Hebrews 11

Jyrojakue

1Jairojahe Tũpa hai ẽẽma heky verã hãrõ’õva. Hai heshahava jyrojakue rupii mbai katumba teri heshahava. 2Jyrojakue ĩmereare rupii ñanytynondevare ijetaha kavihe reta. 3Jyrojakue rupii jaikuaa Tũpa japomba kova yvy jerekue hai ĩñee rupii, japohashi opa maĩnungare katumba jaheshava. 4Jyrojakue rupii Abel meẽshu Tũpa mymba jukahava ryheva haikaviveshia Caín. Hãrã Tũpa ñonoshu Abel heko kaviva hareka Tũpa myvãhẽshu hai meẽva. Ajema Abel manoma, ijetateri jyrojakue rupii. 5Enoc jyrojakue rupii rahaha ko yvy jerekueivi ndeiteri hasa ñymanorã, heshahãã shara Tũpa rahashu, tẽvã ndeiteri rahaarã, opaite kuaa reta hai mbyvyashuva Tũpa. 6Tẽvã katuã ñambyvyashu Tũpa jairojããrã, shara ĩme’ẽ pota Tũpa kyty ñymbojava rojañoĩpo hai ĩme’ẽva hareka mbyhepyshu hekashuvare. 7Noé, Tũpa mbeumashu jehu verã heshambateri verãrã, hendushu, hareka kyje ryheve japo pente varko marẽyva mondojepe verã ñymoña hãndiare. Noé hipity mbai kavikue Tũpa meẽshuva opaite hendushua retape. Hareka hokava jyrojakue rupii Noé japohe kuareta ko yvy’ĩãrẽ jaheahe verã. 8Jyrojakue rupii, Abraham hendu kavi Tũpa hẽnohashurã hãrã õhẽ oho kuaamba ryheve matyra hareka oho yvy me’ẽãshu verã kyty hai ña’ãporã. 9Abraham jyroja rupii, yvy mbe’uashuvape iko tenta yngaivi ouva rãĩmi hareka iko’i oo mymba pirekueivi japohava, Isaak iko rãĩmi, hareka Jacob handi, hai reta jyvacheĩ hipity jyve hokava ñee me’ẽãva. 10Shara Abraham jyroja katu mbai arape hesha verã hokava tenta ĩmereva jypy tanta’õ, Tũpa hai myha’ãngava hareka mupuã verã. 11Jyrojakue rupii Abraham, ajemaĩ kuakuaama hareka hyreko Sara katuã memby, Tũpa meẽshu pyrãtãkue ĩmere verã pente memby, shara rojakatutẽ Tũpa hareka japoñoĩ verã ĩñee meẽva. 12Hãme rãnga Abraham, manoserimate’ia heta ĩmerejy ñymoña hãndiare jasytata rãĩmi vate arare hareka yvy ku’i yyvasu hymbeyipi’õva rãĩmi, katumba opa japapava. 13Opaite hokava kuaretare jyrojakue rupii ikovare opa mano hipitymbava Tũpa mbeu vekua, katynga mbyryivi hesha reta hareka kuamondo reta haire ouiva ko yvy’ĩãrẽ mbyryivi ouva rãĩmi. 14Shara hokava haire heiva rãĩmi, mbeu kavishuva mbykuaaka pente tenta hekajyreva. 15Hãma añete kyrã pota retarã, opajymbapo jyraha yvy ou vekua retaivi. 16Tẽvã potañoĩ reta pente tenta haikaviva iko verã retape, jaishu, tenta mashyãva vate arape’õ. Hãme rãnga Tũpa notiã he’iashu verã haire ñu Tũpa, hareka ĩmere pente tenta myhẽvãha’õ haire pevarã. 17Abraham jyroja rupii, Tũpa pyahããshurã, meẽ tay Isaac penteĩrea hapya verã. Hai ĩmemare Tũpa ĩñee meẽva. 18Ajema Tũpa heishu: “Rĩmoña hãndiare oupokui Isaak rupii”. 19Abraham kuaa kavi Tũpa ĩmereva mbaikatu, manova retave mynguerajy verã. Hokava jyrojakue japo Abraham jukamba verã tay; hãrã Isaak oujy hykoveva rãĩmi. 