Gal 2 | TpjSC | STEP | Hasama 14 ãñorã ahajy hykuaĩ Jerusalenpe Bernabé hãndi, araha jyve shendie Tito.

Galatians 2

Pablo hareka ĩrũ apostolre

1 Hasama 14 ãñorã ahajy hykuaĩ Jerusalenpe Bernabé hãndi, araha jyve shendie Tito. 2 Tẽvã ahajy haipe heshahakasherã hareka aimbatyjy hãndi reta tũpao ñakarã’õre, ambeu kavishu reta Ñee kavi ambeuva haimba Judiova retape, opaite ãñehãvape ajapova opareimba verã. 3 Tẽvã Titopembaa, shimi‘ĩrũte’iva, jurureshuare pire chĩchĩka verã, ajema griegote haiva. 4 Ĩme‘ãmo’ẽ ñandyryvy rã’ãngavare ñemiape icheva ñanymbytepe, ñemiape maĩhe verã marãra Cristo ñanynohẽshi ñee pohyvaivi, pota japo reta jokuehareire verã Moisés mbypara vekuaperã. 5 Tẽvã õĩhãã haire pyrỹmboivape sapy’aiteimbaa, shara potañoĩ Ñee kavi añeteva ẽẽ yrypyape. 6 Tẽvã tũpao miñaka’iare vateve’õ, he’iãshe reta yngava añono verã apyrỹmboiheva. Haijyvepe she pevarã jyvavyã haikavira maĩrã mba’ety, shara Tũpa hỹnonde opaite kuimbaire jyvache. 7 Kyrã, haire hesha Tũpa meẽsheva ko ajapo verã hareka apyrỹmboihe verã Ñee Kaviva haimba Judiore pãũpi. Pedro hejahashuva rãĩmi jyve mbeu verã Judiore pãũpi. 8 Tũpa mondova Pedro apostolrã ñimiñee verã Judio retape, shymondo jyve ãñimiñee verã haimba Judio retape. 9 Santiago, Pedro hareka Juan, kuaahava huvisha pyrãntavare tũpaope mbai vasuvevare, kuaa mondo reta Tũpa meẽsheva ajapo verã hareka heshaka reta ñi’ĩrũ oreva, meẽ ore ipo she hareka Bernabé, hãrã pente ñeepe iñyñonoha ohoa verã Judiombavare’õpe hareka haire Judiore’õpe. 10 Koñeĩ pente mbai jurure, ore mandu’ahe verã pavete’iare, hãrã she aingareko kaviape ajapo.

Pablo ñyngãtashu Pedro

11 Tẽvã Pedro ouma tenta Antioquiaperã, hovapetei poshy ryheve haishu shara hai porãmbava japo. 12 Tynondeite rãnga karu’i hãndi Judiombavare, vãhẽ ohopeve Jacobo mondovare. Haipe õñepyro syryshi retarã, karuveã hãndi, shara kyje Judio retaivi. 13 Hãrã ĩrũ Judiore Jesús jyrojaheare, õñepyrõ ojejapo jyre, Pedro japova rãĩmi, kyraĩ jyve Bernabé. 14 Hãme aheshama haire ikoã ñee kavi añeteva heiva rãĩmirã, opavare hỹnonde ãĩngãtashu Pedro: “Nde Judiova, rikori Judio retamba ndeva rãĩmi, marã’ĩrãra akuarã pota rĩmiñerã Judiombare, iko verã Judio rãĩmi?”

Tũpa ñanymondojepe jairoja rupii Jesure

15 Ñande rãnga hai Judiore jaarãvaĩ, ha’eã mbai porãmba japo’ia hareka haimba Judiore rãĩmi. 16 Jaikuaa kavi rãnga koñeĩ Tũpa mbyhory Jesucristo jyrojaheare, hareka mba’ety ohojepe verã Moisés mbypara vekua japo’irã. Ore rãnga jyrojaha jyvehe Jesucristo, Tũpa mbyhorya verã jyrojahaherã. Shara mbaveãpo Tũpa mbyhory Moisés mbypara vekua japo’irã. 17 Hãrã ã’ẽ, ñañehãã ñandyreko kavi verã Jesucristo rupii, jaheshajy ñandijehe mbai porãmba japo’iarã. Hokavara he’ise, Jesucristo ñanymboryheva mbai porãmba jajapo jai verã? Mba’ety! 18 Hãrã she ambai pente Moisés mbyparava, hareka amupuãjyrã, she haima mbai porãmba japo’ia. 19 Moisés mbypara vekua pevarã rãnga she amanoma, tẽvã Tũpa pevarã ãĩmeĩ ai. 20 Kurusure Cristo amano hãndi, hãrã ã’ẽ sheĩĩveãma aiko, Cristoima iko’i shypyy. Hãrã ã’ẽ aikova shyretepe, aiko airoja rupii Tũpa tayre, shyraihuva hareka mano shyrehe vekua. 21 She katuã ambijiche Tũpa jyhaihukue, añete ñandyreko ky’ãã Tũpa hỹnonderã hareka Moisés mbypara vekua rupiirã, Cristo mano reitẽ verãmba.