Heb 13 | TpjSC | STEP | Avy pypoi pijyhaihu shyryvyre.

Hebrews 13

Cristo ryhevare japo verã

1 Avy pypoi pijyhaihu shyryvyre. 2 Avy pyndysarehe pymyvãhe kavi verã ohovare pynyrẽntape, shara ĩmemba’ẽ kuambape myvãhẽva Tũpa jokuevare. 3 Pynymanduahe mbyperesoavare, kyrã pee pẽĩ hãndia rãĩmi mbyperesoavape, hareka, peeteiva pyhasa’asypeĩva rãĩmi. 4 Opaiteva tymbyvete omendava ryheva hareka jyrekomavare avy timyngya; shara yngangava iko hãndia hareka yngava pota’ijya Tũpa mbijichepo. 5 Avy pejepy’apy hetavepyre verã kyrypoti, pyvy’a ĩmepyreare; shara Tũpa hei: “Hai’aĩtei neĩ aryreja verã”. 6 Ja’epo jyve jaroja katuvape:
“Ñandeja rãnga hai shymboryseva akyjeãpo; Mbaivara katu japo shyrehe kuaretare?”

7 Pynymanduahe tũpaope miñaka’ipeare hareka Tũpa ĩñee mbeupe vekuare; pypya pimbijetahe mbovyra mbai kavi japomba reta hykovepe hareka kyrã pyroja haire rojava rãĩmi. 8 Jesucristo rãnga hai ka’ãmeva, ã’ẽva hareka opa ara pevarã. 9 Avy pyroja yngai pyrymbo’eaheva hareka kuaahambava. Haikavivepo ñandypyape pũã Tũpa jyhaihukue, hareka avy pyhendu pyrỹmbo’eahea ho’uava ryheva, mbaivapeã haikavishu hokava ñee ho’uava ryheva henduvare. 10 Ñande ĩmejare pente altar yngaiveva, hokavape paire arykaiva tabernáculoivi ẽẽãmbashu karu verãre. 11 Shara pai vasu raha mymbare huvykue Tyrẽnda Kyamba’eitevevape, me’ẽava mbai porãmba heky verã, tẽvã hokava mymba hetekuere hapyha katoape. 12 Kyrã jyve, Jesús nohẽha tentaivi hareka mano katoape, mbyheko kavi verã hai huvy rupii hai ryhevare. 13 Hãme rãnga ñande ñahẽpo jyve hãndi Jesús hareka ñaĩpo jyve hai rãĩmi jahasa’asy verã. 14 Ko yvy jerekuepe mba’etyjare pente tenta opa ara pevarã, koñeĩ jaha jai jykoty jaheka hokava tenta ou verã. 15 Hãrã japyraheñoĩposhu Tũpa, Jesucristo rupii. Kova mbyrahe hai mymba jukahava rãĩmiva ñameẽshu verã. Japyraheshu, ñandijuru rupii ñambeu hai hee! 16 Avy pyndysarehe haikaviva pijapo verã hareka pymeẽ jyveshu yngavare mbai ĩmepyreva, shara kova me’ẽãvare hai mbyvyava Tũpa. 17 Pijaposhu opaite mbai miñaka’ipeare hareka pijapo heiva, shara haire ñyngareko pyndyrehe putuumbape hareka ĩmere reta japoñoĩ verãre Tũpa hỹnonde. Kyrã pijaporã, haire vy’apepo mba’apo reta hareka mbaimbaa heiva retape, katynga ajetẽãperã veruãpope haikaviva. 18 Pimboi yryrehe. Kuaa kavi rãnga yrypya vapy kavirã, shara potate yryreko kavi opavaperã. 19 Airure asype pimboi verã, Tũpa ñonomarã areã ãĩjy penendie verãkui.

Marãndu opahea

20 Tũpa pyakaviva, ñymanoivi puãjy vekua Ñandeja Jesús, avisha ñyngareko’ihea ojaimbava, ñee me’ẽãva opa ara pevarã huvy rupii. 21 Haipo pynymboi opa mbai haikaviape, pijapo verã hai potava, hareka tijapo pyndyrehe mbai kaviva Jesucristo rupii. Jesúspe tymyvãhẽha hĩmbipekue hareka opa ara toñemombai. Amén. 22 Shyryvyre, airurepe pyhendu verã ñyhãrõkuaa ryheve kova ñee ñymykyrẽyva ryheva mishĩĩ ambyparapeva. 23 Aipota pikuaa ñandyryvy Timoteo poihamashiva. Narẽãmi vãhẽ ourã, ahapo hãndikui apyryresha verã. 24 Pymarãndushu opaite tũpaope miñaka’ipeare hareka ñandyryvyre Tũpa pyhyrõvare. Italiape’õre mondo jyvepe marãndu. 25 Tũpa heta tymaĩkavi pyndyrehe. Amén.