Gal 5 | TpjSC | STEP | Ãñete rãnga Jesucristo poiika ñandyhevi jokueareire vekuaivi! Hãme rãnga piñymypyrãta mahẽ hykuaĩ ikojy pyhevikui jokueareirea Moisés mbypara vekuapy.

Galatians 5

Jesucristo rupii Tũpa poiika ñandyhevi

1 Ãñete rãnga Jesucristo poiika ñandyhevi jokueareire vekuaivi! Hãme rãnga piñymypyrãta mahẽ hykuaĩ ikojy pyhevikui jokueareirea Moisés mbypara vekuapy. 2 Shyrẽndupi: She Pablo, hai pee pypya pimbijetahe pipire pichĩchĩkarã peĩ verã heko kavi Tũpa hỹnonderã, pee pevarã Jesucristo manoreite verã. 3 She haipojype, ĩme’ẽ kuimbai pire chĩchĩkava, hai ẽẽma japoñoĩ verã Moisés mbypara vekua heiva rãĩmi. 4 Ĩme’ẽ peeva pota ijoheva Tũpa hỹnonde japo’i Moisés mbypara vekuarã, hoka kuareta syrymashi Jesucristo hareka mbijiche Tũpa jyhaihukue. 5 Tẽvã ñande, Espiritu rupii, ñahãrõ jyvyĩ he’ia ñandyrehe verã kyambaa Tũpa hỹnonde jairojakue rupii. 6 Ñande rãnga ñañymypenteĩ hãndi Cristo, hãrã mba’eã he’ise iripire chĩchĩhãkara maĩrã mba’ety, koñeĩ haikaviveva hai jyrojakue, hareka kova jyrojakue rupii jahaihu jyve ñandapishare. 7 Pee rãnga peñepyrõ kavitẽ kueve. Mbavara akuarã pindijoko pypoi pijapo verã añeteva? 8 Kova ouã Tũpaivi, shara hai pynyrẽno jyve. 9 Avy pyndysare, “levadura mishĩtẽvã opa mby’ou harina muhũ’ũava”. 10 Airojaite Ñandeja Tũpare pee pirojambajy verã yngavare; tẽvã Tũpa jahepohe hokava ma‘ẽĩmba’i pyndyreheva, jaishu ĩmerãẽvape. 11 Shyryvyre, apyrỹmboiteri aihe tipire chĩchĩãva ryhevarã, Judiore shymoñambatẽ verã, haima ñee Cristo jukurusu ryheva ambeuva mbyposhykambatẽ verãre. 12 Opaite iko ma‘ẽĩmba’i pyndyreheva pota pipire chĩchĩkarã, marãinga opãã jasyja ijuhuvi! 13 Pee rãnga shyryvyre piñyheno poia pyhevi verã. Avy pipory kova poia pyndyheviape pijapo verã pyndyroo potava, haikavivepo piñymbory jyhaihuperã. 14 Moisés mbypara vekua opaite ẽẽ penteapeĩ: “Haihu ndapisha nde rijyhaihuva rãĩmi”. 15 Tẽvã pee pindijupii pĩrãrõ hareka pijakapiva, pimo’ã, mahẽ peĩ opa piñymbaikui.

Piko Espiritu Santo potava rãĩmi

16 Hãme rãnga hai pee: Piko Espiritu Santo potava rãĩmi, hareka avy pijapo pyndyroo potava. 17 Shara tyrete potava ñymbyvaishohe Espiritu Santo, hareka Espiritu Santo potava ñymbyvaishohe tyrete potava. Kova mbai mokue’õre ñymbyvaisho ijehe pijapomba verã pee pipotava. 18 Hãrã ko Espiritu Santo potava rãĩmi pikorã, pẽĩveama’ipe Moisés mbypara vekua heiva rãĩmi. 19 Javaĩã jahesha ha’ĩĩ hete potavaĩ japo’ia, kova hai: Ynga pota’ijya, javasa heta’ia, kyava japo’ia hareka opaisharei’ia, 20 ñymombai vasu yngava Tũpa, ñymbypaje, pyryraihuã, ijeshatã, ñyngareko hareka poshyrei’i, potañoi ha’epaite, ñyrãrõ, pirĩmbijao’i, 21 pyryreshatãã, pirijuka, ka’u, karuraivi, hãrã japojy heta mbai kyrãva. Apyrỹmymandu’akajyhe haimapeva rãĩmi, kyrã’ia icheãpokui Tũpa ẽvãpe. 22 Espiritu Santoivi rãnga ou jyhaihu, vy’a, pyasymyĩ, ñyhãrõkua, pyakavi, mbaikavi, tãnta jyroja, 23 jyrojãã ijehe, ijyjokokuaa. Kova mbaire mba’ety ñee mbyparahava ñymbyvaishohe verã. 24 Tẽvã Cristo ryhevare, rahama reta kurusure heko porãmba vekua pyape’õ, hoo potava hareka mbai potakue ryheve. 25 Ã’ẽ jaiko Espiritu rupiirã, javatapo jyve Espiritu rupii. 26 Avy jairoja ñandijehe, avy ñañymbyposhyka hareka avy jaipota ñandapisha ña’ãpova.