Heb 12 | TpjSC | STEP | Opaite hokava kuaretare ĩme’ẽ ñandijerekue ñandyresha’ẽva! Hãrã opapo ñambijiche mbai porãmba vekua ñandochava, shara tykove hai pente mbaretepe jykarerava.

Hebrews 12

Ñamaipohe Jesucristo jykoty

1 Opaite hokava kuaretare ĩme’ẽ ñandijerekue ñandyresha’ẽva! Hãrã opapo ñambijiche mbai porãmba vekua ñandochava, shara tykove hai pente mbaretepe jykarerava. 2 Ñamaĩpo Jesús jykoty, jyrojakue mbijypyva hareka mbyhaikaviteva, hasa’asy kurusure, hareka ñynotimbape mano, shara hai kuaa jyhasa’asy haykue ĩmepore vya ojaimbava hareka vapy Tũpa vapypya jakata kyty. 3 Pyndypya pimbijetahe ñymyha’ãnga Jesús ryheva, heta hasashi ñymymorãmba vekua mbai porãmba japo’ia retaivi, tẽvã hai ohoĩ tynonde. Hãrã avy piñymeẽ hareka piñymykangy. 4 Pee rãnga nde’iaveteri ñymanopeve pyvãhẽ mbai porãmba pirãrõ handiape. 5 Tẽvã hãĩshe opa pyndysareheva marãra Tũpa tayre mbarakuaa: “Shyray, avy mbijiche Ñandeja ñunupa kavi hareka avy ñymykangy Hai ijeta pohynderã. 6 Shara Tũpa nupa haihuvape hareka nupa opaite tay rãĩmi myvãhẽshuvare”. 7 Pyhasa kuaa jyve jyhasa’asy, Tũpa pyndyraihu hareka punupapo jyve, shara tay rãĩmi pyndyre. Ĩmera’ẽ mbava tyray tuu nupambashuva? 8 Tẽvã Tũpa punupaãrã, opaite tayre japoheva rãĩmi, hãma pee ha’eã ta’yite, koñeĩ rã’angaĩpo. 9 Hareka jyve ñanderure ko yvy’ĩãrẽ ñanunupamba jyve ñanyndeiterirã, hareka jajapombashu heivare. Marã’ĩrãra Tũpa heiva jajapoãpo jyveshu, ñane’ãkue Tuu, ĩmejare verã tykove opambava? 10 Ñanderu reta rãnga ko yvy’ĩãrẽ mbovy arapeĩ ñanunupamba, haikavi ñande verãpe; tẽvã Tũpa ñanunupa hai rãĩmi ñañymbyheko kyamba verã. 11 Ãñete opaiteva ñunũpa ha’ẽã ñanymbyvyava myvãhẽãma ñanderã, hasy ñande. Tẽvã jaikuaa jyve Tũpa ñanymboihea meẽ ñandeva, jaikopo pyavapype hareka jajapopo haikaviva.

Tũpa pyakavikue mbijichevare

12 Hãrã pymypyrãtajy opaite pindijyva hareka pynypyãre kangyvare, 13 hareka tape symyĩva pyheka pepy pevarã, tepy japava kuera verã hareka syryimbajy verã. 14 Piñyhããpo piko hãndi pyavapype opaiteva hareka pyreko tykove kyambava, shara kyrãmbape mba’etypo hesha verã Ñandeja. 15 Piñyhãã avy mbava hipityããkui Tũpa pyakavikue, mahẽ mbava ovakui pente yvyra hapo irova hareka opavape myporããkui. 16 Avypo mbava kyrãrãĩ’i hareka mbai jahehe Tũpape mbijicheavare. Kova japo Esaú, hai meẽhe ho’uava ña’ãporãte vekua tyray tynondeva ryheva. 17 Pikuaa rãnga jyve, Esaú pota tuu ohovasashurã, tẽvã mbijicheha hareka ajemaĩ jaheote’i katuveãma yngaijy hai japo vekua. 18 Pee piñymbojããhe hokava yvyturusu katutẽ pokohaheva hareka ẽẽheva tata hendy’õva, timimbiva hareka yvytu vasukue, 19 pyhenduã trompeta ipukue hareka Tũpa ĩñee. Hãrã hokava ñee hendu vekuare jururemba reta poi ijeta verã, 20 shara haire katuãpo jepyhe japo verã he’iashuare: “Yvyturusupe pyrũva, ajemapo mymba ñarõva, jukahapo itape”. 21 Pyrỹngyjeva ryheva hokava heshahava, hãme rãnga Moisés teiva hei: “Opa aryry akyjeiterã”. 22 Katynga pee piñymboja yvyturusure hareka tenta Tũpa hykove’ia ña’ãpova, Jerusalén mashyãva hareka piñymboja jyvehe hetaraivi Tũpa jokuevare haipe ñymbaty pyraheshu verã Tũpa, 23 hareka ñymbatyva Tũpa tay tynondevare mbyparahava vate arape. Tũpa teiva piñymbojahe, opavare mbivacheva, hareka piñymboja jyvehe kuaretare je’espiritu vate arape’õre mbyheko kaviamavare, 24 Jesure jyve, mbivache kaviva ñee me’ẽã py’ahuva hareka turuvyre kytyhaheva, hokava ijeta kavivehe Abel huvykue. 25 Pingareko kavi avypo pimbijiche ijeta ñandeva. Shara ohojepeã reta potamba henduvare ko yvy’ĩãrẽ mbo’ea retarã, ñande pevarã javaipo jyve jahajepe verã jyve potaã ñahendu vate araivi ñanymboivarã. 26 Hokava arape, Tũpa ĩñee opa yvy mbyryry; tẽvã ã’ẽ ĩñee meẽ: Pentepo ha’eã yvyĩ ambyryry verã, vate arapo jyvekui. 27 Hãma hei kova “pentemapo”, kuaaha opapo hekyha mbai japoha vekua retarã, kova hai katu my’õmyãvare, pyta verã õmymbare. 28 Hãma, me’ẽha ñande pente huvisharã’õ my’õmyhambava. Hãrã ñamombaiposhu Tũpa jyhaihukuepy hareka ñambyvetepo hai pya ohoherã myvãhẽva. 29 Shara ñanu Tũpa ova pente tata opaĩ hapyva.