Acts 5

Ananías hareka Safíra

1Pente kuimbai Ananías he’iashua hãndi hyreko Safira ovende reta jy’yvy. 2Ko kuareta, hepykue ñemihapeĩ heky hai ña’ãporã, hãrã hemby vekuaĩma veru reta hareka meẽshu Apostolre hareka hyreko kuajyve. 3Hãma Pedro heishu: Ananías, marã’ĩrãra Satanas iche ndypyape ndapushu verã Espiritu Santo hãrã rỹmanãrõhe verã ndy’yvy hepykueivi? 4Ha’ẽãramba yvy nde ña’ãpova? Hãrã rymbyhepymarã ha’ẽãrajy hepykue ndykyrypoti? Marã’ĩrãra hokava riñono ndypyape? Tũpape rãnga ndapu ha’ẽã kuareta retape. 5Ananías kova hendumarã oa mano, hãrã hokava kuavare kyjeite reta. 6Hãrã kunumire jyveru hetekue ñoma retarã raha ñoty reta. 7Haivima mbahapy oraheaipi iche jyve Ananías hyreko kuamba ryheve mbaivara jehu. 8Pedro pyrãndushu: Mbeushe, pymbyhepyramba yvy hepyre pee pereva rãĩmi? Taupe hei: Ẽẽ hai hepyre. 9Haipe Pedro heishu: Marã’irãra penteva ñeepe piñiñono pindijapushu verã Ñandeja je Espiritu? Hokapema vãhẽjy jyveru neme hetekue raha ñotyvare, hãrã haire ã’ẽ ndyrahapo jyve niñoty verã. 10Haiperaveĩ Safira oa mano jyve Pedro hỹnonde, hãrã ichejy kunumire heshama reta manorã, nohẽ rahajy reta ñoty verãre ĩme jichere. 11Opaiteva hokava tũpaope’ẽvãre, kova kuavare opa kyje reta.

Apostolre heta mynguera kuaretare

12Heta mbai heshaha verã hareka mbai kavi heshaha verã iko Apostolre rupii kuaretare mbytepe hareka opaite jaty reta Salomon hõchepe pente ñeepe. 13Mbavẽã ynga retava kyrẽy jihia tẽvã ijeta kavihe reta. 14Ñymbyhetave oho Ñandeja jyrojahevare, taupe hareka kuimbaire. 15Kyrã, kuaretare opaite nohẽ reta ñymbairasyva hupare ryheve hareka miñenohasepya Pedro hasamarã, ñykuarãsy’ãĩ vejy ĩãrẽ verã a’ãmore. 16Hareka tenta mbymbyrymba õĩva ou jyve kuareta hetava Jerusalenpe veruva ñymbairasyva hareka mbaiposhy imereva, hãrã opaiteva kuera.

Pedro hareka Juan oñemoĩhahe reta

17Hãrã pai juhuvisha vasu hareka Saduseore ẽẽ hãndiva haipe opa heshatã’ãkue tynyhe reta. 18Hãrã pysy reta apostolre, mbyperesoka verã. 19Tẽvã pente Ñandeja jokueva, pynturã pea pyrỹmbyperesohaseape hõche, hãrã nohẽjyrã heishu reta: 20Pekua hareka pimbou tũpaope hareka pymbeushu kuaretare ko ñee tykove ryheva. 21Kova hendurã ko’ẽĩ iche reta tũpaope pyrỹmboi verãre. Haipevãĩ pai juhuvishare hareka ẽẽ hãndiare, mbaty reta Judio juhuvishare ñymbatyhaseape opaite kuakuavare Israelpe’õre hãndi, haivi mondo veruka reta Apostolre pyrymbyperesohaseaivi. 22Tẽvã vãhema jyra jokuehava retarã tẽvã vãhẽãshu reta; haivi oujyvyĩ reta mbeu verã. 23Hei reta: Heshaha karsel ñymboty kavi ãñete, hareka ñyngareko’iheare ñymbo’y ñynoĩ õnchere hỹnonde kyty: Pe’aharã vãhẽhãshu mbava hapype. 24Haipe henduma reta pai juhuvisha vasu hareka tũpaope ñyngareko’ia juhuvisha retarã, kuãã japo verãre hãrã pyrãndu jyre ijupe mbaivapera kova ohopo opakui. 25Haipe ou pente heishuva reta: Kuimbaire piminje vekua karselpe tũpaope pyrỹmboi ñynoĩ reta. 26Hãrã tũpaope ñyngareko’ia juhuvisha hãndi syndarore jyraha veru, tẽvã mba’ẽã japohe kyje jyve kuaretaivi mõã itape japiharã. 27Hãrã verumarã ñonoshu reta conciliope ñymbatyhasea hỹnonde haima pai juhuvisha heishu reta: 28He’iha kavi rãngape ỹnteñoma pypyrỹmboi verã Jesús heepe, tẽvã ã’ẽ pymytynyhẽma Jerusalen pypyrỹmboihea, hãrã pota pity yryrehe ko kuimbai ñymanokue. 29Pedro hareka ĩrũ Apostolre hãndi heishu reta: Ore japohã rãngapo kuaretare heiva, ore rãnga japohapo Tũpa potava. 30Ñanytynondevare Ñutũpa mynguerajymba Jesús, pee pijuka vekua pymbysavava kurusurerã. 31Hokava rehe Tũpa ñonoshu vate jakata kyty, mburuvisha vasu rãĩmi hareka pyrỹmondo jepe verã opaite Israelvare hipity verã hejaha reiva mbai porãmba vekua. 32Ore kova mbai heshahavare hareka mbe’uhava, Espiritu Santo jyve Tũpa meẽva opaite ĩñee henduva hareka japova. 33Haire kova hendumarã poshyitevejy reta, hãrã pota jukajyre reta. 34Tẽvã opaite mburuvishare mbytepe ẽẽ pente fariseo Gamaliel he’iashuva Moisés mbypara vekua pyrỹmboi ihea hareka opava haihuva hoka tentape, hãrã sapy’ãĩ nohẽka katoape Apostol retape. 35Haivi hei mburuvisha retape: Kuimbaire Israelpe peĩvã, pymaĩ kavirãni pijapohe verã ko kuimbaire. 36Pynymanduarahe kyyãteri Teudas puãrã vekua, oñemombai vasu vekua hãrã mi’ĩrũ 400 kuimbai rupii tẽvã hai jukahamba haivi opaite iko’i hipiare opa ñymomohẽ hãrã opareii. 37Haivi kuareta jypapava ikorã puamba Judas Galileape’õ, hãrã hetava raha haykue tẽvã jukahamba jyve, haivi opaite oho haykueva opa ñymomohẽ. 38Hãrã pyma’ẽĩpohe kova kuimbai retaivi, avy pijapohe reta maĩnunga shara kova kuaretare pota japovaĩrã, opareiipokui. 39Tẽvã Tũpaivi ouvarã katuãpo pymbai, hãrã pymaĩkavi avy piñyñonopeĩhe reta. 40Hãrã opa iñiñono hãndi reta pente ñeepe hẽnoka Apostolre hãrã opa nupaka reta vakapiperã hei jyvyĩshu reta ỹnteñoma ñimiñee verãre Jesús heepe. Hãrã poijyshi reta. 41Hãrã Apostolre opajy õhẽ mburuvishare ñymbatyseaivi vy’ape, shara Tũpa ñonoshu reta kyrã hasa’asy verã Jesús heepe. 42Opa arapema tũpaope hareka oomire ẽvãipi pyrỹmboi mbeu reta ñee py’ahuva Jesús hee ryheva.