Eph 6 | TpjSC | STEP | Shyrayre, pyhẽndu hareka pijaposhu perure heipeva, shara kova hai hekope kavi jaikorã.

Ephesians 6

Marãrapo terure iko hãndi tayre

1 Shyrayre, pyhẽndu hareka pijaposhu perure heipeva, shara kova hai hekope kavi jaikorã. 2 Ñee japoa verã hareka ñee me’ẽãva ryhevape hei: “Japoshu nderu hareka ndesy heindeva, 3 ryvya hareka riko puku verã ko yvy’ĩãrẽ”. 4 Hãrã pee terure, avy pijahe porããhe pyndyrayre pymbyposhy verã, koñeĩ pymbykuakuapo hareka pymboi jyvehe heko kavi verã Tũpa potava rãĩmi.

Jokueharea japo vẽrã

5 Pee jokuehareare, ñee pyhendushu pokue’ia ko yvy’ĩãrẽ, mbyveteavape hareka japumbape, pijapo hai heipeva hareka pya kavi ryheve, jokueharea Cristo pevarã japo’ia rãĩmi. 6 Pijapo kavi maĩnunga mbe’uhape pijapo verã, ha’ẽã peja maĩ’ẽ pyndyrehe rãmẽĩ haikavi pijapo pota haikavi pẽĩ hãndirã, Cristo jokuerea rãĩmi jyve, pijapo kavi pyndypyaivive Tũpa potava. 7 Pijapo kavi maĩnunga pijapova kyrẽ’ỹpe, Ñandeja pevarã hareka ha’eã kuaretare pevarã. 8 Pee rãnga pikuama Tũpa myngovia kavijyshu pepenteĩ japovare, timeĩpo jokueharea maĩrã haimbaa jokueharea retape. 9 Hãrã pee pyrokue’õre, kyrãpo pijapo jyve pijokue pyrea hãndi, pijeta pohymbashuape. Pynymanduahe haire hareka pee ĩmepyre jyve penteva Pyndejaĩ vate arapy, hareka Hai opaite jyvache maĩ kavihe.

Tũpa mondea tãtãva ñyrãrõ pevarã

10 Piñymypyrãta katu Ñandeja ñymbaikatukuepy, symyĩgãtu pẽĩ verã ãña ouma pypeñã verãrã japukuepe. 11 Piñymondepy opaite ñyrãrõpe ijochapya Tũpa meẽpeva pirãrõpy verã, Ãña oupo pyndypyarãã, kyrãrãpo pee tantangãtu pẽĩ. 12 Ñande ñaĩrãrõ ãña handi kuaretare, mbai poshyre juhuvisha reta rãnga ñaĩñymbivaisho vate arape’õre, pyrãntava hareka ko yvy ipope’ẽvã, jaikopyva pyntuva rãĩmi timimbiva. 13 Hãma, piñymonde kavipy opaite ñyrãrõpe mondeava Tũpa meẽpeva, pijepyhe verã hareka vãhẽma pee ara mbai porãmba Ãña ñonopeva, haivi opama pyhasa mbai porãmbavarã, pee pypyrããtapo pẽĩ. 14 Symyĩ katu pẽĩ, japumbape piko tukua jokuahapya añeteva, hareka pijocha pitia ijojahasepya tykove kavipe. 15 Pẽĩ kavi piñimĩñee verã Tũpa Ñee Kaviva pya vapy ryheva rehe, ko syndaro ẽẽ kaviva rãĩmi mondema ipy ryhevarã. 16 Opa kova ĩãrẽ, pirojakue Tũpare pindijochashi ijochahasepya rãĩmi mbove verã heta hendyva ãña ñyvãka. 17 Pyrỹmondo jepeva Tũpa ryheva tijocha pãka tãka jochahasepya rãĩmi hareka pypysy Tũpa ĩñee kyse pukuva rãĩmi Espiritu meẽpeva. 18 Pimboi jyvyĩ Tũpape pirure Espiritupy pymaĩ kavi pyndykovere hareka avy pypoi pimbo’ehe opaite heko kyambare. 19 Pimboi jyve shyrehe Tũpa meẽshe verã ñee hareka jyroja katu aijetama aĩrã Ñee Kavivapy, pyntuape’i vekua tẽvã ã’ẽ Hai pota kuaaka. 20 Tũpa shymondo ambeu verã ko ñee hãme rãnga ã’ẽ shymbyperesoha. Tẽvã pimboi shyrehe, aijetahe verã jyroja katupe, aijeta verã rãĩmi.

Ñymymarãndu koñymava ryheva

21 Tikiko, shyryvy ahaihuva hareka ñanymbory kaviñoĩ’iva mba’apope Tũpa pevarã, opaitepo mbykuaaka marãrate ãĩme ãĩ hareka mbaivara ajapo. 22 Hãrã ajokue ãĩ pee pẽĩvape, mbeupe verã marãra õĩha hareka pynymykyrẽỹ verã. 23 Tũpa Ñanderu, hareka Tũpa tay Jesucristo tymeẽ ñandyryvy retape pyavapy hareka jyhaihu, jyroja ryheve. 24 Hãrã Tũpa tymãĩ kavihe opaite haihuva Ñandeja Jesucristo, jyhaihu opamba verã ryheva. Amén.