Eph 2 | TpjSC | STEP | Hai rãnga pynymbyhykovejy, pymanoma vekua pyndyreko porãmbape hareka mbai porãmba vekuape,

Ephesians 2

Tũpa ñanynohe ñymanoivi Cristo rupii

1 Hai rãnga pynymbyhykovejy, pymanoma vekua pyndyreko porãmbape hareka mbai porãmba vekuape, 2 pee piko vekua porãmbape, kuareta yvy‘ĩãrẽ’iare heko porãmba rãĩmi, pijapopi espiritu pyntuva ipope’õre potava, espiritu ã’ẽ mypyrãntareva ñymbaikatukue tyrayre ñee hendumba rupii. 3 Opaite ore kyrã ikoha jyve aryka’e, ikoha’i yryrete hareka yrypyape ñanduva rãĩmi. Yryroo potavaĩ japoha’i, hãme rãnga Tũpa ity yryrehe poshykue, yngavare japohea rãĩmi. 4 Tẽvã Tũpa pyryparekova hareka ñandyraihuva ryhevarã, 5 ñanymynguerajy hãndi Cristo, mbai porãmbape ñamanoterirã vekua. Kyrã Tũpa jyhaihukue rupii jahajepe. 6 Tũpa ñanymynguerajy hãndi Cristo hareka ñanymbyvapy hãndi vate arapy. 7 Kova japo heshaka verã ara ou verãpe marãra hai ñandyraihu hareka ñandypareko Jesucristo rupii. 8 Pee rãnga pehojepe Tũpa jyhaihu rupii, shara pirojaherã. Kova mbai ha’eã peii pijapo vekua rupii, Tũpa me’ẽĩpeva rãnga. 9 Ha’eã rãnga penteva mbai japova rupii, hãrã mbaveãpo ha’ei ñymbyvate hei ha’ĩ ohojepeva. 10 Shara Tũpa japo vekua hai ñande, hãma ñandapoha Jesucristo rehe mbai haikaviva jajapo verã, arykaivaĩ Tũpa ñono ñanynonderãpe jajapo verã.

Pente ñeepeĩ Cristo opa ñaniñono

11 Hãrã pynymanduahe ĩrũ arajyape teripeĩrã, haimba Judiore pyndyroope, pynyrẽnoha pire chĩchĩambaa mbyheava “pire chĩchĩava” japohava tyretere kuareta ipo rupii. 12 Hoka arape pee pime arykai Cristombape hareka ha’eãvaĩjype Israelita ryhevare, Tũpa ĩñee meẽ vekua pindipityãpe hareka hai hei vekua meẽ verã. Piko mbaimba pyhãrõva hareka Tũpambape yvy’ĩãrẽ. 13 Tẽvã pee mbyry piko vekua Tũpaivi ã’ẽ mbyryveãma pẽĩshi Jesucristo, shara pente ñeepeĩma pẽĩhe Cristo huvy rupii. 14 Cristo rãnga hai ñanymbypya symyĩva, Judio hareka Judiombava retaivi japoshi pente tenta, shara hai opa ityka jochava Judio hareka Judiombava pãũpe’i vekua, hãrã ã’ẽ haiveãma ijeshatambaa jyreva. 15 Heteteiva rupii Cristo mby’opa Moisés mbypara vekua rekova japoava hareka ñeẽ japoa verã, hãrã japoshi mokueivi pente tenta py’ahuva ñymypente hãndia rupii. Kyrã ñono pyakavi Judiore hareka haimba Judiovare pãũpe. 16 Kyrã Cristo kurusure mano rupii, Tũpa japo Judiore hareka haimba Judiore iñiñono verãre pente ñeepe Hai hãndi, poima ijeshatamba verãre hareka pente tyretepeĩ jyre verã. 17 Cristo rãnga oumba mbeu ñee haikaviva veruva pya kavi opava retape, pee pevarã Judiombavare mbyry pẽĩva Tũpaivi, hareka Judiovare mbyrymba’ẽshiare Tũpa. 18 Hãrã Cristo rupii opavare ã’ẽ Judio hareka haimbavare, katuma ñavãhẽ Tuu ẽvãpe pente Espiritu rupii. 19 Hãrã pee haiveãma tenta mbyryvare jy’yvymbape, pente tenta kyamba jyvepe Tũpa ña’ãpova. Pee rãnga hai jyve Tũpa henta ĩrũre. 20 Pee rãnga hai oo mupũ’ãhava oo jypy apostol hareka Tũpa ĩñee mbeu’iare ñono vekua, hãrã Jesucristo teiva hai ita oo jypy pyrãtaveva. 21 Cristo rupii rãnga oo opa kavi oja ijehe, pũã oho ikoshi verã pente tũpao heko kyamba oja kaviheva Ñandeja. 22 Hãrã pee Cristo rupii hai jyvepe tũpao ryheva, Tũpa ikovape Espiritu rupii.