Ephesians 4

Pente pyapeĩ Espiritu Santo rupii

1She Pablo, shymbyperesoava Ñandeja rehe, airurepe piko verã hekope kavi Tũpa potava rãĩmi, pee pynyrẽno vekua. 2Peñemomishĩgãtu, pijyhaihu hareka piñyharõ kavi hareka piñymbory katu jyhaihupe. 3Piñyhãã katu piko pente pyapeĩ, hãrãpo poiãã pente ñeepe peĩ Espiritu meẽpeva, 4pee hai pente tyreteĩ hareka pente Espirituĩ, pynyrẽnohava rãĩmi pente ñyhãrõpeĩ ohojepevape. 5Penteĩ rãnga ẽẽ Ñandeja, jyrojakue hareka ñymyngaraiva, 6penteĩ ẽẽ Tũpa, hareka opavare Tuu, ẽvã opava maĩnunga ĩãrẽ, mba’apova opavare rupii hareka opava retare. 7Pepenteĩ meẽ ñande Cristo mbai jaikatujare verã, hai potava rãĩmi. 8Kuatia mbyparahavape heiva rãĩmi: Jupijy vate arapyrã raha ijehe heta jokuaha vekua, hãrã kuareta retape meẽ mbaikaviva. 9Mbaivara he’ise ko “jupijyva”? Hokava he’ise tynonde vejyva, yvy huvapeve. 10Hoka vejy vekua rãnga ha’ẽĩjy jupijyva vate arapy, opa mynyhẽ verã hai ẽvãpe. 11Haiteiva ñonojy apostolre; yngavape Tũpa ĩñee mbeu’ia; yngavape Ñee kaviva mbeu verã, hareka yngavape ñyngareko pyryre verãre hareka pyrỹmboi’i verã, 12kyrã ñono kavi heko kyambare jokue verã, mupuã verãre Cristo hete, 13japity peve opaite pente jyrojavapeĩ ñaĩ verã hareka Tũpa Ray ñy’arãndukuepy, pente kuimbai heko kaviva, Cristo tynyhẽva jyvajekuepy. 14Jaikoveãma verã sanjay rãĩmi pya mokuepe, kokoty ñandyraha yvyture ñee pyrỹmbo’eaheva py’ahuva ñanymbytavypeve kuareta japuva ikova tyrape javyape ñandyrahavape, ñahendushi verã mbai tykove mbai kuava japu ryheve pyrỹmboi’iva, pyrỹmbytavy hareka pyryraha verã pee javy verãĩpi. 15Haikavive rãnga jaiko jyhaihupe, hareka añeteva haykue, jyvache ñapuã verã hekope kavi Cristo hãndi. Haiteiva rãnga tũpao ñaka. 16Ko tũpao rãnga ẽẽ kavi hareka ñimbivapy ijehe hãrã pepetẽĩ tyrete ryheva japo kavi maĩnungarã, jyvache puã hareka puã kavi jyhaihupe.

Tykove py’ahu Cristo rupii

17Kova she haipeva, hareka airurepeva Ñandeja heepe: Pikovẽãma verã Tũpa kuambavare rãĩmi, mbaimba vekuareĩ pya mbijeta’ivare, 18hareka ñaka opa pyntushiva. Haire mba’etyre ko tykove ouva Tũpaivi, mba’ẽã kuaa retarã hareka pya tãtãivi. 19Hama ñynotiveama ñymeẽ tykove porãmbape, japo verã opa maĩnunga kyaava pota japoivĩ. 20Tẽvã kova ha’eã Cristo pynymboiheva. 21Pee rãnga pyhendushi, hareka pirojaherã rehe pynymbo’eha kavihe vekua, haiva Jesús ryheva añeteva. 22Hãrã, pijyheja pyndyreko arykaiva ryhevaivi, hareka ỹnteño piko arykaiva rãĩmi. Kyrã pikopirã rãnga opa piñymbai, pyma’ẽĩhe mbai porãmba pynymbytavy’irã. 23Pee rãnga piñymbypy’ahupo pyndyrykovepy hareka pyndypyape, 24hãrã pymondepo tykove py’ahu, Tũpa japo vekua hekope kavi. Hokava heshahapo pyndyrehe, pyndyreko katu kaviape hareka kyambape, hãndi añetevape pikorã. 25Hãma ỹnteñoma piko jipive japupe, pere pepetẽĩ hoka ñee añeteva papisha retape, shara opaite ñande ha’ĩ jyve pente tyrete ryheva. 26Pee pyndyposhyrã, avy mbai porãmba pijapo; hareka avy tiche jepe pyndyhevi kuarasy, pypoi pyndyposhy verã. 27Avy pymeẽshu Ãña ẽẽ verã pyndyrykovepe. 28Hoka manarõ’i vekua, ỹnteño tymanarõ hãma tiñiñono tymba’apo, tijapo maĩnunga kavi ipo rupii ĩmere meẽ verã jyve pavete’ia retape. 29Avy tõhẽ ñee kyava pindijuruivi, pere jyve ñee haikaviva henduvare mykỹrẽ’ỹ hareka mbypya kavi verã. 30Avy pymbyvy’ãpi Tũpa Espiritu Santo, shara Espiritu hãĩ jyve ñanymyhã’ãngapya heshakava ñande hai Tũpa ryhevarã, opava retape me’ẽha jahajepe verã. 31Pyheja opa marãrãgãture pya porãmba, pyaposhy, sapukerei hareka ñee poporãmbavare hareka opaite mbai porãmba vekua. 32Pyndypya kavi pindijupive, hãndi pijypareko hareka pyhejarei ijuhuvi mbai porãmba pijapo vekua, Tũpa hejareii pyndyheviva rãĩmi Cristo rupii.