Galatians 4

1Pota haipeva rãnga kova: Opaite maĩnunga ijarã ndeiteri’irã, hentape jokuearea rãĩmi’i jyve, ajema opaite maĩnunga ijarã ẽẽ jyve hoo’ipe. 2Ndeiterirã hetare maĩnungarã ĩmerejy ñyngarekoheshuva ña’ãpovare, tuu heishua arapeve. 3Kyrã iko jyve ñandyrehe. Ñanyndeiterijairã, jokuearea rãĩmi jaiko jyve kuaretare ipope potava rãĩmi. 4Vãhẽma hoka ara ñonohavaperã, Tũpa mboumbashu Tay, oa taupeivi hareka ou iko Moisés mbypara vekua heiva rãĩmi ipope. 5Kyrã ou hai ñandyreky verã Moisés mbypara vekuaivi, hareka Tũpa ñandyreky ta’yrã. 6Hãrã haima ñande tayrã, Tũpa ñonomba Tay jy Espiritu ñandypyape, hoka Espiritu sapukerã hei: “Abba” he’iseva “Sheru!” 7Kyrã jyve pee, haimape Tũpa tayre haiveamape jokuearea. Tũpa tayperã, Tũpa meẽpope opa mbai ĩñee meẽ vekua tay retape.

Pablo ojepy’apyhe Galasia jyrojavare

8Arykai, ndeiteri pikuaa Tũpaperã, Tũpa ha’ãngare mba’etyva haykue pijokuekapi. 9Ã’ẽ pikuamashu Tũpa, maĩrã haikavivera jairã, Tũpa pyndykuarã. Hãrã, marã’ĩrãra peijypo paykue pikojy verã arykai, piko vekua rãĩmi, pijokuekapeishu mbaikatu pyrãtamba hareka ãñetemba? 10Pee kuareta reta rãnga pymby’areteteri arete arare, jasyre hareka ãñore. 11She akyje ĩmerã amba’aporeira pynymbytepe. 12Shyryvyre; airurepe she rãĩmi piko verã, shara pee rãĩmima aijyve. Pee rãnga maĩnunga porãmba pijapoã shyrehe. 13Pikuamava rãĩmi, she tynonde ambeuperã vekua Ñee kaviva, shymbairasy’ai. 14Hoka mbairasykue haijyve pyndypyarãã verã, haĩmbajya hokava mbairasy rehe shymymorãmbapia hareka shyreshatãmbapia. Tẽvã ajemaĩ kyrãte, shymyvãhẽpi jyve peĩvape Tũpa jokueva rãĩmi, hãĩ Jesucristo pymyvãheva. 15Pyndysaremarahepe hoka vya pyreko vekuaivi? She aikuaa, katurã, pynohẽte verã pyndyresateiva pymeẽshe verã. 16Tẽvã ã’ẽ, shera hai pyndyvaisho, añeteva ambeuteperã? 17Ĩme rãnga’ẽ pyndyraihuva, tẽvã ha’eã haikavi verã pota pyndyreky yryhevi, pota haykue pehorã. 18Haikavi rãnga kuaretare mandua jyvehe yngavarerã, tẽvã tijapo kavi hareka opa ara, ha’ẽã she aĩme’aĩ penendierãmeĩ. 19Shyrayre, shyrasyitejy pyndyrehe, tesy memby’ẽ verã hasyshua rãĩmi, Cristo ijapopeve pyndypyape. 20Potaitianynga ã’ẽ aĩme’ãĩ penendie, yngai aijetape verã! Aikuãã mbaivara ajapopo pyndyrehe, shara pikova rãĩmi ñeembape shyreja!

Ñymyhã’ãnga Agar hareka Sara rãĩmi

21Pee pota pẽĩva Moisés mbypara vekua heiva rãĩmi, pereshe kova: Pyhenduãngamba hoka mbyparava hei vekua? 22Mbyparahavape hei Abraham ĩmereva mokue tay, penteva hai Agar taupe jokuearea memby, hareka ĩrũ hyrekoite Sara memby, hokava taupe ha’eã hai jokueharea. 23Kova jokuearea memby hai oa vekua kuaretare pya ohohea rãĩmi; taupe haimba jokuearea memby, tẽvã oa Tũpa ĩñee meẽva rãĩmi Abrahampe. 24Kova hai ñymyhã’ãngarã. Hoka mõkue taupe rupii rãnga he’ise mõkue ñee Tũpa meẽ vekua. Taupe Agar rupii ñande jaikuapo hoka ñee me’ẽã vekua, ita vate ouva Sinai ryheva. Hai memby retaivi oa jokuehañoĩre verã. 25Hoka Agar haĩ yvyturusu Sinai rãĩmiva, Arabiape’õ, ã’ẽ ova tenta Jerusalen. Shara haipe’iare Moisés mbypara vekuaĩ ijokueka jyreshu. 26Hoka tenta Jerusalen vate arapy’õ hai kova taupe haimba jokuearea, hokava hai opaiteva ñandesy. 27Shara mbyparahava hei: Vy’aĩ, nde taupe membymba’ia! Sapuke ryvy’akueivi nde rikuambava purua’ia hasymashurã! Hoka taupe ĩme heja vekua ã’ẽ hetavepore memby taupe ĩme’ivaivi. 28Shyryvyre, pee rãnga hai Isaac rãĩmiva, pee peava jyve Tũpa ĩñee meẽ vekua rupii hai ta’yrãre. 29Hãrã hoka arape puruava memby kuareta potava rãĩmi ijeshatãã hãndi Espiritu tay, kyrãngãti ikojy ã’ẽ. 30Tẽvã marãra hei Mbyparahava? Kyrã hei: “Mohẽ taupe jokueareirea memby ryheve, shara ko taupe jokuearea memby katũãpo ĩmere hoka opaite Tuu ña’ãpova haimba jokuearea memby ĩmerea rãĩmi”. 31Hãrã shyryvyre; ñande ha’eã ko taupe jokuearea memby, hoka taupe haimba jokuearea memby rãnga ñande.