Col 2 | TpjSC | STEP | Aipota pikuaa she’aĩrãrõ mbarete’aĩ pyndyrehe, pee Laodiceape pẽĩva hareka opaiteva shykuamba terivare.

Colossians 2

1 Aipota pikuaa she’aĩrãrõ mbarete’aĩ pyndyrehe, pee Laodiceape pẽĩva hareka opaiteva shykuamba terivare. 2 Hãrã aipota haire pyape ñymykyrẽy, penteapeĩ tõĩ reta jyhaihupe, heta hipity verã opaite mbai kavivare ouva mbaikuaakue rupii, kuaa verãre Tũpa ñemĩãpereva haire kuaambava, haiva Cristoteiva; 3 hai ĩãrẽ ẽẽ opa mbai haikavivare ouva mbaikuaakue hareka ãrãnduivi. 4 Kova hai pee potãã mbava pynymbytavypy ñee mashyã’ovarã, tẽvã mba’ety vekua. 5 She teiva ãĩmembate’aĩ penendieva, shẽã rupii ãĩme penendie, hareka avy’a aikuaa hekope kavi pimepẽĩrã hareka Cristo pirojahevape pynypyrãtapẽĩrã.

Tykove py’ahuva Cristo rupii

6 Hãrã pee pymyvãhẽshuva rãĩmi Jesucristo Pyndejarã, kyrãĩpo piko jyve Hai potava rãĩmi; 7 piñymbyhapopopy hareka piñymypyrãtapohe piroja rupii, shara kyrã pynymbo’eha hareka pymeẽñoĩshu Tũpa mbai kavikue. 8 Pingareko kavi avy piñymbytavykashu kuaretare ñy’ãrãndu mbaimba vekuare, haire ou arykaivare mboiva rupii hareka tẽãre ñymbaikatu’ipe ẽvã ko yvy’ĩãrẽ, hareka ouãã Cristoivi. 9 Shara opaite Tũpa heko ẽẽhe Cristo hykove hareka hetere, 10 hãma pee opaite pimepeĩhe Cristo shara piñimi’ĩrũhe Hai. Hai miñaka’ishuva opaite mbaikatukuere hareka ipope ẽvã ko yvy’ĩãrẽ hareka vate arapy. 11 Cristo rupii pindipire chĩchĩama jyve. Tẽvã ha’ẽã japoava tyretere, koñeĩ ñandipire chĩchĩãva Cristo japo ñandyreheva, hareka ñandyreky porãmba vekuaivi. 12 Pee pimyngaraimarã, piñyñoty hãndi Cristo, kyrãijy pykuerajy manovare mbyteivi, shara pyroja Tũpa ñymbaikatukue mynguerajyva Jesús manovare mbyteivi. 13 Ndeiteri japoa pyndyrehe kova pipire chĩnchĩava ryhevarã, pee pymanomba arykai mbai porãmba vekuape. Katynga, Tũpa meẽ ñande tykove ñanimi’ĩrũheva Cristo, opa hejareii ñandyhevi mbai porãmba vekuarã. 14 Tũpa hejareii ñandyhevi kuatiape’õ ñambyhepytẽ verã vekua hareka ñonoãva japohañoĩ verãpe: Hareka kutu kurusure opa mbijapy ñandyhevi verã. 15 Cristo mano kurusurerã, Tũpa opa ity tẽãre, opaitea mbaikatu ĩmereare, hareka hetavare hỹnonde mymarãka ñysyrõvavape raha õhẽkavi ohovape.

Pyheka mbai vate arapy’õ

16 Hãrã avy mbava tijeta porãã pyndyrehe peuva hareka pimbyuva rehe, maĩrã maĩnunga mby’areteavare, maĩrã jasy py’ahuvare, maĩrã putu’uava jy’arare. 17 Opaiteva kova, ou verã hã’angaĩ rãnga, tẽvã añeteva hai Cristo. 18 Avy pyma’ẽĩhe tijahe pyndyrehekui, ñymby pya kavi rã‘ãnga’iare hareka õmombaivasu’iare Tũpa jokuevare, hei’ia maĩnunga heshahakashua hareka jyrojahe kuaretare ñãkape ñanduva ĩmereva. 19 Haire ñymypenteã hãndi Cristo, hai rãnga tũpao ñãka mbykuakuava opaite tyrete, hareka hai rupii opaite tyrete ryhevare pentevareĩ ñynoĩ hareka ñymboryñoĩ reta, Tũpa potava rãĩmi.

Jaiko Tũpa potava rãĩmi

20 Pee rãnga pymano Cristo hãndi, hãrã peĩveãma tẽãre ñymbaikatu’ipe ẽvã ko yvy’ĩãrẽ. Marã’ĩrãra akuarã, pikoteri kova tẽãre ñymbaikatu’ipe hareka piñyñonopi haire ĩñee potava rãĩmi? 21 Haire hei pee: “Avy pokohe kovare! Avy heu hokavare! Avy ñymbojahe hokava”. 22 Kova japoa verã hareka mbo’eahevare, ara hasa oho’ivape opa oho’i, kova reta hai kuaretare japova. 23 Ãñete rãnga kova mbaire hãĩtẽ haikaviva, shara ñanymbyhaikavi, ñanimishĩ rã‘ãnga’i, ñandyrete mbyhasy, tẽvã kova mbai jokoã ñandyrete potava japo verã.