20Isaac jyrojakue rupii ĩñee meẽshu tayre Jacob hareka Esau, mbai kavikue hỹnonderã pevarã. 21Jyrojakue rupii Jacob, manoserimarã, ohovasashu pepenteĩ José tayre hareka õmombaishu Tũpa jy’yvyrare ñyrãtaĩ’iape. 22José jyroja rupii, manomapotarã mbeushu israelitare õhẽ verã Egiptoivi mbaimba jochavape hareka mbeukavishu marãrapore reta kãvẽkue. 23Jyrojakue rupii Moisés, hairã oarãã vekua, tuure ñomijyre mbahapy jasy kavi, shara hesha reta sanjay mashy’aĩterã hareka kyjeãshi reta mburuvisha vasu. 24Jyrojakue rupii Moisés, sanjayveamarã, potaã he’iashu Faraón tajy memby. 25Hai potamba hasa’asy hãndi Tũpa ryhevare, mbai porãmbape vyatẽ verã vekua sapy’aite. 26Katynga Moisés hei haikavive jyhasa’asy, Mesías hasa’asy verã rãĩmi, Egiptope vy’atẽ verã iko katukuepe, shara maĩhe Tũpa meẽshu verãre. 27Jyrojakue rupii Moisés heja yvy Egipto, mburuvisha vasu kyjembashiape, ñymypyrãnta katuhe hesha’ẽva rãĩmi Tũpa Heshahambava. 28Moisés jyrojaiterã õñepyrõ mby’arete Pascua hareka kytykahe onchere avisha huvykuepy, potamba Tũpa jokueva puruka ouva pokohe verã Israelitare tayre tynondeva. 29Jyrojakue rupii kuaretare hasa reta yyvasu Pyntava yvy tini ovaipi rãĩmi, tẽvã egiptovare potatẽ hasava yy japyraharã opa mano reta. 30Jyrojakue rupii opa oa tenta Jerico ñymangorapy vekua, siete arakavima jerehe retarã. 31Jyrojakue rupii Rahab, heko kavimba vekua manoã hai ñee hendumbare hãndi, shara pyavapype myvãhe kavishu Israelitare ñemiãpe mondohavare. 32Mbaiveerapo haijy? Javeãpo’ẽshe ara aijetahe verã Gedeón, Barac, Sansón, Jefte, David, Samuel hareka Tũpa ĩñee mbeu’iare, 33haire jyroja rupii jepyhe reta tentavasure, ñimbivachepe japo reta hareka hipity reta mbe’uava; java juru mbotyshi reta, 34mbove reta tata tivisha hendyva hareka ñemishi reta kyse puku haĩmbeva; pyrãtambateãre opa ñymypyrãta reta; ñymypyrãnta reta ñyrãrõpe hareka opa mivãhẽ hyvaishorãreare syndarore. 35Ã’ãmo taupere myvãhẽjy hentape henta’ĩrũre manova kuerajy vekua. Ĩrũre opa mano heta nupaharã, shara he’iã reta nohẽãjy verã hejahareishu verã, shara hãrõre reta pente tykove haikaviteveva ouva manovare hykovejymarã. 36Ĩrũre hasa ñymbyhoryahevape hareka ñunupa, opa popokuahaseve hareka mbyperesoha. 37Ã’ãmore itape jukaha, mbyteipitei mbija’oha, kyse puku hãĩmbevapy jukaha. Oparupi iko jyre koñeĩ monde avisha hareka kapura pirekue, pavete jyre, vy’ãã reta hareka jyvareha jyrehe. 38Shara ko kuaretare pya kaviterã, yvy’ĩãrẽ iko verãĩmba ẽẽshua, tẽvã oparupi iko jyre, kuambare matyrapo jyraha yvy ikoambaipi, yvyturusure jo’oavaipi hareka ita jo’oavaipi. 39Tẽvã, penteã kova kuimbaire hipity hai Tũpa mbeu vekua, ajemaĩ Tũpa mbyhasateãre jyrojakue ĩmerea reta rupii. 40Opaite kova mbai iko potãã ñandyrehembape haire vãhẽ pota vãhẽvaperã, shara koñeĩpo Tũpa mbyhaikaviteshu kova kuaretare hai opama ñanymbyhaikaviterã.