Acts 9

Saulo Jesús jyrojaherã vẽkua

1Saulo potañoĩ opa juka Ñandeja mboireare. Hãrã oho pai juhuvisha’õpe, 2jurureshu kuatia oho verã Judiore ñymbatyseape Damascope, potañoi vãheshu raha mbyperesoka verã Jerusalenpe opaite õiva Pe py’ahuvape kuimbai hareka taupeivive. 3Haipe vãhẽserima oho tenta Damascoperã, mondii ou juri pente sapeva araivi. 4Saulo oa yvyperã hendu pente ñee heiva: “Saulo, Saulo marã’irãra shymoñari?” 5Saulo hei: “Mbavara nde, Karai?” Ñee vateivi ouva heishu: “She hai Jesús, nde rymoña ryreva. ▼

▼Kova ñee mba’ety arykai mbypara vekuapy.

6Pu’ã hareka iche tentape, haipepo mbe’uandekui rijapo verã”. 7Kuimbaire oho hãndivare opa omyã reta, hareka ijetã kyje retarã, tẽvã mba’eã hesha reta. 8Saulo puãrã hareka sarekote’irã mba’ẽã hesha; hãrã shambekyĩ raha reta Damascope. 9Haipe’ẽ Saulo mbahapy ara katumba heshava kuvãĩpi hareka karumba, yyimba houva. 10Damascope ĩme’ẽ pente mbo’eharea Ananías he’iashua. Hesape’ou Tũpa heishurã: Ananías! Hai hei: “Kope ãĩme’ãĩ Sheja”. 11Ñandeja heishu: Pũ’ã hareka ekua vataha’õĩpi Ndakata kyty he’iashua hãrã hekakui Judas hentape pente kuimbai Saulo he’iashua tenta Tarsope’ia haipe ñymboi’ẽ, 12hareka hesape’ouva hesha pente kuimbai Ananías he’iashua, iche hareka ipo ñonohẽrã heshajy verã. 13Hãrã Ananías hei: Karai, heta mbai ahenduhe kova kuimbai, hareka heta mbai porãmbava japo’iheva heko kyamba Jerusalenpe. 14Hãma ã’ẽ vãhẽ ou kope pai juhuvishare kyrã heishurã, raha mbyperesoka verã opaite ndyree heno’iare. 15Tẽvã Ñandeja hei: Ekua, shara apyhỹrõma hokava kuimbai ijeta shyrehe verã opaite yngava tenta retaipi’õ, huvisha vasure hareka jyve israelitare. 16She ambyheshakapo heta hasa’asy verã shyreepe jyrojarã.

17Ananías oho iche oo Saulo ẽvãpe, ipo ñonohẽrã heishu: Shyryvy Saulo, Ñandeja Jesús ijeshakandeje Damascope reirã. Hai shymbou kope ai verã, ryheshajy verã hareka nytynyhe verã Espiritu Santo. 18Haiperaveĩ Saulo hesare oashi pira pire rãĩmivarã hãrã heshajy kũvãĩpi. Hãrã puãrã myngaraiha. 19Haivi õñepyrõ karu pyrãtajy verã. Saulo mbovy ara pytajy hãndi mbo’ehareare Damascope.

Saulo ñimiñee Damascope

20Saulo õñepyrõ ravi mbeu Judiore ñymbatyseape, hei Jesús haiva Tũpa tay. 21Opaite henduvare mbyrymaĩrã heijyre: Ha’eãra kuepi Jerusalenpe, pota mby’oparea Jesús hee heno’iare? Ha’eãra kuepi haiteiva kope ourã pysykarã, raha mẽ’ẽkava pai juhuvisha retape? 22Tẽvã Saulo ñymypyrãta jyvyĩ ijeta Espiritu Santo ñymbai katupy mbeu Jesús haiva Mesia, tẽvã Judiore Damascope’õre kuaakaviã reta.

