Gal 6 | TpjSC | STEP | Shyryvyre, ĩme’ẽ oava pynymbytepe mbai porãmbaperã, pee pikova Espiritu Santo potava rãĩmi pymboryshu puãjy verã. Tẽvã pijapo pyakavi ryheve, hãrã pepenteĩ pingareko ijehe mahẽ peeave peajy vekui mbai porãmbape.

Galatians 6

Piñymbory katu

1 Shyryvyre, ĩme’ẽ oava pynymbytepe mbai porãmbaperã, pee pikova Espiritu Santo potava rãĩmi pymboryshu puãjy verã. Tẽvã pijapo pyakavi ryheve, hãrã pepenteĩ pingareko ijehe mahẽ peeave peajy vekui mbai porãmbape. 2 Piñymbory katu pyraha verã mbai pohypeva, kyrã opapo pijapo peho ñee mbyparahava Cristo ryheva. 3 Ĩme’ẽ pynymbytepe moã hai mbai vasuvarã, tẽvã mba‘erã’irã, ijupi ñymbytavy. 4 Hãrã pepenteĩpo maĩ ijehe hykovere, ñandu ijehe iko hekope kavirã, ha’ẽãpo ñimbivachehe verã yngavare. 5 Shara Tũpa hỹnonde pepenteĩpo japo, ha’ei japo verã. 6 Opaite mbo’eava ko ñee haikaviva rupii, opaite hipityva mbai kavi mbijaopoveshu mboirea. 7 Avy peii piñymbytavy: Mba’ety ñymbyhoryhe verã Tũpa. Opaite ñande ñañotyva, ñandeipo ñamynoojykui. 8 Kuaretare hykovepe ñotyva hetepe potava, mbai porãmba vekuaivi mynoõpo ñymano. Tẽvã ñoty Espiritu Santo potavarã, Espiritu Santoivipo mynoõ tykove opamba. 9 Hãrã avy ñanykangy jajapo verã mbai haikaviva; hãrã ñanate’ỹãrã vãhẽpokui ara ñamynoõ verãpe. 10 Hãrã katuteri jajapo mbai haikaviva opava retare, tẽvã tynondepo ñandyryvy jyrojava retare.

Pablo ĩñeẽ koñemahea hareka ñymarãndu

11 Pymaĩhe kova marãra shepopetei ko ñee marẽrẽỹ ambypara ãĩpe kuatiape. 12 Opaite pinimiñerã’iare piñichĩchĩka verã, japo pota pyta kavi hãndi kuareta retarã hareka potãã moñahã reta ñee Cristo kurusu ryheva reherã. 13 Hãrã opaite ñichĩchĩka vekuare, opãã japo jyve Moisés mbypara vekua heiva rãĩmi. Tẽvã haire pota peiĩ pipire pichĩchĩkashu, haivi jyrojahe verãre haire heiva pijaposhurã. 14 Tẽvã she katuã mbaivare airoja’ai shijehe, Jesucristo kurusureĩ rãnga. Shara Jesucristo kurusure mano rupii, she pevarã ko yvy manoma, hãrã she amanoma jyve ko yvy pevarã. 15 Ñañymypente hãndi Jesucristorã, mba’eã he’ise ñandipire chĩchĩãra maĩrã mba’etyra; koñeĩ haikavi Tũpa ñandapo py’aujyva. 16 Pyreko pya symyĩ hareka jyparekokue opaite ikova ko ñee heiva rãĩmi, opaite tenta Israel hãndi Tũpa ryhevare. 17 Ã’ẽvaĩ aipotaveãmapo mbava ñonokui shyraperãpe mbai porãmba, shara ĩme’are mbypereava shyretere, heshakava ahasa’asyva Jesús jokuereasherã. 18 Shyryvyre, Ñandeja Jesucristo tiñohẽ pyndyrehe mbai kavikue. Amén.