Ephesians 5

Marãrapo iko Tũpa tayre

1Pee haiva Tũpa tayre hai haihuiva, piñyhããpo piko Hai ikova rãĩmi. 2Piko jyhaihuvape Cristo ñandyraihuva rãĩmi. Cristo hykove meẽ ñandyrehe vekua, pente avisha ray jukahava rãĩmi hareka me’ẽãva Tũpape pishe katuva. 3Pee rãnga hai tenta kyamba Tũpa ryheva, hãme rãnga avypo pijetahe kyrãrãĩ’ia ryheva, mbai kyavaremba, maĩrã maĩnungare heta ĩmepyre verã, shara kova ha’ẽã hai Tũpa ryheva kyambarepeva. 4Avy pere mbai pyrỹmymarãva, mbai porãmbava, ñee porãmbava, jyrojavare ha’ẽã kyrã ijeta verã; hokava hendape pymeẽ pyndyvya Tũpape opa mbai meẽpevare. 5Pikuaa kavipojy kova: Omendambape iko’ia maĩrã mbai kyava japo’ia, maĩrã kateỹva, haijy ta’ãngareii õmombai’ia; icheãpo Cristo hareka Tũpa ẽvãpe. 6Avy mbava pynymbytavy ñeereivape, kova mbai rehe rãnga verupo Tũpa ñunũpa pohyiteveva opaite ñee hendumbava ĩãrẽ. 7Avypo piko jyve handi haire mbai porãmba japovape. 8Pee rãnga pikopi pyntuape arykai, tẽvã ã’ẽ pikoma Ñandeja jysapekape; hĩmbipevapepo piko, tyrayre hendyape’ia rãĩmipo piko. 9Hoka sapevaivi rãnga õhẽ mbai haikaviva, heko kaviva hareka añeteva. 10Piñyhãã pikuaa mbaivarapo mbyvyashu Tũpa. 11Avy pijapo Tũpare jyrojambare japova mbaimba vekua, pyntuape iko’ia reta rãĩmi, katynga pymbykuaakapo javyape. 12Shara ñanoti ñambeu mbai haire ñemiapẽĩ japova; 13sapeva hẽndyrã, opa mbai heshaha hareka kuaaha, hãrã kuaaha marãra. 14Hokava rehe rãnga he’iha:
Sareko nde recherẽĩva. Pũã manovare pãũvi hãrã Cristo sapepo ndyrehe.

15Hãrã, pymaĩ kavi marãra jyre, avy piko mbaimba pya mbijetaheare rãĩmi, piko jyve mbai kuaakue tynyhẽ’ia rãĩmi. 16Pipory kuaapo ara pimepẽĩvape, shara porãã ara ouva. 17Avy piko pya mbijetambare rãĩmi kuambaa mbaivara iko, pikuaapo jyve mbaivara Ñandeja pota. 18Avy piñymyngaupi vinopy, hokava rãnga pyrỹmbai, pynytynyhẽ jyve Espiritu Santo. 19Pijeta ijupiirã pipory ñee ouva Salmovi, hareka heta mbyrahe Espiritu Santoivi ouva pyraheva tũpaope. 20Pymeẽshu opa arape pyndyvya, Tũpa, Ñandeja Jesucristo heepe.

Marãrapo tyreko hareka teme iko ijupii

21Pijapo kavi pijehe Cristo jyhaihukue rupii. 22Tyreko reta kyrẽỹpeñoĩpo japo ĩme ĩñee, Ñandejape japo’õva rãĩmi. 23Hãma teme reta hai tyrekore ñakã, Cristo hai ñakã tũpaore rãĩmi. Cristo rãnga jyve hoka tũpaore mondojepe verã, hokava tũpaore hai hete; 24hãrã kyrã tũpaore ẽẽ jyve haikavi japo verã Cristo ĩñee, kyrãĩ jyve tyreko opa tijapo ĩme ĩñee. 25Hoka temere tyhaihu kavi tyrekope, Cristo haihuva rãĩmi jyve tũpaore, hãrã hai meẽ manohe verãre. 26Hai mano japo ñandyhevi verã Hai pevarãĩ, johema hai ĩñee kavi rupii yype joheava rãĩmi. 27Cristo teivapo veru hãrã ñonopo hỹnonde pente tũpao verava hareka mashỹãva, opa hejava porãmba vekua, hareka pyrãtava hareka õĩheare heko kyamba verã, hekope kavi vata verã. 28Hãrã kyrã teme reta haihu kaviñoiposhu hyreko, haihuva rãĩmi jyve hete. Hyreko haihu kavishuva, hai ijupẽĩ jyhaihu jyve. 29Mba’ety rãnga hete haihumbava, myngaru hareka ñyngareko jyvehe, Cristo rãnga kyrã japo jyve hoka tũpaope õre, 30shara ñande hai jyve ñaĩva hetere, japoava ho’oivi hareka kãvẽivi. 31Mbyparahavape heiva rãĩmi:
“Kuimbai hejapo tuu hareka ishy hareka ñymypenteĩ hãndi verã hyreko, haivi mokue’õre ikoshi verã pentevaĩ hete”.

32Mbai vasu tivishava ko kuaambava heiha ñande; hãrã shee hai pee tũpaore hareka Cristo. 33Tẽvã pee jyve, hykuaĩ haijype pepenteĩ haihu verã hyreko hai ijyhaihuva rãĩmi.