Gal 1 | TpjSC | STEP | She Pablo, apostol, haimbaa kuaretare ñonova hareka kuaretare mondova, koñeĩ Jesucristo rupii hareka Tũpa, Jesúspe mupuãjy vekua manovare paũvi.

Galatians 1

Pablo mbyparashu kuatia tũpaore Galaciape’õre

1 She Pablo, apostol, haimbaa kuaretare ñonova hareka kuaretare mondova, koñeĩ Jesucristo rupii hareka Tũpa, Jesúspe mupuãjy vekua manovare paũvi. 2 She hareka opaite ñandyryvyre pynymarãndu pee tũpao reta Galaciape peĩva. 3 Tũpa hareka Ñandeja Jesucristo tymeẽpe pya kavi hareka tiñohẽ pyndyrehe pyavapykue. 4 Jesucristo rãnga meẽ hykove mbai porãmba jajapo vekua rehe, ñanynohẽ verã ko yvy‘ĩãrẽ’õre heko porãmba vekuaivi, Tũpa potava rãĩmi. 5 Opa ara toñemombai vasu Tũpa. Amén.

Penteĩ ẽẽ Ñee Kaviva

6 Mbyry rãnga amaĩ are’ãĩtemba pimymbyryshi Tũpa, pynyrẽnova heshakape pya kavi Jesucristo rupii, yngava ñee kavi pyroja verã. 7 Añete, mba’ety rãnga yngava Ñee kaviva, ĩmeĩ rãnga ẽẽ pota porãmba piniñonova, hareka pota yngai mbeujya Ñee kaviva Jesucristo ryheva. 8 Hãrã ore, maĩrã Tũpa jokueva mbeupe ynga ñee kavi, mbe’uha vekuaivirã, hokava tijaheahe. 9 Hãma he’iape vekua rãĩmi hykuaĩ haijype: Ĩme’ẽ pynymbytepe ñee kavi yngaiva mbeuvarã pymyvãhẽma vekuaivirã, tijaheahese. 10 Kyrã hairã: Ahekara kuaretare jururesheva maĩrã Tũpaivira? Ahekara aĩkavi hãndi verã kuaretare? Hãma potaĩ ãĩkavi hãndi kuareta retarã haiveãmaposhekui Jesucristo jokueva.

Pablo henõhã Cristo rupii

11 Aipota pikuaa shyryvyre: Ko Ñee kavi ambeupeva, ha’ẽã kuimbai japova. 12 Ha’eã me’ẽãshea, ha’eãvãĩjy aikuava kuareta retaivi, Jesucristo teiva rãnga heshakashe. 13 Shara pee pyhenduma marãra she aiko aryka’e Judiore aharã, marãra Tũpa ryhevare amoña’ai pyrãtape hareka ikohahe mbaia verã. 14 Judiore japova ajapo airã, ajapoveshi shyrẽta ĩrũre aivache hãndiare, ajema aingarekotehe ajapo verã sherure pyrỹmboiva rãĩmi. 15 Tẽvã hai pya’oshyrerã shesy hyepevãĩmba shypyhỹrõ hareka pya kavi ojaimbape shyrẽno. 16 Heshakashe Tay ambeu verã ĩñee haimba Judiore pãũpi. Hokava ikorã, mbava kuaretãã aha airureshu shymbarakuaa verã, 17 hareka ahaãvãĩjy Jerusalenpe ahesha verã apostolre tynonde shyhevivare, katynga aharavĩ Arabia kyty, haivi aijy Damascope. 18 Mbahapy ãñomajyrã aha Jerusalenpe, ahesha verã Pedro hareka haipe apyta hãndi 15 ara, 19 tẽvã aheshaã ĩrũ apostolre, koñeĩ ahesha Santiago Ñandeja Jesucristo tyvy. 20 Añeteva kova ambyparapeva. Tũpa kuaa shapuãrã! 21 Haivi ahajy Siria hareka Cilisia jy’yvyipi. 22 Akua arape, tũpao Cristo ryhevare Judeape’õre shykuaãteri reta. 23 Koñeĩ hendu pevẽĩte reta heiva: “Ñanymoña’i vekua, ã’ẽ mbeu’i jyve ñee kavi jyroja ryheva, aryka’e pota opa mbai’i vekua”. 24 Hãrã õmombai vasu reta Tũpa shara Hai yngai japojy shykove.