Heb 10 | TpjSC | STEP | Moisés mbypara vekua rãnga hai pente haikaviva heshaha verã Tũpa meẽ ñande verã. Hãrã mbyparahava katuã añeteĩte mbyhaikavi ñono opaite ãñope raha mymba jukarã meẽñoĩva Tũpa pevarã.

Hebrews 10

1 Moisés mbypara vekua rãnga hai pente haikaviva heshaha verã Tũpa meẽ ñande verã. Hãrã mbyparahava katuã añeteĩte mbyhaikavi ñono opaite ãñope raha mymba jukarã meẽñoĩva Tũpa pevarã. 2 Ãñete mbyparahava mbai porãmba joherã, mbaiveãmate reko ijehe verã hareka meẽveãmate verã mymba jukava ryheva Tũpa pevarã. 3 Tẽvã hokava mymba jukaha me’ẽãva ãñojyape koñeĩ mymandu’aka mbai porãmba japo vekuare, 4 shara katuã toro hareka kapura huvy opa heky mbai porãmba vekuare.

Cristo jukaharã vekua

5 Hãrã, Cristo ourã ko yvy ĩãrẽrã, heishu Tũpa: “Nde ripotãã mymba jukahava hareka me’ẽãreiva, koñeĩ rymeẽshe pente tyrete. 6 Mymba me’ẽãva hapyhava hareka me’ẽãva mbai pormba ryheva nymbyvy’ããpo”. 7 Hãme rãnga hai: “Kope ãĩ, Tũpa, ajapo verã nde ripotava, he’iha shyreheva rãĩmi kuatia ĩñeepe”. 8 Tynonde hei: “Ripotãã mymba jukahava hareka me’ẽhaiva heko porãmbare rehe hareka hapyavare hareka yngava rehembaa mbai porãmbare hekyshi verã; ndypya oho’ãĩteijyhe opaite hokavare me’ẽhaiva, ajema ñee mbyparahavape kyrãte ñonovare”. 9 Haivi hei: “Kope ãĩ, ajapo verã nde ripotava”, kyrã Cristo heky tynonde’õ ñonojy verã koñemahea. 10 Tũpa ñanymbyheko ky’ãã shara Jesucristo japoshu Tũpa potava ha’eĩ meẽ hete jukaha verã penteĩ hareka opa ara pevarã. 11 Opaite paire japoñoĩ jy’arete mbeu reta mymba jukahava ryheva, ajema mapemba heky verã mbai porãmba vekuare. 12 Tẽvã Jesucristo meẽma mbai porãmba vekuarerã penteĩ jukaha opa ara pevarã, vapy Tũpa jakata kyty. 13 Haivi hãrõĩma’ẽ hyvaishore ñonoha peveshu ipy ipe. 14 Shara pente mbai me’ẽãva rupimba añeteĩte mbyhaikavi opaite Tũpape ñymyngyambava. 15 Hãrã Espiritu Santo my’añete ñande hokava heirã: 16 Kova hai ñee me’ẽãva ajapo hãndivare hokavare araivi, kyrãpokui, hei Ñandeja: “Añonoposhu reta haire pyape shiñee mbyparahava hareka ambyparapo ñakape”. 17 Harã heijy: “Mapeãpo shymanduajyhekui mbai porãmba haire japo vekua hareka porãmba vekuare”. 18 Harã hokava, mbai porãmba hejahareiimarã, pikotẽvẽveamahe jukahava ryheva mbai porãmba rehe.

Ã’ẽ katuma ñavahe Tũpa ẽvãpe

19 Hokava rehe shyryvyre, ã’ẽ jyroja ñaĩ jaiche verã Tyrẽnda Kyamba’eiteveva Jesucristo huvy rupii. 20 Pe py’ahuvaipi hareka hykoveva pea ñande tarapo jochahapya rupii, kova hai hete rupii. 21 Hai rãnga ñandy pai vasu, ñyngareko’ẽhe Tũpa hoo. 22 Hãrã, ñaimbojahe Tũpa ẽvãpe pya añetevape hareka tanta jairojavape, joheha ñandypya potaveãma jajepy’apyhe verã mbai porãmba vekuare hareka yy kyambavapy joheha tyretere. 23 Jaikopo pyrãtape ñahãrõ kavivape Tũpa japoñoĩ verã ĩñee meẽ ñandeva. 24 Hãrã ñañehããpo opaiteva jajepy’apy ijehe, hareka jaijyhaihu, hareka mbai haikavivaĩ jajapo. 25 Avypo japoi jaha ñymbatyha’õpe a’ãmore jypykuava rãĩmi, opaiteva ñaiñymykyrẽỹ katu jairojavehe Tũpa, hai ĩãrẽ pyhesha kooĩma vãhẽ ou ararã.

Ynteñoma mbai porãmbape jaiko

26 Poiã jajapo mbai porãmba ñandeĩ jaipotarã añeteva jaikuamatẽvã, mba’etymajy yngava ñameẽ verã mbai porãmba vekuare heky verã. 27 Koñeĩ hemby ara pirĩmbivacheha verãpe kyjehashia, tata hasyva opa mambai verã Tũpa hyvaishore. 28 Ĩme’ẽ Moisés mbypara vekua mbijichevarã, mokue maĩrã mbahapy heshava kaviva mbeurã, jukahañoĩpo. 29 Hãme mbovykuerapo jahehahe Tũpa Tay pyrõheva hareka heivare Cristo huvy mbaimbava, mymorãmbava Espiritu Tũpa ryheva haihushuva. 30 Jaikuaa rãnga Ñandeja heiva: “She ajepypo jyvehe, hareka ambyhepyposhu”. Hãrã heivejy: “Ñandeja jahepo jyvehekui hai ryhevare”. 31 Mbai kyjehashia rãngapo Tũpa hykove’ia ipope ja’arã. 32 Pynymanduapohe ara hasa vekuare, hãĩrã Cristo ryheva pikuaarã hareka mbaretepe pijepyhe jyhasa’asy ojaimbava. 33 Ã’ãmo peevare ĩme’ẽ poshyashuare kuaretare hỹnonde hareka kuaretare pyndyreko’asymba, hareka ãmope piñimi’ĩrũhe kyrã rekohavare. 34 Pee pyparekomba opaite mbyperesohavare, hareka vy’ape pyma’ẽĩmbahe mburuvishare heky pyndyhevi pa’ãpovare, shara pikuaa kavipeĩ ĩmepyre mbai haikavivevarã hareka tantaveva. 35 Hãme avy pypoi pirojahe Tũpa, shara hokava pirojaheape me’ẽãpope me’ẽhareiva ojaimbava. 36 Pee pikotẽvẽ pyreko ñyhãrõkuaa kova jyhasa’asype, Tũpa potava pijapo verã hareka pipity verã ĩñee meẽva Hai hei vekua. 37 Shara Mbyparahava hei: “Areãpo oukui ou’ẽ verã, kỹỹveãmapo’ẽ”. 38 Opa mbaipe heko kaviva jyrojakue rupiipo iko, tẽvã haykue ohojyva avy’ããpo hãndi reta. 39 Tẽvã ñande ha’eã haykue kytyĩ ohojya hareka oho’ia jaheahe verã kyty, koñeĩ hai ñande japity verã tykove opamba ryheva Tũpa jairojaherã.