Colossians 1

Ñymarãndu Colosape’õre pevarã

1She Pablo, Jesucristo Apostol, Tũpa potava rupii ñandyryvy Timoteo hãndi, 2ambyparape ko kuatia shyryvyre Colosape’õre, Tũpa ña’ãpova pyhỹrõvare heko kyamba. Tũpa tiñono pyrehe mbai kavikue hareka tymeẽpe pyavapy.

Pablo jururehe Jesure jyrojava

3Jururehañoĩ’i pyndyrehe Tũpape, me’ẽhã yry’ajetekue Ñandeja Jesucristo Tuupe. 4Henduha rãnga Cristo Jesús piroja jyveherã, hareka pyhaihu opaite heko kyambare, 5hoka pyhãrõpẽĩva rupii natũhamape pa’ãpõrã vate arapy. Pee rãnga pikuaama pyhãrõpẽĩva, ñee añeteva rupii, hokava hai Ñee Kaviva. 6Hoka ñee rãnga mbe’uhamaĩpe, hareka oparupi ko yvy jerekue pũã hareka ñymbyheta oho, jehuva rãĩmi jyve pynymbytepe, hoka arape pyhendurãvaĩ ko añeteva, marãra Tũpa pyndyraihu. 7Kyrã rãnga pynymboi Epafras, mba‘apoha’i hãndiva haihuhava, hai rãnga jyroja kaviva; Cristo jokueva opaite pee pevarã. 8Hai mbeu jyve’ore hokava, hei’ore marãra Espiritu Santo ñono pyndypyape pyhaihu verã papishare.

Pablo jururehe pyrãta tũpao Colosape’õre pevarã

9Hãme rãnga ore, hoka arape kuaaharãvãĩ, pente aramba hasa yryheviva jurureha’i pyndyreherã. Jurureha Tũpape kuaaka kavipe verã hai potava, meẽpe verã ãrãndu hareka mbaikuaa Espiritu Santo meẽva. 10Kyrãrã pikopo Ñandeja potava rãĩmi, hareka hai vy’apo penendie shara pijapopo opa mbai haikaviva hareka pikuaa kavivepo pyraha Tũpa. 11Tũpa ñymbaikatukue tivishava rupiipo pynymypyrãta, hãrãpo opava porãmbava pijepyhekui ñyhãrõkuaa rupii, hareka kyrã vy’akue ryheve. 12Hãrã pymeẽposhu pyndy’ajetekue Ñanderu. Shara piniñono kavi me’ẽãpe verã ñana’ãporã Tũpa meẽshu verã heko kyambare koĩvape vata’iare. 13Tũpa rãnga ñanynohẽ pyntuivi, hãma ñaniñono Tay haihuva ẽvãpe, 14hai huvy rupii mbyhepy ñandyrehe ñanynohẽajy verã, hareka hejarei ñandyhevi mbai porãmba jajapo vekua.

Cristo japo vekua

15Cristo rãnga hai Tũpa Tay, hai rãnga ndei yvy japoharãvãĩmba ẽẽ hai; hai rãnga Tũpa jaheshambava hã’anga. 16Hai rupii rãnga Tũpa japo opaite arare’õ hareka yvy‘ĩãrẽ’õre, opaite mbai heshahava hareka heshahambavare; mburuvisha vasure, opaite espiriture pyryrekova ipope hareka pyrãtavare; Cristo rupii opa mba’e japoha hareka hai pevarã. 17Cristo rãnga ikomaĩ hai ndeiteri maĩnungare’ẽrã, hãrã hai rupii opa mba’e hendape kavi’ẽ. 18Cristo hai tãka, tũpao hai tyrete. Hai rãnga opa mbai õñepyrõhea, hareka haijy tynonde pũãjya manovare mbyteivi, kyrã hai tynonde’ẽ verã opa mba’eivi. 19Shara Tũpa mbyvyamba opaite ñymbaikatukue Cristo ẽẽherã. 20Hãma Cristo rupii Tũpa mbi’iko kavijy hãndi reta opaite ẽvã yvy’ĩãrẽ hareka vate arapy’õre, hãrã ñono kavijy hãndi Cristo huvy rupii ñohẽ vekua kurusure.

Mbaivara veru jyheky mbai porãmbaivi

21Pee rãnga aryka’e Tũpa mbyry pẽĩshi, hareka pyheshatãã pyndypyape, shara pya mbijeta reta hareka japomba jyre mbai porãmbava; tẽvã ã’ẽ Tũpa pinimbi’iko kavijy; 22Cristo mano rupii kuareta rãĩmi. Hokava japo, pyndyverujy verã hỹnonde heko kyambape, mbai porãmba pijapombape hareka mbaimba mbojaha pyndyrevape. 23Kyrã verã piñymyhãtapo pirojakuepe, avy pyheja ñyhãrõkuaa pyrekova ñee kavi pyhendu vekua rupii. Hoka hai ñee kavi mbe’uhava oparupi, hãrã she Pablo, ambory mbe’ua verã.

Pablo japova tũpaore pevarã

24Ã’ẽ avya’aĩ ahasa’asy pyndyreherã, shara kyrãrã opa añono araha shyretere Cristo jyhasa’asykue, haiva tũpao. 25Haikavipe verã, Tũpa japo shyhevi tũpao ambory verã, hai meẽsheva ajapo verã pyndyrehe, ambeu verã ĩñee, 26he’iseva, mbai ñemiape’õ heta ara hareka aryka’eitevaĩ Tũpa ñomirea, tẽvã ã’ẽ kuaakashu henta ĩrũ ryheva kyamba. 27Tũpa potai kuaakashu haimba Judiovare mbai ojaimbava hĩmbipeva tentare pevarã, hokava hai: Cristo ẽvã pynymbytepe, hãrã haiteiva pyharõpẽĩ pyreko verã tykove hĩmbipeva. 28Ore rãnga mbe’uha Cristo ĩñee, pyrỹmbarakuaaha hareka ãrãndupe mbe’uhashu opavare, Cristo rãĩmi opa kavi pyndyreko kavi verã. 29Ha’erã amba’apo hareka heta añehãã, kova pyrãtakue Cristo meẽsheva rupii.