Tẽvã Pedro hareka Juan heishu reta: Pypya pimbijetano haikavirapo ore japoharã pee pereva maĩrã Tũpa heiva? 20Shara ore mbe’uhañoĩpo heshahava hareka henduha vekua. 21Haivi mburuvishare ijeta pohyjyshu retarã ma’ẽĩmahe reta kuaretare rehe, vãhẽãshu mãrãrapo nũpaka reta shara haipe ikova rehe opaite õmombaishu Tũpa. 22Hoka kuimbai kuera vekua mbai heshaha verã rupii, 40 ãñomare.

Cristo ryhevare jurure jyrojape hareka pyavasupe

23Pedro hareka Juan poiamashi retarã, jyraha ñi’ĩrũre ẽvãpe hãrã opa mbeushu reta opaite paire juhuvisha hareka kuakuavare heishu vekuare. 24Haire opama hendurã opaĩ hỹnatu jurure reta Tũpape hãrã hei reta: Sheja, nde rijapo vekua yvy hareka ara vate’õ, yy vasu hareka opa mbai ẽẽpyare, 25nde rere vekua Espiritu Santo rupii hareka David rijokueva, juru rupii:
Mãrã’irãra tenta vasure poshyite jyre reta hareka kuaretare mbaimba vekuareĩ pya mbijeta?
26Opaite mburuvisha vasure yvy‘ĩãrẽ’õre ñymyhẽva ñyrãrõ verãre,
hareka huvishare ñymbaty ñymbyvaishohe verãre Ñandeja hareka Mesias hai pyhỹrõva.

27Ãñete rãnga Herode hareka Poncio Pilato ñymbaty reta kova tentape, yngaivi ouvare hareka Israelitare hãndi hãrã puãhe reta Jesús, nimbijokue heko kyamba, nde rypyhyrõ vekua, 28iko verã opa mbai nde rere vekua rãĩmi. 29Ã’ẽ, Sheja, maĩhe haire ĩñee hei pota urũnupavare hareka meẽshu rijokuevare pyavasu, kyjehambape mbeu verãre niñee, 30hareka heshaka’ore nymbaikatu myngueraha verã ñymbairasyva, tiko mbai heshaha verã hareka mbai kavi heshaha verã nimbijokue Jesús heko kyamba. 31Haivi opama jurure retarã, oo haire ñymbaty ñynoĩvape opa ryry; hareka haire opa tynyhe Espiritu Santo hãrã mbeu reta Tũpa ĩñee kyjembape.

Jesús jyrojajahevare ikova rãĩmi

32Opaite jyrojavare pente pyapeĩjyre hareka pente ñeepeĩ ñynoĩ; hareka mba’ety heiva ha’ei ña’ãpova mbai ĩmereva, opava ña’ãpovare haire ña’ãpova jyve. 33Apostolre, mbaikatukue ryheve, mbeu jyre Ñandeja Jesús kuerajy manovare mbyteivirã hareka Tũpa heta maĩkavihe reta. 34Mba’ety haire mbytepe ikotẽveva; opa mbai ĩmereva yvy maĩrã oo, ovende retarã hepykue veru reta, 35haivi veru meẽshu reta Apostolre, hareka pepenteĩ meme’ẽãshu reta mbai ikotẽveva rupii. 36Kyrã haire mbytepe ẽjyve mbory’ẽshua paire tũpaope, José he’iashuva, Apostolre mbyheembajypy reta Bernabé, he’iseva “mbypya kaviva hapishare”, hokava hai Chiprepe’õ; 37ko kuimbai mbyhepymba yvy ĩmereva, haivi hepykue verumba meẽshu Apostol retape.