Col 4 | TpjSC | STEP | Pee ĩmepyreva pijokuepyrevare, pijapohe reta hekope kavi’õ hareka pyreko kavishu reta. Pymanduapo jyvehe ĩmepyreva jyve Pyndeja vate arapy’õ.

Colossians 4

1 Pee ĩmepyreva pijokuepyrevare, pijapohe reta hekope kavi’õ hareka pyreko kavishu reta. Pymanduapo jyvehe ĩmepyreva jyve Pyndeja vate arapy’õ.

Arakuaa opa mba’e ryheva

2 Pirure katu, pimoã ryheve hareka pymeẽ pyndy’ajetekue Tũpape. 3 Pirurejyve yryrehe, Tũpa tiñono’ore mbe’uha verã ko ñee hareka mbykuaahaka kavi verã Cristo ña’ãpoa ñemiape’õ, hai rehe shymbyperesoha. 4 Pirure jyve shyrehe ambeu kavi verã kova ñee, aikuaaka kavi verã marãrapo ajapo. 5 Ãrãndupe piko hãndi Cristo jyrojambaterihevare, pipory kavi hoka ara pijetashu verãre. 6 Pijeta kaviñoĩpo hareka pyrymbyhorypo, pikuaa kavi verã marãrapo pymbyhovaishu reta.

Ñymarãndu opahea

7 Ñandyryvy jahaihuva Tíquico, hekope kavi jokueharea hareka pyrỹmboryñoĩva Ñandeja rehe, opapo mbeupekui marãra aiko. 8 Ha’erã ãmondo pẽĩvape, mbeupe verã marãra ĩmehã’ẽ hareka pynymykyrẽy verã. 9 Oho jyve hãndi Onésimo ñandyryvy jahaihuva, hareka hai pyndyryheva jyve; hai retapo opa mbeupekui mbaivara iko koipi. 10 Aristarco, shymbyperesoa hãndiva, pynymymarãndu; Marcos hai Bernabé tyvy. Ãmbeumape marãrapopyre Marcos, hãme rãnga oho pẽĩvaperã pymyvãhẽ kavishukui. 11 Pynymymarãndu jyve Jesús, Heko Kaviva he’iashua. Kova mbahapy’õ retaĩñoĩte rãnga jyroja israelitare mbyteivi mba’apo shendie Tũpa ẽvãpe’õ ryheva pevarã, hãrã haire heta shymykyrẽỹ. 12 Pynymarãndu jyve Epafras, Cristo jokueva, hai rãnga jyve pente pyndyryheva. Hai heta õñehãã jurure’i pyndyreherã, tãntangãtu pẽĩ verã, porãmba pijapombape hareka opa kavi pijapo verã Tũpa potava. 13 She ahesha marãra Epafras heta ojepy’apy pyndyrehe, handi tenta Laodicea hareka Hierapolispe’õre. 14 Pyrỹpỹhãno’ia haihuhava Lucas, pynymarãndu, hareka jyve Demas. 15 Pymymarãndu ñandyryvyre ĩme’õ Laodiceape. Pymarãndu jyveshu ñanĩĩndy Ninfa, hareka Cristo ryhevare hai hentape ñymbaty hãndivare. 16 Kova kuatia mbyparahava mbijetahama’ẽ pymbyteperã, pyrahaka mbijetahashu verã jyve Laodiceape’õre tũpaope; hareka pimbijeta jyve hoka kuatia ajaposhu vekuare. 17 Kyrã pere jyveshu Arquipo: “Eñehãã opa kavi japo Ñandeja meẽ nde vekua rijapo verã”. 18 She Pablo, shepopetei ambyparape kova marãndu. Pymandua shyrehe shymbyperesoavape. Tũpa tiñono pearẽ jyhaihukue. Amén.