Heb 3 | TpjSC | STEP | Hãme rãnga shyryvyre, pee Tũpa ryhevare, pyhỹrõava hareka hẽnohava vate arape oho verã. Hãrã pypya pimbijeta kavihe Jesús: Hai rãnga apostol hareka Pai Vasu jairojahea ryheva.

Hebrews 3

1 Hãme rãnga shyryvyre, pee Tũpa ryhevare, pyhỹrõava hareka hẽnohava vate arape oho verã. Hãrã pypya pimbijeta kavihe Jesús: Hai rãnga apostol hareka Pai Vasu jairojahea ryheva. 2 Jesús japoñoĩmbashu Tũpa potava, ñonohashu ñanymbory verã, Moisés hekopekavi japova rãĩmi opa mbai Tũpa hoope. 3 Tẽvã Jesús omomba’ehavembashi Moisés, pente oo japo’ia rãĩmi mbyvetehaveshi oo japo vekuaivi. 4 Shara opaite oo reta ĩmeñoĩpo’ẽ mbava japova, tẽvã opava maĩnunga ẽẽvare japova hai Tũpa. 5 Kyrã Moisés, jokuehava rãĩmi, hekope kaviñoĩmba japo opa mbai Tũpa hoope, mbeu verã mbaivara Tũpa heipo’ẽ mbai arape. 6 Tẽvã Cristo, Tũpa tayrã, jyrojañoĩhe Tũpa hoo, ñande hai hokava, ñaĩñymypyrãta ñaĩherã hareka vy’akuepe japity verã ñahãrõva Cristore ẽvã. 7 Hãme rãnga, Espiritu Santo heiva rãĩmi: Hokava arape Tũpa ĩñee pyhendurã, 8 avy pymytanta pyndypya israelitare rãĩmi haire pũã shyrehe hareka shypyahãã reta yvy ikoambaipi. 9 Haipe pynytynondevare shypyahãã reta, ajema 40 ãño heshatẽ reta ajapo vekua. 10 Hãme rãnga shyposhyshu kuaretare ã’ẽvare, hareka hai: Ikoñoĩ retakueipi haimbaa shyrapeipi, shara haire kuaãmba reta shyrape. 11 Hãme rãnga poshype ameẽ shiñee: Iche’ãĩteipokui she aputuu verãpe. 12 Pymaĩ shyryvyre, avy mbava pee ĩmetyre pya porãmba hareka mbai rojamba’ia Tũpa hykove’ia pynymymbyryshi verã. 13 Kyrãte verã pimykyrẽypo opa ara, ẽẽterirã tantangatu ẽẽpeve hokava “ã’ẽ”, mahẽ mbai porãmba pynymbytavyrã pyndypya pymytãtashikui mbavaivi. 14 Shara ñande heta mbai ĩmejare Cristo handi, jairojaĩhe opa arapeve tynondeite ĩmejarevaivi. 15 Hãrã hei: Hãma ã’ẽ ĩñee pyhendurã, avy pymytantashi pyndypya israelitare rãĩmi, pũãhe reta Tũpa, potãã japoshu heivarã. 16 Shara, mbava retara hendutẽvã, pũãhe vekua? Ha’eãra opaite Egiptoivi õhẽ vekuare Moisés rupii? 17 Hareka mbava retara Tũpa poshy hãndi 40 ãño? Ha’eãra mbai porãmba japo’iare hãndi, haire mano reta yvy ikoambaipi? 18 Mbava retapera ĩñee meẽshu ichembaa verã putu’uhavape? Ñee hẽndumbaashua reta, 19 hareka añete katuã iche Canaanpe shara jyrojããhe reta Tũpa.