Act 8 | TpjSC | STEP | Saulo ẽẽ jyve pente ñeepe Esteban jukaha verã. Hokava arape heta tũpao õñepyrõ mymorãhãã Jerusalenpe. Opaite, ñymomohẽ tenta Judeapi hareka Samaria, koñeĩ Apostolre ha’ẽã hai.

Acts 8

Saulo pyrymoña’irã

1 Saulo ẽẽ jyve pente ñeepe Esteban jukaha verã. Hokava arape heta tũpao õñepyrõ mymorãhãã Jerusalenpe. Opaite, ñymomohẽ tenta Judeapi hareka Samaria, koñeĩ Apostolre ha’ẽã hai. 2 A’ãmo kuaretare Tũpa haihuva Esteban hetekue ñoty hareka heta hãpirõ reta. 3 Tẽvã Saulo haipe opa momohẽ Tũpare jyrojavare hareka henta retaipitei iche oho, nohẽ mbytyryry kuimbaire hareka taupere raha mbyperesoka verã.

Ñee kavi mbe’uha Samariape

4 Tẽvã Jerusalenvi opa momohẽã vekuare mbeu reta Ñee kaviva ryheva ohova retaipi. 5 Felipe, hai jyve penteva, oho tenta Samariape hãrã õñepyrõ ijeta hareka mbeu Cristo ryheva. 6 Kuaretare ñymbatymba ñynoĩ hareka jasaka kavihe reta Felipe hei’õ rãĩmi hareka jyve mbai heshaha verã hai japova. 7 Shara heta kuareta espiritu porãmba ĩmere vekua opamba mohẽhãshi hareka hokava porãmba õhẽmashirã sapukemba; hareka vatamba vekua, japa vekuare opa kuera. 8 Hãrã hai rehe opaite hokava tentamipe õre vy’aite jyre. 9 Tẽvã haipe pentemba’ẽ kuimbai Simón he’iashua, pajepe mbai kua’ia hokava tentape hareka mbytavy’ia kuaretare Samariape’õ, heimba’i ijehe kuareta vateve’õ. 10 Opaite jasakahe reta mishĩvavive hareka vateve’õre, hãrã hei reta: Kova kuimbaimba ĩmere hai Tũpa ñymbaikatu he’iashua. 11 Hãrã jasaka kavihe reta, shara ñymbai kuaakue rupii heta ara mbytavypy reta. 12 Tẽvã rojama reta Feliperã mbeu Ñee kaviva Tũpa vate’õ mburuvisha vasurã vate araivi ouva ryheva hareka Jesucristo heerã, vokape kuimbai hareka taupere ñymyngarai reta. 13 Hãrã Simónteiva rojarã ñymyngarai jyve, hãrã õñepyrõ mi’ĩrũshu Felipe, mbyrymaĩhe mbai heshaha verã hareka mbai kavi heshaha verã hesharã. 14 Apostolre Jerusalenpe’õre kuaama Samariape’õre rojama Tũpa ĩñeerã, mondoshu reta haity Pedro hareka Juan. 15 Vãhẽma jyraharã, jururehe reta opaite jyrojavare Samariape’õ, Espiritu Santo myvãhẽ verã reta. 16 Shara nde’iaveteri penteva vejyhe reta Espiritu Santorã; koñeĩ myngaraishu reta Ñandeja Jesús heepe. 17 Pedro hareka Juan ipo ñono’ĩãrẽhe retarã, kyrã vãhẽhe reta Espiritu Santo. 18 Simón hesha Espiritu Santo ou ĩãrẽ reta apostolre ipo ñono ñynoĩhe retarã, kyrypoti mbeureshu, 19 heishu: Pymeẽveshe hokava mbaikatu, mbava shepo añono ĩãrẽrã, vejyhe verã jyve Espiritu Santo. 20 Pedro heishu: Ndykyrypoti ryheve tijahea ndyrehekui! Shara ndypya kyrã rimbijetahe Tũpa kyrypotipy ovaha verã. 21 Nde mba’ẽã ĩmeryrende kovape, shara ndypya symyĩã Tũpa hỹnonde. 22 Heja maĩnunga porãmba vekua, hareka jurureshu Ñandeja katura hejareii ndyhevi ko ndypya rimbijetarẽĩva rãĩmi, 23 shara ahesha nytynyhẽ mbai pyryreshatambava hareka mbai porãmba rijapo vekua nymbypereso’i. 24 Hãrã Simón hei: Pirure katu shyrehe Ñandejape, mãhẽ jehushekui kova mbai perepẽĩsheva. 25 Haivi poima ñimiñee hareka mbeu Tũpa ĩñeerã, apostolre mbe’uĩ raha reta ñee jahajepeva ryheva opaite tenta Samariape, haivi jyverujy Jerusalenpe.

