Eph 3 | TpjSC | STEP | She, Pablo, shymbyperesoava Jesucristo aijokueka’aishurã, pyndyrehe judiombavare.

Ephesians 3

Pablo ñimiñeepy ñee kaviva Judiomba retape

1 She, Pablo, shymbyperesoava Jesucristo aijokueka’aishurã, pyndyrehe judiombavare. 2 Shara katu pyhendutẽvã Tũpa meẽsheva ajapo verã, jyhaihukue rupii amba’apo verã pynypãũpe. 3 Tũpa kuaakashe maĩnunga hai ñomireva, katy ambyparamape mishiĩ. 4 Pimbijetama peĩrã, pikuapo pymondo aikuaava hoka Cristo ryheva kuaahamba. 5 Hoka kuaahakambava aryka’evare jy’arape, ã’ẽ Tũpa heshaka jy’apostol hareka Tũpa ĩñee mbeu’ia heko kyambare Espiritu hai ryheva rupii. 6 Hãrã kuaahamba vekua hai kova: Jesucristo Ñee Kaviva rupii haimba Judiore myvahe verã jyve pyrỹmondojepeva, hareka ĩñee meẽva tenta Israelva retape, hareka pente tentaĩ iko hãndi verã Israel. 7 She, Pablo, Tũpa japo shyhevi shokuerã ambeu verã ĩñee kavi jyhaihukue hareka ñymbaikatu rupii. 8 She, shimishĩveva opaite heko kyamba retaivi, tẽvã Hai meẽshe, jyhaihukue rupii, ambeu verã Ñee kaviva haimbaa Judio retape hareka jahe mbai haikaviva Cristo ryheva, 9 meẽjyshe opaite apyrỹmbykuaaka verã opa rupi kova Tũpa, opava japova, arykaivaĩ ñomireva opa ara. 10 Kyrã, tũpaope ẽvã reta rupii, Tũpa jokuevare hareka Espiritu ñymbaikatuva yvyture iare kuaapo Tũpa opa kuaava. 11 Kova rãnga hai Tũpa arykaivaĩ pota japorea hãrã my’ãñete Ñandeja Jesucristo rupii. 12 Ñameẽshu ñandyvya Cristo, shara jairojaherã, jareko pyrãtãkue jahahe verã Tũpa jakyjembape. 13 Hãme rãnga she airure pee, avy piñymykangy verã ko she ahasa’asy ãĩ pyndyreheva rehe, kova rãnga hai mbai tivishaveva pee pevarã jyve.

Pablo jurure Éfesope’õre hykovere

14 Kovare, she aiñesu Ñandeja Jesucristo hỹnonde, ^{▼▼Kova ñee “Ñandeja Jesucristo hỹnonde” mba’ety arykai mbypara vekuapy.} 15 opa mbai ẽvã japo vekua, arare hareka yvy’ĩãrẽ, 16 airure Sherupe, tymeẽpe ña’ãpova mashyãva, tymeẽpe mbaikatu hareka pyndypyape pyrãtakue jy Espiritu rupii, 17 hareka Cristo iko verã pyndypyape jyrojakue rupii, hareka tantagãtu peĩ verã jyhaihupe Tũpare hareka opaite yngavare, 18 Hãmerãpo pikua handikui opaite tenta kyamba Tũpa ryhevare, Cristo jyhaihukue, pukukue, tivishakue, vatekue hãndi kypekue, 19 airure Tũpape pikuaa verã hokava jyhaihu, tivishaveva jaikuaa verã, heta pyheky verã opaite Tũpa ĩmereva meẽpe verã. 20 Hãrã ã’ẽ, toñemombai vasu Tũpa ñymbaikatuva japo verã hetaiteve hoka ñande jairureva maĩrã ñaĩmoãtẽva, hareka ñymbaikatukue rupii heta japo mbai kavi ñandypy. 21 Opaite tũpao Cristo ryhevare ñaĩva ñamombaiñoĩshupe. Amén.