Saulo ñemishi Judiore

23Heta arama hasarã, Judiore pente ñeepe ñynoĩ juka verãre Saulo, 24tẽvã Pablo hendu pota japojyreheva. Arape hareka pynturã hãrõ reta kuaretare hokava tenta hõchepe juka verãre. 25Hãrã mbo’ehareare pynturã kanata vasupy ñono retarã, mbyvejy hokava tenta mangorapya õĩvi.

Saulo Jerusalenpe ẽẽ

26Vãhẽma Jerusalenperã, Jesús mboireare potate ñymbaty hãndivare, tẽvã opaĩ kyjeshi reta shara moãte ha’eã jyveshu mbo’earearã. 27Tẽvã Bernabé pysyrã hareka raha apostolre õpe. Haipe mbeushu reta mãrãra Saulo hesha Ñanderu Jesús pehupi Damascope hareka mãrãra ijetashu. Mbeujyve mãrãra Saulo Damascope kyjembape mbeu Ñandeja Jesús heepe. 28Kyrã Saulo pyta Jerusalenpe; Jesús ryhevare hãndi õhẽ hareka kyjeã ijetahe Ñandeja Jesús heepe. 29Haipe ijeta hareka hei ñynoĩ ijupii reta Judiore hãndi griego ĩñeepe ijetavare tẽvã haire õñepyrõ hei reta juka verã. 30Hãma pente’ovare Jesús jyrojaheare kuaama retarã, raha reta Cesareape haivi mondo tenta Tarsope. 31Hãrã opaite tũpao Judeape’õre, Galilea hareka Samaria, reko reta pyavapy hareka ñymypyrãta jyrojakuepe. Ñandeja kyjeshiape iko reta, hareka Espiritu Santo mboryshu retarã ñymbyhetave jyraha.

Eneas kuerarã vẽkua

32Pedro, opa rupi pohyse’iva, oho mãĩjyvehe heko kyambare Lidape iko’iare. 33Haipe vãhẽshu pente kuimbai Eneas he’iashua, japoma 8 ãño hupape’iva, vatajymbava. 34Pedro heishu: Eneas, Jesucristo nymynguera. Pũ’ã hareka ñono kavi ndurupa. Eneas haiperaveĩ pũã. 35Opaite Lidia hareka Saronpe’õre, hesha pũãjyrã hareka opa roja jyve reta Ñanderu Jesús.

Dorcas kuerajyrã vẽkua

36Hãrã ĩmemba’ẽ Jopepe pente mbo’eharea Tabita he’iashua, he’iseva griego ĩñeepe Dorcas. Kova taupe hykovepe heta mbai haikaviva japo hareka mbaimba ĩmereva mboryva. 37Hãrã iko hokava arape oa ñymbairasyrã hareka mano. Hetekue, opama johearã rahaha ñonoha ipe oo vate’õ. 38Katynga Lida mbyryã’ẽshi Joperã, Jesús mboireare kuaama Pedro haipe’ẽrã mokue kuimbai mondo reta heishu verãre: Narẽ’ãĩte ei Jopepe. 39Hãma Pedro pũãrã, oho hãndi reta. Haipe vãhẽmarã, raha reta Tabita hetekue ẽvãpe hareka opaite ĩme manoshiare haipe ẽẽjyve, jaheo ñynoĩ hareka mbyheshaka mondeava hareka jaso’iavare Dorcas imeteri’irã japo vekua. 40Pedro heishu kuaretare opa õhẽ verãre katoape. Haivi ĩñesu hareka ñymboi. Haivi mãi mano vekuarerã hei: Tabita, pũ’ã! Hai sarekorã hareka heshamã Pedrorã, vapy. 41Pedro mbyhasashu ipo mũpũã verã, haivi hẽno heko kyambare hareka ĩme manoshiare, hãrã heshaka Tabita kuerajymava. 42Kova opa kuaaha Jopepe hamemba heta’ẽ jyrojaheva Ñandeja. 43Haipe Pedro pyta heta ara hokava tentape, Simón he’iashua hentape; mymba pirere mba’apova.