Col 3 | TpjSC | STEP | Pee pykuerajy Cristo rupii, hãma pyheka mbai vate araivi ouva, Cristo vapy’õpe Tũpa jakata kyty.

Colossians 3

1 Pee pykuerajy Cristo rupii, hãma pyheka mbai vate araivi ouva, Cristo vapy’õpe Tũpa jakata kyty. 2 Pypya pimbijetahe mbai vate arapy’õ, ha’ẽã yvyipi’õre. 3 Pee rãnga pymanomatẽ arykai piko vekua rãĩmĩ, hareka ã’ẽ tykove py’ahu pyrekova Cristo hãndi, natu’ẽpe Tũpa pee pevarã. 4 Cristo teiva rãnga pyndyrykove. Hãrã hai oujymarã, pẽĩpojyve hãndikui pynytynyhẽva hĩmbipekueivi.

Mbaivara veru ñymypente Cristo hãndi

5 Hãrã pijuka pyndypyape’ẽvã porãmba vekuare, jaishu kyrãrãĩ’ia ryheva, mbai pyrỹmyngyava, mbai potaiiva ryheva, hareka kate’ỹkue, hokava ha’ẽĩjy ñamombaiva Tũpa rã’anga. 6 Kova mbai rehe rãnga ou Tũpa ñunupa pohyva ñee hendumbashuare’ĩãrẽ ^{▼▼“Ñee hendumbashuare’ĩãrẽ”: Kova ñeere mba’ety arykai mbypara vekuape}. 7 Pee pyndyrykove aryka’e vekuape pijapopi kovare, 8 tẽvã ã’ẽ opa pyheja kova mbai; piniñarõva, poshyreii, porãmba vekua, ãñetemba vekua rerehe ndapisha hareka juru porãmba vekua. 9 Avy piñymbytavy, shara pyhekyma pindijuhuvi pyndyrykove arykai vekua, hareka mbai porãmba pijapo vekua. 10 Piko tykove py’ahuvape, ñymbypy’ahu ohova ovave verã Tũpa hai pindijapo vekua hareka pikuaa kavive pyrahashu. 11 Hãrã mba’etyma jyvavyhe verã ndera hai Greciape’õ maĩrã Judiora, ndera ndipire chĩchĩhã maĩrã chĩchĩhããra, ndera mbyryivireiva, maĩrã mba’ẽãra rikuaa, haira nde jokueharea maĩrã ha’ẽãra. Haikaviveva rãnga hai Cristo opa mba’epe hareka jyvache opavape’ẽ. 12 Tũpa rãnga pyndyraihu hareka pynypyhỹrõ iko pyndyhevi verã henta ĩrũrã kyamba. Piñimimondepy jyhaihukue hareka jyparekokue pyndypyaivive õhẽva, jyrojamba ijeheva, poshymbape hareka ñyhãrõkuaape. 13 Pyma’ẽĩ pijehe, pyhejareii ijuhuvi ĩme’ẽ yngava hapishare poshyshuarã. Kyrã Tũpa hejareii pyheviva rãĩmi pyhejareii ijuhuvi. 14 Tynonde, piñimimonde jyhaihukuepe, mbai pyrỹmypente kavivape. 15 Hãrã Cristo pya symyĩkue tymytynyhe pyndypya, ha’ẽrã rãnga pynyrẽno aryka’e Tũpa, piko verã penteva rãĩmi hãma pymeẽshu pyndy’ajetekue. 16 Cristo ĩñee tytynyhẽ kavi pyndypyare. Piñymbarakuaa hareka perepijupe mbai kuaakuepe. Pyndypyaivive pymeẽshu Tũpa pyndy’ajetekue, pypyrahe salmope’õ, mbyrahe haikaviva hareka mbyrahe Espiritu ryheva. 17 Hãma opa mba’e pijapova hareka pereva, pijapo Ñandeja Jesucristo heepe hareka pymeẽ ajetekue Tũpape, Cristo rupii.

Cristo jyrojaheare hope’õre japo verã

18 Tyrekore piko pemere ĩñeere, hokava rãnga hai hãrõã pyheviva pee pirojahea Cristo. 19 Hãrã pee jyve tẽmere pyhaihu pyndyrekore hareka avy pijeta pohyshu reta. 20 Sanjayre, opa mba’epe piniñeerẽndushu papohare, shara hokava mbyvya Ñandeja. 21 Hãma terure, avy pymby poshyka pynysanjayre, mahẽ opa ñatẽy retakui. 22 Jokuehareare, opa mba’epe piniñeerẽndushu pokue’õ ko yvy‘ĩãrẽ’õre, ha’ẽã maĩ’ẽ pyreherãmeĩ pymba’apo verã pota pẽĩ kavi hãndirãmeĩ. Haikavivepo pyakavipe pijapo hareka Ñandeja pykyjeshiape. 23 Opa mba’e pijapova, kỹrẽ’ỹpe pijapo, Tũpape pijapova rãĩmi, ha’eã kuaretare pevarã. 24 Pikuaama rãnga hekovia Tũpa meẽpope, hokava hai maĩnunga haikaviva meẽshu verã hai ryhevare. Pikuaapo pee pymba’apova Cristo pevarã, hai ãñeteĩte teja. 25 Tẽvã mbai hekopemba japo’ia, porãmbavãĩpo hipityjy. Kovape Tũpa pevarã mba’ety hai mymorãveva.