Galatians 3

Moisés mbypara vekuara maĩrã Jesucristorerapo jairoja?

1Pee Galaciavare, marãĩra mbai’ãĩte pikuaa! Mbavara pynymbypaje? Heshahaka kavi rãnga pee marãra Jesucristo mano kurusure. 2Aipotaĩ pymbyhovaishe ko apyrãnduva: Vãhẽrape Tũpa Espiritu Santo Moisés mbypara vekua pijapopirã maĩrã pyroja ko Ñee kavivarãra? 3Mbai ãĩteira pikuaa, kyrã peñepyrõ Espiritu peva, hareka ã’ẽra pota pymby’opa mbai kuaretare hoope potava? 4Hetara pyhasa’asy, mbaimbaa verã? Katuã rãnga mbaimbape opa! 5Tũpa meẽpeje Espiritu hareka japo pyhesha verã heta mbaikavi heshaha verã. Marã’ĩrãra japo? Ha’eã Moisés mbypara vekua pijapopirã, Ñee kavi pyhendu vekua pyroja rãmeĩ rãnga.

Abraham jyroja rupii Tũpa heishu heko kaviva

6Kyrã Abraham jyroja Tũpare, hãrã Tũpa hesha jyrojakuerã, heihe kyamba Hai hỹnonde jyrojakue rupii. 7Hãrã pikuaapo ãñeteite Abraham tay reta hai jyrojavare. 8Kuatia mbyparaha vekuapy hei, haimba Judiore mbytepe’ẽpo jyve heko kaviva jyrojakue rupii. Hãma Tũpa, arykai, myvãhẽshu ko Ñee kavi Abrahampe: Opaite tenta vasure nde rupiipo mbai haikaviva hipitykui. 9Haima Abraham rãĩmi jyrojavare ohovasa jyveshu. 10Opaite jyrojaheva Moisés mbypara vekuare, jaheapohekui. Shara Tũpa ĩñeepe hei: “Jaheapohe japombava hekope kavi opaite ẽvã Moisés mbypara vekuapy”. 11Hãme rãnga jaikuaa kavi mba’ety rekohashua heko kaviva rãĩmi Moisés mbypara vekua rupii. Shara Tũpa ĩñeepe hei: “Heko kaviva ikopo jyroja rupii”. 12Moisés mbypara vekua rãnga hendã jyrojape, shara Tũpa ĩñeepe hei: “Opaite japova hekope kavi Moisés mbypara vekua, hai rupiipo iko”. 13Jesucristo rãnga ñanynohẽma Moisés mbypara vekua jyjaheivi, hãrã jaheatẽ ñandyrehe verã vekua oa ĩãrẽ, shara Tũpa ĩñeepe hei: “Jaheamahe yvyrare ñonoãva”. 14Hokava jehu, mbaikavi Tũpa ĩñee meẽshuva Abraham hipity verã reta jyve haimba Judiovare, Jesucristo rupii. Kyrã jairoja rupii opaiteva me’ẽã ñande verã Espiritu Tũpa hei vekua meẽ verã.

Moisés mbypara vekua hareka jyroja Jesucristore

15Shyryvyre, apyrỹmymandu’akapohe kuei jehu ñandeva: Pente kuimbai ynga japo hãndi ñee me’ẽãvarã, ñonohẽ hee kuatiaperã, mbaveãmapo mbaiva ñono jypy, japoa verãĩma’ẽ. 16Kyrã Tũpa ĩñee meẽshu Abraham hareka ñymoña hãndia. Tũpa ĩñee he’ĩã “Rĩmoña ndyheviare”, shara pentevareĩ ijeta, hãme rãnga hei “Ñymoña ndyhevia”, hokava hai Cristo. 17Aipota haiva rãnga hai kova: Tũpa, aryka’eite, japoshu Abraham ñee me’ẽãva, hãrã my’ãñetemba. Hãme rãnga Moisés mbypara vekua, ou vekua 430 ãñoma hasarã, katuãpo myporãã hoka ñee me’ẽãva hareka hejããpo mbaimbava rãĩmi Tũpa ĩñee. 18Tũpa hei vekua meẽ ñande verã ẽẽmba Moisés mbypara vekuaperã, haiveãmambapo ñee me’ẽãva. Ijykuaa kavi rãnga Tũpa heimbashu Abraham mbai meẽreishu verã. 19Hãma, mbai verãra haikavi Moisés mbypara vekua? Moisés mbypara vekua rãnga me’ẽhashu kuaretare heshaka verã porãmba japorã, ou peve tyray mbe’ua vekua ou verã. Kova japoa verã mbeu Tũpa jokuevare, Moisés rupii. 20Tẽvã Tũpa ĩñee meẽma Abrahamperã, haiteiva japo.

Cristo mby’opa Moisés mbypara vekua

21Kovara he’ise mbyparaha vekua ñymbyvaishoheva Tũpa ĩñee meẽ vekua? Mba’ety! Moisés mbypara vekua meẽ tykoverã, ãñete haivimbapo ou ñymbyheko kavikue. 22Tẽvã Tũpa ĩñeepe heiva rãĩmi, opaiteva hai mbai porãmba pysyva, pota opaite jyrojahea Jesucristo hipity Tũpa ĩñee meẽ vekuarã. 23Ko jyroja ndeiteri ourã, Moisés mbypara vekua ñaniñapiti’i, ñahãrõ kova jyroja, kuaaka peve. 24Oupeve Cristo, Moisés mbypara vekua sanjay rãĩmi ñyngareko ñandyrehe, japitypeve tykove haikaviva jairoja rupii. 25Tẽvã ã’ẽ vãhẽma ko jyrojakuerã, ñande õĩveãma Moisés mbypara vekua ñyngareko’i ñandyrehe verã, 26shara pirojaivivehe Jesucristo, iko pyndyhevi Tũpa tay. 27Shara ñymyngaraima retarã ñimi’ĩrũmahe Cristo hareka ã’ẽ hai rãĩmima jyre. 28Mba’etyma Judiovara maĩrã Greciavara, jokuehareara maĩrã ha’eãra jokueharea, kuimbaira maĩrã tauperã. Pirojama Jesucristorerã, opava pee pentevaĩma. 29Hãrã pee hai Cristo ryhevarã, pee hai Abraham tayre, hareka opaite pipitypo Tũpa ĩñee meẽ vekua.