Heb 2 | TpjSC | STEP | Hãme rãnga jajasaka kaviñoĩpohe ñee ñahendu vekuare, ñahẽmbashi verã tape Tũpa mbishaka ñandeva.

Hebrews 2

Pyrỹmondojepeva ojaimbava

1 Hãme rãnga jajasaka kaviñoĩpohe ñee ñahendu vekuare, ñahẽmbashi verã tape Tũpa mbishaka ñandeva. 2 Shara Tũpa jokuevare hei vekua añete hareka opaite mbai porãmba japo vekuare hareka ñee henduã retarã hekope kavi nupãha, 3 marãrapo ñañemikui, ñymondojepeva ryheva ojaimbava ñaingarekoãherãme? Shara Ñandeja rãnimba tynonde mbeu kova ñymondojepeva ryheva, haivi kova ñee henduvare heshaka ñande añetevarã. 4 Harekajy Tũpa my’añete ohojepeva ryheva mbai heshaha verã handi, mbaikavikue handi, mbaikavi heshaha verã handi, hareka mbaikuaakue Espiritu Santo meẽva rupii, Hai potava rãĩmi.

Jesucristo hai ñanymondojepeva

5 Tũpa rãnga ñonoãmba jokuevare ipope ko yvy py’ahuva ou’ẽ verã, ñande jaijetaheva. 6 Tẽvã añete mbava hei: Mbaivara hai kuareta, nymanduahe verã? Mbaivara hai kuaretare nymanduahe verã maĩrã kuareta tay ryraha ndijehe verã? 7 Tũpa jokuerea retaivi mishĩĩ rijaposhu, hareka rĩñonohe hĩmbipekue hareka rymbyvete. 8 Opa mbai rĩñono ipy’ipe. Tũpa opa ñono hai iperã, hãrã mba’ety maĩnunga ẽẽmbahea. Tẽvã jaheshããteri opa maĩnunga ñonohava hai ipope. 9 Tẽvã jahesha Jesús, kỹỹãmba mimishĩĩha Tũpa jokuerea retaivi, ñonohe hĩmbipekue hareka omomba’eha huvishavasu rãĩmi, shara heta hasa’asy hareka mano. Tũpa pyakavi rupii, heja hasa ñymanoipi opavare haikavishu verã. 10 Opa mbai ẽẽ Hai pevarã shara Hai japo hareka ñyngarekohe, Hai pota opaiteva haihushuvare hareka Hai heiva japoshuare, reko verã jyve hĩmbipekue. Hãme rãnga Tũpa, jyhasa’asy rupii mbyheko kavi Jesucristo haire Mondojepeva. 11 Shara opaiteva pente Tuuĩre; mbyhekoa kaviva hareka pyrỹmbyheko kaviva. Hãrã, Tũpa Tay notiã heihe verãre haiva “tyvyre”, 12 Ñandeja ĩñeepe rãnga hei: “Shyryvyre ambeuposhukui ndyree, hareka ñymbatyhavaipi apyrahepokui mbyrahere”. 13 Heivejy: “Airojapohe”. Hykuaĩ heijy: “Kope ãĩ hãndi shyrayre, Tũpa meẽsheva”. 14 Hãrã tayre ho’o hareka huvykueivi me’ẽha jyveshu Jesucristo tyro’o hareka tuvy, ñymano rupii jukashu verã Ãña, hokava ñymano ijakue. 15 Kyrã mondojepe opaite ñymano kyjeshiare hareka heta ara iko jokuehareirevape. 16 Ãñeteara ouã mboryshu verã Tũpa jokuevare koñeĩ ou mbory Abraham ñymoñashiare. 17 Hãrã Jesús tyvyre ikova rãĩmirãnipo iko reta, ikoshi verãkui Tũpa hỹnonde Pai ruvisha jyrojahaheva hareka pyryparekova, hareka opa hejahareiishi verã kuaretare heko porãmba vekua, hai mano rupii. 18 Haiteiva heta hasa’asy hareka pyahã’ãhãshurã, hai katu mbory jyveshu opaite pyahã’ãhãva retape.