Felipe hareka kuimbai Etiopiape’õ

26 Kova mbai hasamarã, pente Ñandeja jokueva heishu Felipe: Pũ’ã hareka ekua rovai kyty, tape ohova Jerusalenpe Gaza kyty. Kova hai tape hasava yvy ikoambaipi. 27 Felipe pũãrã oho; haivi pehupi ijesha hãndi pente kuimbai Etiopiava. Eunuco, mburuvisha vateve’õ hareka kyrypoti ñyngareko’ihea mburuvisha kuña Etiopiape’õ, hareka oho vekua Jerusalenpe õmombai verã Tũpa. 28 Kova kuimbai oujy’i jy’yvy kytyrã vapy ou jykaretape, mbijeta raha kuatia Tũpa ĩñee mbeu’ia Isaia mbypara vekua. 29 Espiritu Santo heishu Felipe: Ekua hokava kuareta hyvache hareka ñymbojahe. 30 Felipe ñymbojarã, hendu pente mbijeta ẽvã Tũpa ĩñee mbeu’ia Isaias mbypara vekua, hãrã pyrãndushu: Rikuaara rĩmbijetarẽĩva? 31 Kuimbai heishu: Mãrãrapo aikuaa mba’ety mbeu kavisheva? Hãrã jurureshu Felipe jupirã vapy hãndi verã. 32 Mbyparahava mbijeta’ẽvã hai kova: Avisha Ray rãĩmimba rahaha jukaha verã; hareka ko avisha ray rãĩmi jasakava opaite piro ñonovare hỹnonde, haipemba mbai heiva. 33 Oñemomishĩvape mbai japohahe hareka japohãshu teko jyvacheva; hareka ñymoña hãndiare, mbavarapo papakui? Shara hykove hekyha ko yvyivi. 34 Ko mburuvisha heishu (eunuco) Felipe: Mbeu kavĩtevesheno, mbavarera hei’ẽ ko Tũpa ĩñee mbeu’ia, ha’ei ijeheĩra maĩrã yngavarera? 35 Hãrã Felipe õñepyrõ mbeu kavishu ko mbyparahavape’õ mbijetavaivi, hareka mbeushu Ñee kaviva Jesús ryheva. 36 Hãma hasama jyraha yyvasu ẽvãperã, ko karai eunuco hei: Kope ẽẽ yy, katuãra ã’ẽvãĩ shymyngarai? 37 Felipe heishu: Ãñete ndypyaivive ryrojarã, katupo rijapo. Haipe Eunuco heishu: Aroja rãnga Jesús haiva Tũpa tay. ^{▼▼Kova ñee arykai mbyparahavape mba’ety.} 38 Hãrã heima mbypyta verã kareta; haipe mokue’õre vejy yyperã Felipe myngaraishu. 39 Haivi yy õĩjymashi retarã, sapy’aĩ Espiritu Tũpaivi ouva, ou rahashu Felipe, hãrã karai eunuco hesha veamashu; tẽvã vy’a ryheve ohojy pehupi. 40 Tẽvã Felipe heshahajy tenta Azotope, hareka opaite tenta retaipi mbeu raha Ñee kaviva, vãhẽ peve Cesareape.