Ephesians 1
Pablo marãndu Éfesope’õre
1She hai Pablo, Jesucristo apostol Tũpa potava rupii, amarãndu opaite heko kyamba hareka hekope kavi Cristo jyrojahea Éfesope’õre. 2She airureshu Tũpa, Ñanderu hareka Ñandeja Jesucristo, tymeẽpe pya kavikue hareka pyavapy.Mbai haikaviva Espiritupy Cristore
3Toñemombai vasu Tũpa, Ñandeja Jesucristo Tuu, shara hai ñono ñandypyape mbai haikaviva vate araivi ouva Cristo rupii. 4Tũpa rãnga ñanypyhỹrõ Cristo rupii ko yvy jerekue ndei japoharã, heko kyambape jaiko verã hareka mbai porãmba jajapombape Hai hỹnonde. Jyhaihukuepe, 5arykaivaĩ ñandyraihuiterã ñanypyhỹrõ hareka ñandyreky jaiko verã ta’yrãveite Jesucristo rupii, shara kyrã japo Hai potava rãĩmi. 6Kyrãpo ñamombai vasuñoĩshu Tũpa shara ñandyraihuite, hareka hai ĩãrẽve meẽjy ñande mbai haikaviva Tay haihuva rupii. 7Hai mbyhepy ñandyrehe ñanynohẽajy verã hareka hajareii ñandyhevi porãmba jajapo vekua, Tay huvy ĩñohẽva rupii, kyrã hai japo shara pyryraihukue opããshi hai. 8Hareka ñandyraihuiterã, ñanymynyhẽ ãrãndu hareka mbaikuaa, 9hareka kuaaka ñande mbai Hai potava kuaretare ñomiãreshia Cristo rupii, shara kyrã Hai pota. 10Shara vãhẽpokui ara ñonoãva, Tũpa opapo mbatykui Cristore opa maĩnunga, opaite mbai ẽvã vate arapy hareka yvy‘ĩãrẽ’õre. 11Tũpa, Cristo rupii, arykaivaĩ hai heimba ñanynohẽ verã mbai porãmba vekuaivi ta’yrã, hokava rãnga Hai pota japova, hareka Hai potava japoñoĩ. 12Kyrã japo shara pota ñande Judiore tynonde jairojahe Cristo, jaiko ñamombai vasu verã ñymbaikatukue. 13Haire jyve Pee pyhendurã ñee añeteva, Ñee Kavi verupeva ojepeva ryheva, hareka pyrojarã, ñonoã pyndyrehe pynymyha’ãngahapy Espiritu Santo me’ẽã verã. 14Espiritu Santo rãnga hai me’ẽã ñandeva Tũpa ña’apova meẽ verã, opama ñambapy kavi mbyhepya ñandyreheva ñanynohẽajy verã, omomba’ea vasushu verã.Pablo ñymboihe Tũpao Éfesope’õ
15Jypy aikuaarãvãĩ, she ahendu marãra piroja Ñandeja Jesure hareka jyhaihukue ĩmepyrea opaite heko kyambare hãndi, 16hãme rãnga opa ara she amyvãhẽ shypya horykue Tũpape pyndyrehe, hãrã airurerã shymanduañoĩ pyndyrehe. 17Airureshu Tũpa Ñandeja Jesucristo, jaishu Tũpa hĩmbipeva, tymeẽpe mbai pikuaa verã Espiritupy hareka pikuaa kavi verã, heshakape verã hai ñymbai kuaakuepy. 18Airurejy Tũpape pyndypyape sape verã, pikuaa kavi verã mbaivara ñyhãrõ kavi pynyrẽnohavape, haikavi hĩmbipeva hareka mbai hepyva pyrỹmondo jepeva Tũpa meẽshuva heko kyambare, 19hareka ojaimbava, japyãvãĩjy ñymbai katukue, mba’apo ñandyrehe jairojava. Tũpa ñymbai katukue japyã; hokava mbaikatupy. 20Hãma Tũpa mynguerajy Cristorã, meẽshu ẽẽ verãpe vate arapy, jakata kyty hai vapyape, 21hokava mbaikatupy, Tũpa opa meẽshu Cristo opaite mbaikatu espiritupy opaite ĩmereva, hareka opaite mburuvisha, hareka opaite õĩva ko yvy jerekuepy hareka py’ahu ou verã. 22Hãrã hai ñono Cristo tũpao ñakarã. 23Hareka Cristo teiva opa mynyhẽ tũpao hareka opa mbaire.
Copyright information for
TpjSC